Read berom Luka 8 Bible Online

Luka 8 - berom bible

Luka 8

¹A ga mâk ros wɛt, ko Yɛsu a kyě kyè e bapomo tanga bemajey, na a shara Yɛgɛt Yat wɔgɔ, Dagwi a rɔda re negwɔm e ra jey. Bemât masâ fwom mɛ kuru na vɛ beba ba sé tanga yɛ.

²Beha behak arɔng ba kyè tanga yɛ, vemo de á kana paa cēng yi e ji mɛn, ko á kana tɛ̀sɛ hɛn tyang yi e nerɔ mɛn arɔng. Yɛn vɛ, à Marya wo Magdala, de bá kana paa cēng tyaama yi e ji mɛ,

³na Yowana hwâ Kuza de á sè gbɔng mwât fwôm Herodes, na Susana, tanga bwang beha mo pyak de ba sɛlsɛ Yɛsu na bemât masâ fwom mɛ yi na pyɛ̂ vɔ mɛn.

⁴Bemat bá sè vɛ̀sɛ na Yɛsu yi e bapomo detidetu; ko jeng de gbɔng regyɛng bemat ra ga tula hɛ, Yɛsu a hwo ha a yɛn gwɔrɔ-há hemo, a yang ɛn:

⁵“Mwat hwak a nusu na a wɔ̀ bere yére. Jeng de a sé bere yére mo, cak ya gaba e tê gwong, ko bemat ba bɔrɔs yɛ̄, ko benon ba tɔng yɛ̄.

⁶Cak ya gaba e kwɔ̂n kusha, ko jeng de ya vungu, ya hworok, yaga nefongôl kwɔn o na sé yɔkyɔk wɛt.

⁷Cak ya gaba e kwɔ̂n serɔgɔ, ko rɔgɔ mo ha ras mwa tanga yɛ̄, ko ha vo yɛ̄.

⁸Cak arɔng ya gaba e ji nefongol nerat. Ya ras, ya tɛ̀ yéneng, ko ba sɛ̀ pyɛ́ de ba bere zang naga (100).” E yɛnɛ mo, Yɛsu a ha na gbɔng fwɔ, a ye, “Mwat de a vɔk betong, tik na yɛ a wok!”

⁹Ko bemât masâ fwôm Yɛsu ba hwo rangal hɛ pyɛ de gwɔrɔ-há mo ha ha.

¹⁰Yɛsu a hanat, a yang ɛn, “A sé e yin vɛ de ba nɔng in tɔ̂k pyɛ̂ neyaàng Segwɔm Dagwi. Ko bwang bemat yɛn e wokos pyɛ́ mo yi e gwɔrɔ-há, yaga na yɛn a bɛrɛng, ko yɛn ê di wɛt, yɛn ê wok, ko yɛn ê tɔk wɛt.”

¹¹Yɛsu a to yang ɛn, “Gwɔrɔ-há mo ha kwey ngan: Yére mo ya sé rehâ Dagwi.

¹²Yére de ya gaba e ra gwong ya sé sede bemat de be wok rɛ. Ko gwɔ̀m cēng e vey, ko e hashe reha mo yi e neyey mɛn, yaga na yɛn a kwon sey tsak o, na be sey neken mɛn wɛt.

¹³Yére de ya gaba e ra kusha ya sé sede bemat de be wok reha mo, ko be sey rɛ na yey pyɛng. Reha mo re tɛ̀ berinis wɛt, yɛn e sey tsak o jeng tyɔng zɔng, ko e jeng setɔgɔs yɛn e to ɛn na bama.

¹⁴Yére yemo arɔng de ya gaba e ji serɔgɔ ya sé sede bemat de be wok reha mo, ko hywɛ-hywɛ bɔrɔ̂k pyɛ̂ jey, na netâ yas, tanga raà netâ pyɛ̂ jey yemo ne sila neyey mɛn, ne vo reha mo, ko be sɛ̀ pyɛ cak yi na yɛn wɛt.

¹⁵Ko yére de ba bere e ji nefongol nerat kwong ya sé sede bemat de be wok reha mo, yɛn a vɔk rɛ naka na yey rining, be gyenges rɛ, ko yɛn e niri, sɛ̌ ba sɛ̀ pyɛ ryat yi na yɛn.”

¹⁶“Vit a mwat de e tɛ̀ kya e kywa-kya, na a ye gup a wɛ na kwɛt, kɛ na a tik wɛ e nɛ̂n gwat. Ê jāma kwɔn de ha sé garang, na a tik ɛ̀ wɛ, yaga na bemat de be yel e duk be bɛrɛng negbey o.

¹⁷Vit a pyɛ de ba ga kana lɛrɛ, de ba rɔda ba nusu na yɛ e jey wɛshɛrɛk wɛt; ko vit a pyɛ de ba ga kana bang, de ba rɔda tik nà tɔk yɛ na be to wunta yɛ dɛdɛrɛng wɛt.

