Read berom Luka 9 Bible Online

Luka 9 - berom bible

Luka 9

¹Yɛsu a yishi bemât masâ fwom mɛ kuru na vɛ beba e dem hining, ko a nɔng ɛn reto na nu, na yɛn a paa cēng mwa, na yɛn a tɛ̀ nerɔ tyang arɔng.

²A tomo hɛn na be wɔ̀ shara rehâ Segwɔm Dagwi, na be tɛ̀sɛ vê serɔ tyang arɔng.

³Ko a yang ɛn, “Yin jut pyɛ cak yaga kwɛngɛl o wɛt. Yin vɔk gwele, kɛ malâ won, kɛ kpam-tuk, kɛ dyām wɛt; yin to gwɛ̌ gworugu gwohwak arɔng wɛt.

⁴Ko kahɛ lɔ de yin ê gyirik ɛ̀, sangal hin e lɔ mo sɛ̌ jeng de yin e ba sogo.

⁵Ko e kahɛ kwɔn de bemat o bê sey in wɛt, hàla hin repomo mo, na yin a pagat búm de gwa dyɛng e bol min. Hane hê sè túsa na yɛn!”

⁶E bama mo, bemât masâ fwom mɛ ba nusu, ko yɛn a kyě kyè e bemajêy mwa; ba kyě basa Yɛgɛt Yat, ko ba kyě tɛ̀sɛ bemat e kahɛ kwɔn tyang.

⁷Jeng de Herodes, yɛ gbɔng gwɔ̀m sevwêl Galili, a wok rehâ pyɛ̂ mwa de ye kyě té, a sé a yɛ kpɛɛ e ra yɛ̄ tyɔng wɛt, yaga bemat behak ba tē, ba ga to sene Yohana wo batisma yi e reku.

⁸Behak ba tē, Eliya a ga to nusu, ko behak kwong ba tē, a sé gwining e ji bezarap Dagwi vê raane de a to sé na neken.

⁹Ko Herodes a ye, “Yaa kukuuk! Ma ga tɛ̀ be tùt ratô Yohana. Ko e wɛ̌ mwat a womo de me wokos pyɛ́ yemo e ra yɛ̀ arɛt?” Ko a kyě ra begwong de ê di Yɛsu.

¹⁰Bemât masâ fwôm Yɛsu ba vɛ̄ hɛn, ko yɛn a ha a Yɛsu yɛnɛ̂ pyɛ́ de yɛn a ga ra. A jut ɛn, ko a kyè na yɛn zɔgɔ̂ hɛn vɔk e repomo rehak de be tâng rɛ, à Bet-Saida.

¹¹Jeng de bemat ba wok ano, yɛn a raa hɛ. A sey ɛn, ko a basa a yɛn rehâ Segwɔm Dagwi. A tɛ̀sɛ bemat tyang vemo de be simo be tɛ̀ ɛn tyang.

¹²Sede gwi gwa vey bagât gaba, bemât masâ fwom mɛ kuru na vɛ beba ba vey na Yɛsu, yɛn a yang ɛ, “Tɛ̀ bemat o e gwong, yaga na yɛn a kyè vɔk e nebapomo na nelɔ de na sé bagat, na yɛn a wɔ̀ jāma nekwɔn pɔlɔ tanga pyɛ̂ re, yaga kwɔn hemo ha sé vit a mwat.”

¹³Ko Yɛsu a toyo a yɛn, a ye, “Yin pyɛ min, nɔng in hɛn pyɛ cak na be re.” Yɛn a ye, “Kée kaà! Mwa pyɛ́ de wot a vɔk ya sé bāgat kpam-tuk batungun na betɔk beba, sɛ̌ hwó simo wot a wɔ̀ sey a bemat vemo mwa pyɛ̂ re arɛt?”

