Read berom Bare Badu 1 Bible Online

Bare Badu 1 - berom bible

Bare Badu 1

¹E ji bwok-basa gwomo, ba jɛk neha de Mose a ha a mwa BeIsrayɛl jeng de yɛn á rɔngɔl e rwa rak hê Rɔt Yɔrdan. Yɛn á sè e hêy nɛk rɔt o bagat na repomô Suf. Nɛk o wa sé e tê repomô Paran na bapomô Tɔfɛl, na Laban, na Hazɛrɔt tanga Di-Zahap.

²Ka sede be raa gwông berahwôl Ɛdɔm, a sé kwɛngɛl nepɔlɔ kuru na hɛ hining na be kyè yi e Raku Sinai vɔk e Kadɛsh Barneya.

³E shey kuru banaas bama de yɛn a hala sevwêl Misra e tuk hê mɛsɛng hê pwɛl gwô kuru na gwɛ gwining, Mose a ha a BeIsrayɛl o kayɛ pyɛ de Dagwi Darwey a kana nɔng ɛ nu, na a ha a yɛn.

⁴A ra ano e bama de a ga re Sihɔn, gbɔng gwɔ̀m BeAmɔr de a re negwɔm yi e repomô Hɛshbɔn, tanga Ɔk, gbɔng gwɔ̀m Bashan de a re negwɔm yi e bapomô Ashtarɔt na Edirey arɔng.

⁵A sè e yɛnɛ̂ sevwêl Mowap e rwa rak na Rɔt Yɔrdan de Mose á hwo misang a yɛn badu Dagwi. Mose hwo yang BeIsrayɛl:

⁶“Jeng de wot á sè e Raku Sinai, Dagwi Darwey, Dagwi mot á yang ot ngan, ‘Sángal min e ngamo ha ga vey ano.

⁷Vibis hin bǔk min, na yin re nuyel. Kyè in vɔk e vwêl BeAmɔr na hê BeKanaan, bemât vwara mɛn, yɛnɛ̂ bavwel o ha wuna nɛk Rɔt Yɔrdan, na vwêl beraku, na bak vwêl berahwol, na bak hêy gbingiring e rwa batin pere vɔk e bak kwogôm Gworep Tē, na berakû Lɛbanɔn pere vɔk e Gwɔrɔt Ɛifaratɛs.

⁸Vwel o hɛ à hemo mwa de mê nɔng in. Sogo hin, na yin wɔ̀ sey ɛ hɛ. E hɛ à vwel de me, Dagwi Darwey, ma sira a beda min, Abraham, na Yishak, tanga Yakɔp, na me nɔng ɛn tanga yere mɛn.’ ”

⁹Mose re nuyɛl, a ye: “Jeng de yin á rɔngɔl e Raku Sinai, má yang in, ‘Nedirîk kyé na yin na ga kat a me, mê tɔk ra a yin kayɛ pyɛ nju hom wɛt.

¹⁰Di in, Dagwi Darwey, Dagwi min a ga tɛ̀, yin a sé pyak sedesi sede netangacɛn e lagwi.

¹¹Ko tik na yɛ Dagwi wo bedabeda min a gwɛ̌ nepyak min zang gu rining. Tik na a tɛ̀ a yin nerat pyak, tyɛng na sira de á kana ra!

¹²Ko yi e rɛ̌ de me nju hom mê kyɛm me jut gbɔng nedirîk gas a yin shɔt ɛ?

¹³Kasa hin bemat behak yi e kayiyɛ yerê Israyɛl vemo de ba vɔk netsitsɛng na tɔk, vemo de ba ga tɔ́k ɛn na ragas badu. Ma rɔda tɛ̀ ɛn, be vɔk reto e ra yin.’

¹⁴“Yin a ga kana simo wɔgɔ, a sé naka na be ra ano.

¹⁵Yaga ano, ma jut bemât nuyêl yére min de ba vɔk netsitsɛng, ko ba ga tɔk ɛn na râ badu. Ma tɛ̀ ɛn, be vɔk reto e ra yin. Behak ba rɔda vɔk reto e ra bemat gu gu, behak e ra bemat naga naga, behak e ra bemat kuru batungun batungun, ko behak e ra bemat kuru kuru. Ano arɔng, ma tɛ̀sɛ bemât nuyêl fwom behak, na be ra fwom e ji yére min mwa.