¹⁸“Tē in naka kwong na gwong de yin e wokos há, yaga mwat de a vɔk pyɛ cak, ba rɔda to gwɛ̌ a yɛ. Ko yɛ womo de a vɔk pyɛ wɛt, ba rɔda sey ɛ̀ yi na yɛ kepyɛ de e bare, ka sé kemɛ.”

¹⁹E jeng yane, nêng Yɛsu na begwa mɛ ba hwo vey na yɛ, ko yɛn a tɔk wɔ bagat na yɛ wɛt, yaga bemat ba kat.

²⁰Bemat o ba yâng Yɛsu, “Di, neng mō na begwa mō ba sé e tumal e majey, yɛn e simo be di o.”

²¹Ko Yɛsu a hanat a yɛn mwa, a yang ɛn, “Di, neng hom na begwa hom à vemo de be wok rehâ Dagwi, na be ra fwom na rɛ.”

²²Tuhak, Yɛsu a yel e dwa-nshi tanga bemât masâ fwom mɛ, ko a yang ɛn, “Tik na wot a ye dɔ vɔk e gurâ gworep gworo.” Ko yɛn a kyè.

²³Sede yɛn a sé e ji kwɛngɛl o, Yɛsu a vɛ̌ hwo nevwa. Ko gwogul gwa nusu, gwa pɛsɛl rep o na gap, dwa mo wa hwo sila na nshi, ko bwang o tyɔng yɛn a wey.

²⁴Bemât masâ fwom o ba wɔ́ na Yɛsu, ba shina hɛ, ba yang ɛ, “À Da, à Da! Wot a sé kyè wɔ̀ ye pyɔp!” Yɛsu a sogo, a gyong gwogul o tanga bagun nshi de ba ra yol, ko gwogul o gwa tumal, ko kwɔn o ha ye yuu.

²⁵Ko a rangal hɛn, a ye, “Yaga sɛ́ de yin a tɛ̀ gap min e ra me wɛt arɛt?” Yɛn a wok bengyip, ko yɛn a langat hɛn, ba hwo tâng bemɛn, “Kée! E wɛ̌ mwat a womo de a nɔ̂ng gwogul na nshi nu, ko be gyeng há mɛ arɛt?”

²⁶Yɛn a kyè, sɛ̌ ba wɔ̀ wul yɛnɛ̂ sevwêl BeGerasa de sa sé e gura gworo gwô Gworep Galili.

²⁷Sede Yɛsu a sé gyirik yi e dwa-nshi e rekwogom, ko mwat hwak wo repomo mo de a vɔk cēng e rato mɛ a man na yɛ. A ga ros vit a tɛ̀ berugu, ko a sangal e lɔ wɛt sɛ̌ e tara de be lɛsɛ ɛ̀ bavîn bemat.

²⁸Sede a di Yɛsu, a pɛl sekun, ko a gaba e nuyel mɛ, a hwo gbɔ na gbɔng fwɔ, a ye, “À Yɛsu, Hwey Dagwi De A Dal Na Reto Mwa! Hwó simo sɛ́ na me arɛt? Ma sé ra won na hwo, hwo dura a me reyɔm wɛt!”

²⁹A ha ano, yaga Yɛsu a ga kana nɔ̂ng ceng o nu, ye nusu yi e ji mɛ. Zang pyak ceng o yá kana hwosom hɛ, ko mwa ano de bá rɔgɔs vɔ mɛ tanga bol mɛ na ngyang, ko bá tɛ̀ bemat be bɛrɛng hɛ, á kwɔrɔs ngyang o, ko ceng o yá gangas hɛ a kyè vɔk e hey.

³⁰Yɛsu a rangal hɛ, a ye, “Be tang o, à wà arɛt?” Ko mwat o a toyo a yɛ, a ye, “Be tang me, à Pyak.” A ha ano, yaga cēng pyak ya ga kana yel e ji mɛ.

³¹Cēng o ya ra won na Yɛsu, yɛ̀ a kwon pat yɛ̄ vɔk e revɔng de ra vɔk yɛnɛ wɛt.

³²Kwarâ bezà rwey o gwa losho hɛ bagat e hwomo, gwa sé re sehwey e vwâ raku. Ko cēng o ya ra won na Yɛsu, ka a tik yɛ̄ ye wɔ̀ yel e bezà mo, ko a tik yɛ̄.

³³Cēng o ya nusu yi e ji mwat o, ko ya wɔ̀ yel e ji bezà mo. Kwara mo mwa gwa hwo tele cidirang e vwak, gwa wɔ̀ gaba e gworep, ko nshi mo na vo gwɛ.

³⁴Sede bemât gyeng bezà mo ba di pyɛ de ya ga té, yɛn a jut setele, ko ba wɔ̀ shara há mo e ji repomo tanga bemajey arɔng.

³⁵Bemat ba nusu, na be wɔ̀ di pyɛ de ya ga té. Yɛn a vey na Yɛsu, ko yɛn a sɛ̀ mwat de cēng yá kana nu ɛ yi e ji mɛ e sangal e cât bol Yɛsu. A ga bang ɛ na berugu, ko nehywɛ mɛ arɔng na ga to ɛn. Ko yɛn mwa ba wok bengyip.