¹⁴Beras de ba sé e hwomo ba sé sede gu batungun (5,000). Ko Yɛsu a yâng bemât masâ fwom mɛ, “Tɛ̀ in bemat o na be sangal bagyɛng o bagyɛng o, ko karɛ mo re vɔk bemat sede kuru batungun (50).”

¹⁵Yɛn a ra ano, ko ba tɛ̀ bemat o mwa be sangal e vwel.

¹⁶Ano Yɛsu a jut bāgat kpam-tuk vane batungun tanga betɔk beba mo, a tɛ̀ bayis mɛ vɔk e lagwi, a feng a Dagwi yaga pyɛ́ mo, a hwo kwɔ́rɔs o, ko a nɔ̂ng bemât masâ fwom mɛ na be gas a bemat.

¹⁷Yɛn mwa ba re, ba siris. Bwang o gwa pɔl, ko bemât masâ fwom mɛ mo ba to sila sháp kuru na yɛ bya (12) na cɛ́k o de ya pɔl.

¹⁸Tuhak jeng de Yɛsu á sè ra won nju mɛ, bemât masâ fwom mɛ ba wɔ́ na yɛ. Ko a rangal hɛn, a ye, “Bemat be tē ma sé wà arɛt?”

¹⁹Yɛn a yang ɛ, “Behak be tē, hwà sé Yohana wo batisma; behak, Eliya; ko behak kwong be tē, hwà sé gwining e ji bezarap Dagwi vê raane de a sene yi e reku.”

²⁰Ko Yɛsu a to rangal hɛn, a ye, “Ko sɛ̌ yin ɛ̄, yin e tē ma sé wà arɛt?” Bitrus a toyo a yɛ, a yang ɛ, “Hwà sé Mwat de Dagwi a kasa na a sey bemat.”

²¹Ko Yɛsu a tusa hɛn, a nɔng ɛn nu, a yang ɛn, “Yin ha a mwat hwak há hemo wɛt!”

²²A to yang ɛn, “A sé gbing-gbing na Me de ma tɛ́ me mwat me di reyɔm pyak, ko bemakuk, na begbɔng bepiris, tanga bemât basâ Badu ba rɔda kyɛ́ ɛn me. Yɛn a rɔda mɔrɔ me, ko e tuk hê tat ba rɔda sene me yi e reku.”

²³Ko a ha a yɛn mwa, a ye, “Ka sede mwat hwak e simo na a raa me, gbing-gbing na yɛ a ye bam a tó mɛ, na a jut cɔ́gɔt-kak mɛ kahɛ tuk, na a raa me.

²⁴Yaga mwa mwat de e simo a sey neken mɛ a rɔda bidɛ nɛ; ko mwa mwat de a ye waa a neken mɛ, yaga e raa me, a rɔda sey nɛ.

²⁵Fwom o gwɛ a sɛ́, ka sede mwat a bensa pyɛ̂ mwa e jey, ko e yɛnɛ mo a bidɛ neken mɛ, kɛ a wey na nɛ arɛt?

²⁶Ka sede mwat a vo rekyen hom tanga rekyên reha hom, ko Me de ma tɛ́ me mwat ma rɔda ba vo rekyen mɛ jeng de mê ba vey na gbɔng nerat hom, tanga gbɔng nerât Da hom, tanga ne betom-lagwi vê jɛrɛ.

²⁷Mwin me ha a yin: Behak ba sé e tumal e ngamo de be ba kushu wɛt, sɛ̌ yɛn a ba di Dagwi a hwo re negwɔm e ra jey e ngyen.”

²⁸E bamâ nepɔlɔ sede rwit na há hane, Yɛsu a jut Bitrus, na Yohana, tanga Yakɔp, ko a kyè na yɛn vɔk e raku na a wɔ̀ ra won.

²⁹Jeng de a sé ra won, bwang bayis mɛ gwa hwo sege hɛ, ko berugu mɛ ba hwo pɛngɛ pes, ba nɛp sizɔng.

