Read berom Luka 6 Bible Online

Luka 6 - berom bible

Luka 6

¹Tuk Shábat hak, Yɛsu á sè kwey e ji hwirî alkama, ko bemat masâ fwom mɛ ba hwo kwɔrɔs batô alkama mo, ba tanang vɛ e vɔ, ba re yéneng o.

²Ko BeFarisi behak ba hwo ye, “Yaga sɛ́ de yin a sé ra pyɛ de Badu mot ba ro mɛ̀ na be ra Tuk Shábat arɛt?”

³Yɛsu a toyo a yɛn, a yang ɛn, “Yin a ga basa pyɛ de Gbɔng Gwɔ̀m Davit à kana ra jeng de yɛ tanga bemat mɛ yɛn à wok vyong wɛt arɛt?

⁴À yel e duk Dagwi, à jut kpam-tuk de bà nása e nuyêl Dagwi, à re, ko à to gas a bemat de bà sè tanga yɛ, mwa ano de Badu mot ba ro mwat hwak nà re wɛ sɛ̌ bepiris zɔng.”

⁵E yɛnɛ mo, Yɛsu a yang ɛn, “Me de ma tɛ́ me mwat ma vɔk reto e ra Tuk Shábat.”

⁶Tuk Shábat o hak gbak, Yɛsu a wɔ̀ yel e duk re fongol, ko a basa a bemat. Mwat hwak á sè e hwomo de vwɔ yege mɛ gwa gyɔt.

⁷Bemât basâ Badu tanga BeFarisi ba simo na be sɛ̀ pyɛ cak e ra Yɛsu, na be wɔ̂ sekun mɛ. Yaga ano, yɛn a bɛrɛng hɛ naka na be di, kɛ gyeng ê tɛ̀ ɛ tyang Tuk Shábat.

⁸Ko Yɛsu a tɔk báre mɛn, a yâng mwat de vwɔ mɛ gwa gyɔt, “Sogo, na hwo tumal e tē.” Ko mwat o a sogo, a wɔ̀ tumal e hwomo.

⁹Ano Yɛsu a yang ɛn, “Ma sé rangal hin: Badu mot ba simo a wot na wot a ra sɛ́ e Tuk Shábat arɛt? Wot a ra pyɛ ryat kɛ pyɛ vyes arɛt? Wot a sey nekên mwat, kɛ wot a wey na nɛ arɛt?”

¹⁰A gwɔrɔ na bayis mɛ, na a bɛrɛng hɛn mwa, ko a yâng mwat o, “Nára vwɔ mō!” A nára gwɛ, ko gwa tɛ́ ɛ gyat.

¹¹Yɛn a tɛ̀ shom sizɔng, ko ba hwo tɔrɔng na bemɛn e ra pyɛ de bê ra a Yɛsu.

¹²E ji nepɔlɔ nane, Yɛsu a wɔ̀ tut e raku na a ra won; e hwomo a pɔ̂l sè ha na Dagwi e ji won.

¹³Jeng de gasi ha ye gbey, a yishi bemât masâ fwom mɛ na be vey na yɛ, ko e ji mɛn a kasa bemat kuru na vɛ beba, ko a vo a yɛn rezâ Betom.

¹⁴Bemat a vemo ngan: Simɔn, de Yɛsu a tang ɛ, à Bitrus, tanga gwa mɛ Andarawus, na Yakɔp, na Yohana, na Filip, na Bartɔlɔmayus,

¹⁵na Matayus, na Tomas, na Yakɔp Alfayus, na Simɔn, de ba tang ɛ, à Zelotes wɔgɔ, mwat de a sé e yong ɛ na a dul sevwel mɛ,

¹⁶na Yuda Yakɔp, tanga Yuda Iskaryot, de a tɛ́ ɛ mwât rôw Yɛsu.

¹⁷Yɛsu tanga betom mɛ mo ba gyirik yi e raku mo, ko yɛn a wɔ̀ tumal e kwɔn de ha sé tyɛl. Bemat de ba sé raa Yɛsu pyak ba ga tula hɛn e hwomo tanga gbɔng regyɛng bemat yi e mwa sevwêl Yudiya, na yi e gbɔng repomô Yɛrusalɛm, na yi e bapomô Tur na Sidɔn de ba sé e rekwogôm gworep. Yɛn a vey na be ba wok basa mɛ, na be to tɛ̀sɛ hɛn tyang yi e nezap nerɔ mɛn.