³⁶Vemo de bá kana di, yɛn a ha a bemat o gwong de Yɛsu a tɛ̀ mwat de a kana vɔk cēng tyang.

³⁷Ko mwa bemat yi e yɛnɛ̂ sevwêl BeGerasa ba ra won na Yɛsu, na a hàla kwɔn mɛn, yaga yɛn a wok bengyip sizɔng. Ko Yɛsu a yel e dwa-nshi, na a to ɛ.

³⁸Mwat de cēng ya nusu yi e ji mɛ a hwo ra won na yɛ, a ye, “Mê tɔk kyè tanga hwo arɛt?” Ko Yɛsu a tɛ̀ ɛ e gwong, a yang ɛ,

³⁹“Tō o vɔk e lɔ, na hwo wɔ̀ ha a bemat gbɔng pyɛ de Dagwi a ga ra a hwo.” Mwat o a kyè, ko a hwo shara e ji repomô mwa rehâ gbɔng pyɛ de Yɛsu a ga ra a yɛ.

⁴⁰Jeng de Yɛsu a to wɔ̀ wul gurâ gworep, regyɛng bemat ra sey ɛ, yaga yɛn mwa bá sè gyeng ɛ.

⁴¹Ko mwât nuyêl duk re fongol hwak de ba tang ɛ, à Yairus a hwo yi. A pom, a gaba e nuyêl Yɛsu, a ra won na yɛ, na a wɔ́ e lɔ mɛ,

⁴²yaga hwóng mɛ a wane gwining de a vɔk, ko ê dal wɛt. Hwóng mɛ mo a vɔk neshey sede kuru na nɛ neba. Sede Yɛsu a sé kyè, bemat ba ngyɔ hɛ e kawɛ bak.

⁴³Ko hwā hwak á sè e hwomo de á sè tak reyɔm na serɔ̂ telê nemi neshey kuru na nɛ neba, [á wey na mwa pyɛ́ de a vɔk e nelɔ bevwoshon,] ko vit a hwak de á tɔk tɛ̀ ɛ tyang.

⁴⁴Hwā mo a vey yi e bamâ Yɛsu, a ra nû gworugu mɛ, ko remo-remo, telê nemi mɛ mo ha tumal.

⁴⁵Ko Yɛsu a rangal, a ye, “E wà de a ra me ɛ?” Sede kawɛ mwat a tono, Bitrus a yang ɛ, “À Da, di bemât mwa ba gwɔrɔ hwo, ko yɛn a sé ngyɔ hwo!”

⁴⁶Ko Yɛsu a ye, “Mwat hwak a ga ra me, yaga ma tɔk, ba ga ra fwom na reto hom de me ra mɛ̀ pyɛ̂ bes.”

⁴⁷Jeng de hwā mo a di, a tɔk lɛrɛ tó mɛ wɛt, a wɔ́ na vôw rebek, ko a gaba e nuyêl Yɛsu. E hwomo e bayîs kawɛ mwat, a ha a yɛ pyɛ de ya tɛ̀, a ra ɛ, na gwong de a tɛ̀ tyang e ji jeng o.

⁴⁸Yɛsu a yang ɛ, “À hwóng hom, ba ga tɛ̀ o tyang, yaga hwà tɛ̀ gap mō e ra me, mê tɔk tɛ̀ o tyang. Kyè tyang kala!”

⁴⁹Jeng de Yɛsu a sé ha ano, mwat hwak a vey yi e lɔ Yairus, ko a yang ɛ, “Hwóng mo a ga tala hɛ; hwo ká hwo to nɔ̂ng Mwat Basa yɔ́m wɛt.”

⁵⁰Sede Yɛsu a wok ano, a yâng Yairus, “Nemi ne gaba a hwo e yey wɛt! Tɛ̀ gap mō e ra Dagwi zɔng, ko hwóng mo ê to sè naka!”

⁵¹Jeng de a pom e lɔ mo, a tik na mwat hwak a yel wɛt sɛ̌ Bitrus, na Yohana, na Yakɔp, tanga da na nêng hwong o.

⁵²Kawɛ mwat e hwomo a sé tosho na dâk sekun yaga rekû hwong o. Ko Yɛsu a yang ɛn, “Yin tosho wɛt! Hwōng o a ga ku wɛt, a sê nevwa zɔng!”

⁵³Yɛn mwa ba hwo shɛgɛsh hɛ, yaga yɛn a tɔk, a ga ku.

⁵⁴Ko Yɛsu a kaba hɛ na vwɔ, a yang ɛ, “Sogo, à hwong!”

⁵⁵Neken mɛ na to ɛn, ko a pere sogo. Ko Yɛsu a ha a yɛn, yɛn a nɔng ɛ pyɛ́ na a re.

⁵⁶Dâ hwong o na neng mɛ ba langat hɛn sizɔng, ko Yɛsu a nɔng ɛn nu, yɛn a ha a mwat hwak pyɛ de ya ga té wɛt.