³⁰E ji jeng, bemat beba ba sé ha na yɛ; yɛn vɛ, à Mose na Eliya.

³¹Yɛn a nusu na gbɔng nerat ne lagwi, ko yɛn a sé ha na Yɛsu e ra gwông kwɛngɛl mɛ vɔk na bedabeda mɛ gwomo de a rɔda sila gwɛ e Yɛrusalɛm.

³²Bitrus tanga besa mɛ ba sé vos nevwa. Ko jeng de yɛn a sene wɛng-wɛng, yɛn a di gbɔng nerât Yɛsu, ko yɛn a to di bemat beba de ba sé e tumal tanga yɛ.

³³Sede bemat o ba sé kyè wɔ̀ tik Yɛsu, Bitrus a yang ɛ, “À Da, a sé naka de wot a sé e ngamo! Tik na wot a yong buk tat: Gwining yaga hwo, gwining yaga Mose, ko gwining o yaga Eliya arɔng.” Ko Bitrus pyɛ mɛ mwin a tɔk pyɛ de a sé ha wɛt.

³⁴Jeng de a rɔ̌ ha, rele ra yi, ra tɛ̀ necam e ra yɛn. Ko bemât masâ fwom o ba wok bengyip jeng de rele mo ra bang ɛn.

³⁵Ko fwɔ gwa hwo yi e ji rele mo, gwa ye, “Hwey hom a hemo de ma ga kasa hɛ! Wok in hâ hɛ!”

³⁶Jeng de fwɔ mo gwa tala hɛ, yɛn a to di Yɛsu e hwomo nju mɛ. Bemât masâ fwom mɛ mo ba tik pyɛ́ yane mwa e neyey mɛn; ko e negasi mo yɛn a ha a mwat hwak pyɛ cak e ra pyɛ de yɛn a ga kana di wɛt.

³⁷E nusu hwol, sede yɛn á sè gyirik yi e raku mo, gbɔng regyɛng bemat ra man na Yɛsu e gwong.

³⁸Mwat hwak e ji bemat o a hwo yila na gap, a ye, “À Mwat Basa! Gabɔk wɛt, di a me hwey hom, hɛ a hemo hining de ma vɔk!

³⁹Ceng ye hwosom hɛ hák, ko ye tɛ̀sɛ hɛ he dak sekun e jeng o, ye tɛ̀ cushu ye vos hɛ, sɛ̌ ha paa fulu yi e nu. Ye sǎ e de tak a hɛ reyɔm, ko ye hàla hɛ dey wɛt.

⁴⁰Ma ga ra won na bemât masâ fwom mō na be pat ceng o, ko ba tɔk pat yɛ wɛt.”

⁴¹Yɛsu a hanat, a yang ɛn, “À yin bemât jeng yemo de yin a tɛ̀ gap min e ra Dagwi wɛt, ko neyey min na sé gbarak! Mê sangal tanga yin, na me niri na yin vɔk e yɛ̌ jeng arɛt?” Ko a yâng dâ hwey o, “Vey na hwey mō mo e ngamo.”

⁴²Jeng de hwey o ha sé kyè wɔ na Yɛsu, ceng o ya bomo hɛ e vwel, ya tɛ̀ cushu ye vo hɛ. Ko Yɛsu a gyong ceng o, a tɛ̀ hwey o tyang, ko a to nɔ̂ng dâ hɛ hɛ.

⁴³Bemât mwa ba langat hɛn jeng de ba di gbɔng retô Dagwi. Jeng de bemat o ba rɔɔ langat hɛn kayɛ pyɛ de yɛ a ra, ko Yɛsu a ha a bemât masâ fwom mɛ, a yang ɛn,

⁴⁴“Wet in betong na pyɛ de me kyè wɔ̀ ha a yin! Ba rɔda nára Me de ma tɛ́ me mwat e vɔ bemat.”