¹⁶E jeng de ma tɛ̀sɛ hɛn e de tom o, ko ma myák ɛn, ma yang ɛn, ‘Wok in shɔ̄t de bemat min ba vɛ̀sɛ mɛ e ra bemɛn. Gas in badu e tē, kɛ ha mo ha sé e tê bemat min zɔgɔ mɛn, kɛ ha wuna hɛn na bemât yére dyuk de ba sangal e tē min ayi.

¹⁷Yin kwon dura simô to e yɛ̂t shɔ̄t o wɛt. Yɛrɛ hin a kawɛ mwat shɔt e gwong de gwa sé tyɛng, ko yin kasa mwat hwak wɛt, kɛ a ka sé darwey kɛ pwɛng ayi. Yin wok bengyip mwat hwak wɛt, yaga a sé e Dagwi de e sɛlɛ hin e de yɛ̂t shɔ̄t o. Ka sede shɔt cak ya dal gap min, tomo a me hin na yɛ, ko ma rɔda yɛrɛ yɛ.’

¹⁸“A sé e jeng jining o arɔng de ma myak in e ra bwang pyɛ́ de yin a rɔda ragas.”

¹⁹Mose a yâng BeIsrayɛl: “Ano kwong, wot á ra pyɛ́ de Dagwi Darwey, Dagwi mot á nɔng ot nu e ra yɛ. Wot á sogo yi e Raku Sinai, ko wot á kwey e vwel rey o hane de ha tɛnɛ hɛ tyɔng wɛt. Hey o ha sé pyɛ bengyip, ha dyɛng ano e gwong wɔ̀ sɛ̀ vwêl berahwôl BeAmɔr. Jeng de wot a wɔ̀ wul Kadɛsh Barneya,

²⁰ma yang in, ‘A remo wot a ga wul vwêl beraku BeAmɔr, hemo de Dagwi Darwey, Dagwi mot, a sé kyè wɔ̀ nɔng ot hɛ. E yɛ à Dagwi de bedabeda mot ba re a yɛ fongol arɔng. Di in vwel o, á heere. Kyè in, na yin wɔ̀ sey ɛ hɛ, na he tɛ́ ɛ min tyɛng na nu de Dagwi a ga nɔng in. Yin kwon tó yey, kɛ yin tɛ̀ bengyip wɛt.’

²¹

²²“Ko yin á vey na me mwa hin, yin á ye, ‘Tik wot tomo bemat behak e ngyen, na yɛn a wɔ̀ bɛrɛng a wot nezɛɛ̀t hɛ. Tik yɛn a vey ha a wot begwong de ba dal naka wot kwey ɛ, tanga yerê bagbɔng bapomo de bemat o ba vɔk.’

²³“Ma di, vô du mo ha sé a me rat, ko ma kasa bemat kuru na vɛ beba, gwining yi e kayɛ yere.

²⁴Yɛn a hwo kyè vɔk e vwêl beraku mo pere vɔk e Nɛk Ɛshkɔl, ko yɛn a bɛrɛng hɛ yɛɛlɛl.

²⁵Jeng de yɛn a toyo, ko yɛn a vɔk a wot ɛ nèy cɔ́gɔt de yɛn a sɛ̀ e hwomo. Yɛn a ha a wot wɔgɔ, vwel de Dagwi Darwey, Dagwi mot a sé nɔng ot ha sé rat.

²⁶“Ko yin a ra retek na nu de Dagwi Darwey, Dagwi min, a nɔng in. Yin a kyɛ́ in nà wɔ̀ yel e vwel o.

²⁷Yin a gwɔrɔng e ji min, yin a tē, ‘Dagwi Darwey e bɛrɛng hot ves! A pat ot yi e Misra, na a vey nára hot e vɔ BeAmɔr vemo, yaga na yɛn a bin mɔbɔs hot.

²⁸Yaga sɛ́ de wot ê wɔ ɛ? Wot e wok bengyip mɛn. Bemat de wot a tomo, na be wɔ̀ bɛɛ a wot nezɛɛt vwel o ba vey ha a wot wɔgɔ, bemat vane mo ba dal ot na gap, na nelis mwa arɔng. Yɛn a sé sangal e bagbɔng bapomo de ba gwɔsɔ vɛ na bejwâ-pomo de ba wɔ̀ wul larwak e nelis. Ano arɔng, bemat de ba sé e hwomo ba sé berey o tyɔng wɛt!’

