Read berom Bare Badu 10 Bible Online

Bare Badu 10 - berom bible

Bare Badu 10

¹Mose a re nuyel, a ye: E bama mo, “Dagwi Darwey a to yang me, ‘Yong beta bagasak behak beba tyɛng sede ve mɛsɛng o, ko hwo yong kundung cɔgɔt, na hwo tik ɛ vɛ e ji mo. Tūt vey na me e ra raku.

²Ma rɔda to jɛk e ra vɛ pyɛ de má kana jɛk e ra vere de hwá mɔbɔs. Ko hwà rɔda tik vɛ e ji kundung o.’

³“Ma hwo yong kundung na cɔgɔ̂t tîn rɔgɔ, ma yong beta bagasak beba tyɛng sede ve mɛsɛng o, ko ma tút vɔk e ra raku mo.

⁴Dagwi Darwey a hwo jɛk e ra vɛ, neha nining de á kana jɛk e ra ve mɛsɛng o. Nɛ à Badu Kuru de á nɔng in jeng de á ha na yin yi e ji kya, tuk de yin á kana tula hin e nuyel mɛ e raku mo. E hwomo, Dagwi a nɔng me beta bagasak o,

⁵ko ma gyirik mɛ. Ma tik vɛ e ji kundung de ma ga yong sede remo de Dagwi Darwey a ha, ko ba sé e ji gwɛ yimo yi e tuk hane mo.”

⁶Mose a re nuyel, a ye: “E bamâ jeng, wot a hwo sogo yi e kwɔ̂n ye ngyɔk de ha vɔk ɛ hes ve bemât Yaakan, ko wot a kyè vɔk e Mosera. Aharon a ku e hwomo, ba lɛrɛ hɛ, ko hwey mɛ Ɛlɛyazar a jut fwom mɛ gwô piris.

⁷Yi e hwomo, wot a kyè vɔk e Gudgoda, ko ba to re nuyel vɔk e Yɔtbata, kwɔn de ha vɔk ɛ nshi polos.

⁸“E bama de ma tɛ̀ beta bagasak vane e ji kundung o, Dagwi Darwey, á tik bemât yerê Levi jaram, na be ra tom vemo, vɛ à: Be hashe Kundung Wuna-na-Sira, na be ra fwôm bepiris mɛ, ko be tɛ̀ a bemat nerat e ji reza mɛ. Tom á vemo de BeLevi ba sé rɔɔ ra.

⁹A sé yaga ano de ba nɔ̂ng BeLevi mo vwel mɛn sede bwang yére Israyɛl wɛt. Numo mɛn hɛ a nerat de yɛn e sɛ̀ yi na ra a Dagwi Darwey fwôm bepiris mɛ tyɛng sede remo de á kana sira a yɛn.”

¹⁰Mose a re nuyel, a ye: “Jeng de ma to tut na beta bagasak o, ma sangal e raku mo nepɔlɔ kuru banaas nagwi na nabwalak, sede remo de má kana ra e mɛsɛng o. Dagwi Darwey á to wok won hom, ko á simo, ê to wey na yin wɛt.

¹¹Ko á yang me, me toyo na me kyè na yin yaga na yin a bin sey ɛ vwel de a ga kana sira a bedabeda min, na he sè nap mɛn.”

¹²Mose a re nuyel, a ye: “À yin, BeIsrayɛl, e sɛ́ de Dagwi Darwey, Dagwi min e jama yi na yin ɛ? E simo, yin sap ɛ, yin ra pyɛ́ mwa de a nɔng in nu e ra yɛ, yin tɛ̀ yey na yɛ, na yin ra a yɛ fwom na yey min na simo min mwa.

¹³Gyeng in mwa badu mɛ de ma sé nɔng in vɛ yunung. Rá in ano, ko kayɛ pyɛ yê se a yin naka.

¹⁴“Lagwi de wa dal e rak o mwa, na jey tanga pyɛ́ de ya sé e ji yɛ mwa ya sé yê Dagwi Darwey, Dagwi min.

¹⁵Ko e bedabeda min de a tɛ̀ yey na yɛn, a simo na yɛn a se bemɛ. Yaga ano de á kasa hɛn e ra bwang yére bemat behak, ko pere vey e remo yin a sé rɔngɔl bemat mɛ.

¹⁶“Bare hin na wuna-na-sira de Dagwi a ra na yin, ko yin re nuyel na negbarak wɛt.

¹⁷Dagwi Darwey, Dagwi min a dal mwa cī na reto ding-ding, ko a dal mwa bedarwey. A vɔk gbɔng reto sizɔng, ko be wok bengyip mɛ. E dura kasâ bemat wɛt, e sey pyɛ bâng nu wɛt arɔng.

¹⁸E gyepes nehyɛn tanga bekuma, e simo bemât yére dyuk de ba sé sangal na bemat mot, ko e nɔngɔs hɛn pyɛ̂ re na berugu.

¹⁹Yaga ano, simo hin bemât yere dyuk o, yaga yin á sè bemât yere dyuk e Misra arɔng.

²⁰“Sap in Dagwi Darwey, Dagwi min, ré in a yɛ nju mɛ zɔng fongol. Sè in pang na yɛ nju mɛ, ko yin sira na reza mɛ zɔng.

²¹Somo hin hɛ, yɛ à Dagwi min, yaga yin a ga bɛrɛng gbɔng tomong mɛ ve bengyip de a ga ragas yaga yin.

²²Jeng de bedabeda min bá wɔ́ e Misra, yɛn á sè bemat kuru bataama zɔng. Ko a remo, Dagwi Darwey, Dagwi min a ga tɛ̀, yin a tɛ́ in pyak sede netangacɛn e lagwi.”