⁴⁵Ko yɛn a tɔk pyɛ de Yɛsu a ha wɛt. Ba lɛrɛ a yɛn há mo, yaga na yɛn a tɔk wɛt. Ko yɛn a tɔk rangal hɛ arɔng wɛt, yaga yɛn a wok bengyip.

⁴⁶Ko bemât masâ fwôm Yɛsu ba hwo ra cuna e ji mɛn wɔgɔ, e wɛ̌ e ji mɛn de a dal na nerey arɛt?

⁴⁷Jeng de Yɛsu a tɔk báre mɛn, a jut hwey hak, ko a tɛ̀ hɛ he tumal e vwara mɛ.

⁴⁸A yang ɛn, “Kawɛ mwat de a sey hwey hemo e ji reza hom, a sé e me de yɛ a sey. Ko kawɛ mwat de a sey me, a sey womo de a tomo me arɔng. Yaga mwat de a dal na nesɛl e ji min mwa, e yɛ de a dal na nerey.”

⁴⁹Yohana a hwo ha, a yang ɛ, “À Da, wot a ga di mwat hwak á sè paa cēng e ji reza mō, ko wot a yang ɛ, yɛ a tik, yaga yɛ a sé e ji mot wɛt.”

⁵⁰Ko Yɛsu a yang ɛ, “Yin ro ɛ mɛ̀ wɛt, yaga mwat de a kyɛ́ ɛ hin wɛt a sé mwìn.”

⁵¹Sede jeng de bê jut Yɛsu vɔk e lagwi ya vey bagat, a tɛ̀ e yey mɛ na a kaba gwong vɔk e Yɛrusalɛm.

⁵²A tomo bemât masâ fwom mɛ na be tānga kyè e ra yɛ. Yɛn a sogo, ko ba wɔ̀ yel e ji kerepomo kehak ke bemât Samariya, na be yong a yɛ kayɛ pyɛ.

⁵³Ko bemât kerepomo mo ba simo be sey Yɛsu wɛt, yaga a kaba gwong vɔk e Yɛrusalɛm.

⁵⁴Jeng de Yakɔp na Yohana, beba e ji bemât masâ fwom mɛ, ba wok ano, yɛn a ye, “À Darwey, hwó simo na wot a yila kya yi e lagwi, na he gaba na he re ɛn arɛt?”

⁵⁵Ko Yɛsu a doyo vɔk na yɛn, a gyong ɛn.

⁵⁶Ano kwong, yɛn mwa yɛn a re nuyel vɔk e kerepomo kehak.

⁵⁷Sede yɛn á sè kyè e gwong, mwat hwak a hwo yâng Yɛsu, “Ma rɔda raa hwo vɔk e kahɛ kwɔn de hwô vɔk ɛ̀.”

⁵⁸Ko Yɛsu a toyo a yɛ, a ye, “Benɛ́t ba vɔk bavɔng mɛn, nenon arɔng na vɔk barɛngɛ mɛn; ko Me de ma tɛ́ me mwat ma vɔk kwɔn de mê dyɛng ɛ̀ na me pɔnglɔ wɛt.”

⁵⁹A yâng mwat hwak, “Raa me.” Ko mwat o a ye, “À Da, tik me, na me tānga wɔ̀ lɛrɛ da hom e ngyen.”

⁶⁰Yɛsu a toyo a yɛ, a yang ɛ, “Tik bavîn bemat be lɛsɛ bemɛn. Ko hwo, ci na hwo wɔ̀ shara rehâ Segwɔm Dagwi.”

⁶¹Mwat o hwak a yâng Yɛsu, “À Da, ma rɔda raa hwo. Ko tik na me tānga wɔ̀ yâng bemât lɔ hom kala e ngyen.”

⁶²Yɛsu a yang ɛ, “Mwat de a kaba ron na a how mɛ̀ cap, ko a sé bɛrɛng bama, yɛ a jam yaga fwôm Segwɔm Dagwi wɛt.”