¹⁸Ko vemo de cēng ya tak a yɛn reyɔm ba vey, ko ba tɛ̀ ɛn tyang arɔng.

¹⁹Bemât mwa ba tē ngyɛ́k na be ra ɛ, yaga reto mɛ de e ra mɛ̀ pyɛ̂ bes ra yi na yɛ, ko ra tɛ̀sɛ hɛn mwa tyang.

²⁰Yɛsu a yâng rato mɛ garang, a bɛrɛng bemât masâ fwom mɛ, ko a hwo ye, “Yin a sé vê yey pyɛng, à yin bepɛng, yaga yin a sé nèy vwel ne Segwɔm Dagwi!

²¹Yin a sé vê yey pyɛng, à yin de yin a sé wok vyong a remo, yaga yin a rɔda sirik! Yin a sé vê yey pyɛng, à yin de yin a sé tosho a remo, yaga yin a rɔda shɛgɛsh!

²²“Yin a sé vê yey pyɛng jeng de bemat be bɛɛ hin ves, ko be kyini hin, ko be dùsa hin, ko be tɛ̀ baza min ba sé beves, yaga yin e raa Me de ma tɛ́ me mwat!

²³Vɔk in yey pyɛng jeng de pyɛ́ yane ya té, na yin a gyilsit na yey pyɛng, yaga pyɔlɔ min ya rɔda ba sè pyak e lagwi! Bedabeda mɛn kwong bà ra a bezarap Dagwi tyɛng ano arɔng.

²⁴“Yaa kukuuk! Gawey e ra yin de yin a sé bedaberey a remo, yaga yin a ga kana sɛ̀ neta min!

²⁵Gawey e ra yin de yin a sirik a remo, yaga yin a rɔda sangal na vyong! Gawey e ra yin de yin e shɛgɛsh a remo, yaga yin a rɔda vɔk lashê yey, ko yin a rɔda tosho arɔng!

²⁶“Gawey e ra yin jeng de bemât mwa be ha há rat e ra yin, yaga bedabeda mɛn bà ha tyɛng ano e ra bezarap Dagwi vê bɔs.”

²⁷“Ko ma sé ha a yin de yin a sé wokos me wɔgɔ: Tɛ̀ in yey na bemât repugu min, rá in a vemo de be bɛɛ hin ves pyɛ́ ryat,

²⁸tɛ̀ in nerat e ra vemo de be wuna hin na gwi, ko rá in won yaga vemo de be tē na yin naka wɛt.

²⁹Ka sede mwat hwak a fala hwo e rwanang gwomo, ko doyo a yɛ gwot na a to fala arɔng. Ka sede mwat hwak a jut pyɛ banga mō, ko hwo ro na rugu e yɛ wɛt.

³⁰Nɔ̂ng kawɛ mwat pyɛ de a vey won na hwo, ko ka sede mwat hwak a jut pyɛ mō cak, hwo to yang ɛ a nɔng o yɛ wɛt.

³¹Rá in a bemat tyɛng pyɛ de yin e simo yɛn a ra a yin arɔng.

³²“Ka sede yin e tɛ̀ yey zɔng na bemat de be tɛ̀ yey na yin, ko nerat o nɛ a sɛ́ na yin arɛt? Yaga bemât banɛn arɔng be tɛ̀ yey na vemo de be tɛ̀ yey na yɛn!

³³Ko ka sede yin e ra pyɛ́ ryat vɔk na vemo zɔng de be ra a yin pyɛ́ ryat, nerat o nɛ a sɛ́ na yin arɛt? Yaga bemât banɛn arɔng be ra ano!

³⁴Ko ka sede yin e hwɔpɔs a vemo zɔng de yin e bare, bê to tala hin, ko nerat o nɛ a sɛ́ na yin arɛt? Yaga bemât banɛn arɔng be hwɔpɔs a bemɛn, na be to tala tyɛng ano!

³⁵A kwon sè ano wɛt! Tɛ̀ in yey na bemât repugu min, rá in a yɛn pyɛ́ ryat, ko hwɔpɔs hin a yɛn sana bare, yin ê to sɛ̀ pyɛ cak. Ano kwong, pyɔlɔ min ya rɔda ba sè pyak, ko yin a rɔda ba sè nèy Dagwi De A Dal Na Reto Mwa, yaga yɛ e ra a bemat de be feng wɛt tanga vemo de ba sé beves pyɛ́ ryat.