²⁹“Ko ma ha a yin, ma yang in, ‘Yin wok bengyip bemat o ko tyɔng wɛt!

³⁰Dagwi Darwey, Dagwi mot a rɔda kyè e nuyel mot. A rɔda tó a wot como na yɛn, tyɛng sede remo de wot á di de á ra yaga wot e Misra.

³¹Ko yin a tɔk, Dagwi a kyè na wot e hey vey e ngamo tyang, tyɛng sede remo de da e kyè na hwey mɛ tyang.’

³²Ko mwa ano, yin a kyɛ́ in nà tɛ̀ gap min e ra Dagwi Darwey,

³³yɛ de e dopse kyè e nuyel mot, na a jama a wot kwɔn rat de wot ê ye ɛ ngyɔk. E kyesem e nuyel mot e ji rele nagwi, na a dura a wot gwong de wot ê kwey ɛ, ko rele mo re lolo kya nabwalak.”

³⁴Mose a yâng BeIsrayɛl: “Dagwi Darwey a wok gwɔrɔng min, a tɛ̀ shom, ko a hanat siitit, a ye,

³⁵‘À yin bemât zamang ves hemo, vit a hwak e ji min de ê wɔ̀ yel e vwel rat hemo de ma ga kana sira na me nɔ̂ng bedabeda min hɛ.

³⁶E Kalɛp Yɛfunɛ zɔng de ê yel ɛ. Yɛ e raa me na tsak o, ko ma rɔda nɔ́ng ɛ, yɛ na yere mɛ, vwel hemo de yɛ a ga wɔ̀ bɛrɛng nezɛɛ̀t hɛ.’

³⁷A sé yi na negwɔn min o de Dagwi Darwey a tɛ̀ shom na me arɔng, ko a yang me, ‘Di hwo mwa, à Mose, hwà rɔda yel e vwel o wɛt.

³⁸Ko Yɔshuwa Nun, mwât sɛlɛ mo ê yel e hɛ. Tik na hwo gwɛ̌ a yɛ gap e ji fwom mɛ, yaga e yɛ de ê kyè na BeIsrayɛl, na be wɔ̀ sey ɛ vwel o.’

³⁹“E bama mo, Dagwi Darwey a yang ot mwa hot, ‘Yin a ye, bemât repugu min bê sey nèy min de na rɔngɔl nesɛl o, nemo de né tɔk gas pyɛ́ ryat na vyes wɛt e ngyen, ko ma ye, e nɛ de nê de ba yel e vwel o. Ma rɔda nɔ̂ng nɛ vwel o, ko yɛn a rɔda sangal e ji hɛ.

⁴⁰Ko yin ke, doyo hin, na yin a to in vɔk e hey, na yin a kyè vɔk e bak Gworep Sere.’

⁴¹“E tuk o, yin a toyo a me, yin a ye, ‘Wot a ga ra a Dagwi Darwey banɛn. Ko di, wot a ga yóng ot a remo, na wot wɔ e vwel o, na wot hwo ɛn na como, sede remo de Dagwi Darwey, Dagwi mot a nɔng ot nu.’ E bama mo kawɛ e ji min a hwo jut pyɛ̂ como mɛ. Yin e bare, a rɔda sè a yin begelek, na yin wɔ̀ hwo bemât vwêl beraku mo na como.

⁴²“Ko Dagwi Darwey a yang me, ‘Tusa hɛn gak, yɛn a wɔ̀ hwo ɛn wɛt. Ma rɔda sè na yɛn wɛt, ko bemât repugu mɛn bê ré ɛn.’

⁴³“Ma ha a yin tyɛng pyɛ de Dagwi Darwey a ha, ko yin a tɛ̀ tong na hɛ wɛt. Yin a sogo a yɛ na nehywɛ. Yin a sogo vɔk e vwêl beraku mo, yaga yin a bare, yin a vɔk gâp tô como na yɛn.

⁴⁴Ko BeAmɔr de ba sangal e beraku mo ba nusu sede shok vey sɛ̀ in. Yɛn a re in na como e hwomo e vwêl beraku Ɛdɔm, ba ro in pere vɔk e Hɔrma.

⁴⁵Jeng de yin a toyo, yin a tosho a Dagwi Darwey, na a sɛlɛ hin, ko a wok in wɛt, a tɛ̀ tong na yin arɔng wɛt.”

⁴⁶Mose a re nuyel, a ye: “E bama de wot a ga ros e de sangal e Kadɛsh,