³⁶Tosho hin reyɔ̂m bemat, tyɛng sede remo de Da min e tosho reyɔ̂m bemat arɔng.”

³⁷“Yin kwon ra a bemat shɔt wɛt, ko Dagwi a rɔda ba ra a yin yɛ arɔng wɛt. Yin gang mwat na shɔt wɛt, ko Dagwi a rɔda ba gang in na yɛ arɔng wɛt. Hàla hin a bemat banɛn mɛn, ko Dagwi a rɔda ba hàla a yin bemin arɔng.

³⁸Nɔngɔs hîn bemat nɔrɔ, ko Dagwi a rɔda nɔng in arɔng. Ba rɔda masa a yin na shǐ de ba sila hɛ, hemo de ba ga dugut hɛ, na be ngyɔ pyɛ́ de ya sé e ji mo, na ye sila zoo, na ye lusha hɛ, ko ba rɔda shusha yɛ̄ e ji dap min. Yaga shǐ de yin e masa a bemat mɛ̀ e hɛ de Dagwi a rɔda to ba masa a yin mɛ̀ arɔng.”

³⁹Ko Yɛsu a hwo ha a yɛn gwɔrɔ-há hemo, a yang ɛn, “Bwók a rɔda tɔk hwɔlɔ a bwók vwɔ arɛt? Ka sede a ra ano, ko mwa hɛn ba rɔda gaba e ji revɔng!

⁴⁰Mwat de be masa a yɛ pyɛ a dal mwat de e basa a yɛ wɛt; ko kawɛ mwat a rɔda sè tyɛng sede mwât basa mɛ jeng de a tala masâ fwom o.

⁴¹“Yaga sɛ́ de hwó di keshugu e yîs gwa mō, ko hwó tɛ̀ tong na bak cɔgɔt de wa sé e yis mō wɛt arɛt?

⁴²Kɛ e rɛ̌ de hwô tɔk yâng gwa mō, ‘Gabɔk, à gwa, tik na me pat a hwo keshugu de ka sé e yis mō’, ko hwo kwong, hwô tɔk di bak cɔgɔt de wa sé e yis mō wɛt arɛt? À hwo mwât nenu-neba! Tānga pat bak cɔgɔt de wa sé e yis mō e ngyen, ko e bama mo, hwô tɔk di kyɛrɛng, na hwo pat keshugu de ka sé e yîs gwa mō.”

⁴³“Cɔgɔt ryat ye tɔs nèy neves wɛt; ano arɔng, cɔgɔt vyes ye tɔs nèy nerat wɛt.

⁴⁴Yaga be tɔk kayɛ cɔgɔt yi e nèy de ye tɔs: Be vos nèy regwi e ra serɔgɔ kɛ nèy anap e ra jaal arɔng wɛt.

⁴⁵Mwat rwat e ra pyɛ́ ryat yi e pyɛ́ ryat de ya sé e ji yey mɛ; ko mwat vwes e ra pyɛ́ vyes yi e pyɛ́ vyes de ya sé e ji yey mɛ arɔng. Yaga e pyɛ́ de ya ga sila yêy mwat de ye nunus yi e nu mɛ.”

⁴⁶“Yaga sɛ́ de yin e tang me, ‘À Darwey, à Darwey’, ko yin e kyɛ́ in nà ra pyɛ de me ha a yin arɛt?

⁴⁷Kawɛ mwat de e vey na me, na a wet betong na neha hom, na a gyeng nɛ — ma rɔda dura a yin yerê mwat de yɛ a sé:

⁴⁸Yɛ a sé sede mwât lɔk de a cing tîn lɔ mo ciwil, ko a hwo tɛ̀ retis o e ra gbondong. Jeng de rwak wa hwo rop, ko tɛmɛ-nshi na pom, na tɛ́s lɔ mo, ko na tɔk gang hɛ wɛt, yaga bá kana lɔk hɛ naka.

⁴⁹Ko mwat de e wet betong na neha hom wɛt, na a gyeng nɛ wɛt a sé sede mwat de a lɔk lɔ mɛ pàk e vwel sana tɛ̀ retis. Jeng de tɛmɛ-nshi na pom, na tɛ́s lɔ mo, ko remo-remo, ha vɛ̌ gaba. Hm! Lɔ hane ha gaba gaba ves!”