Read berom Bare Badu 11 Bible Online

Bare Badu 11 - berom bible

Bare Badu 11

¹Mose a yâng BeIsrayɛl: “Tɛ̀ in yey na Dagwi Darwey, Dagwi min, na yin gyeng badu mɛ mwa kayɛ jeng.

²Yunung a sé e nèy min de me ha na nɛ. Nà ga di kɛ na tɔk pyɛ́ de Dagwi Darwey, Dagwi min a ga ra wɛt. Ko me ha na yin de yin a ga di nerey mɛ na gbɔng reto mɛ tanga gap mɛ.

³Yin a di pyɛ̂ langat na pyɛ̂ bes de a ra a gbɔng gwɔ̀m Misra na vwel mɛ mwa.

⁴A wey na bemât como mɛn, mwa na bedwa mɛn, na bekyɛkyɛ̂ bedwa mɛn de ba ye pyɔp mwa e ji Rep Sere jeng de yɛn á sè ro in. Ko pyɛ́ yane ya ga kwɔrɔ BeMisra pere vey e remo.

⁵“Yin a di pyɛ de Dagwi Darwey a ra yaga yin e hey gyam na yin a vey wul e ngamo.

⁶Bare hin na pyɛ de a ra a Datan na Abiram, nèy Ɛliyap wo yerê Rubɛn. E bayîs mwa bemat de ba sé e hwomo, vwel ha wunta hɛ, ko ha wɔlɔk hɛn mwa na belɔ mɛn, na bǔk mɛn, na bemât fwom mɛn tanga yas mɛn.

⁷Ey, a sé e yin de yin a ga bɛrɛng pyɛ́ ryey yemo mwa de Dagwi Darwey a ga ra.”

⁸Mose a re nuyel, a ye: “Bwang o tyɔng yin ê ye dɔ a Rɔt Yɔrdan. Ka sede yin ê gyeng kayɛ pyɛ de ma ga nɔng in nu e ra yɛ yunung, yin a rɔda vɔk gâp sey ɛ sevwel de yin a sé kyè wɔ̀ yel na yin a sangal ɛ.

⁹Vwel a hemo de Dagwi Darwey a sira na a nɔ̂ng bedabeda min na yin, yére mɛn. Ko yin a rɔda ros e vwel o de ha siri ko ha nɔngɔs pyɛ́ shɛrɛk.

¹⁰Vwel de yin a sé kyè wɔ̀ sey ɛ, ha sé sede vwêl Misra de yin á sangal ɛ raane wɛt. E hwomo, jeng de yin á tus pyɛ̂ yeneng, yin á ragas fwom pwep e de tɛ́sɛ a yɛ nshi.

¹¹Ko vwel de yin a sé kyè wɔ̀ yel ɛ, ha sé vwêl berahwol na benɛk, ko hɛ sɛsɛm rwak naka.

¹²A sé e Dagwi Darwey, Dagwi min de e bɛrɛng vwel o, ko e gyeng hɛ kayɛ jeng yi e susû shey vɔk e yɛnɛ̂ hɛ.

¹³“Ka sede yin ê gyeng badu de ma sé nɔng in vɛ yunung naka, na yin tɛ̀ yey na Dagwi Darwey, Dagwi min, na yin a ra a yɛ fwom na yey min na simo min mwa,

¹⁴ko a rɔda tomo a yin na rwak e vwel o kayɛ jeng de be simo wɛ, nabolos tanga naswigi. Ano de yin ê sɛ̀ pyɛ̂ yeneng, na nshî anap, na něy pwat yaga yin pyɛ min,

¹⁵tanga sehwey yaga yas min arɔng. Yin a rɔda vɔk mwa pyɛ́ de yin e simo.

¹⁶“Ko tē in naka, bemat behak be kwɛlɛng hin na yin a nɔ̂ng Dagwi Darwey ma wɛt. Yin re a cī fongol, na yin a ra a yɛ fwom wɛt.

¹⁷Ka yin a ra ano, Dagwi Darwey a rɔda vo shom na yin, ko a ro a yin na rwak. Vwel o ha rɔda hworok, yin ê sɛ̀ pyɛ́ wɛt, ko yin ê kushu, yin ê tala hin dey-dey e vwel rat de Dagwi Darwey a nɔng in.

¹⁸“Vɔk in badu vemo de ma sé nɔng in e yey min na yin a bare na vɛ. Jɛk in vɛ, na yin a rɔgɔs vɛ e bègasɔ min tanga e batili min, na yin a dopse bare na vɛ.

¹⁹Basa hin a nèy min vɛ. Yin dopse ha e ra vɛ kayɛ jeng, jeng de yin a sé e lɔ, na jeng de yin a sé e jey, jeng de yin a sé kyè wɔ dyɛng na jeng de yin a sene arɔng.

²⁰Jɛk in vɛ e ra sesêk ri duk min tanga e ra ri rùhup bapomo min arɔng.

²¹Yi ano, yin na nèy min yin a rɔda ros e ji sevwel de Dagwi Darwey, Dagwi min a ga sira na a nɔ̂ng bedabeda min. Yin a rɔda nàra e hwomo vɔk e yɛnɛ̂ jey.

²²“Gyeng in kayɛ pyɛ de ma nɔng in nu e ra yɛ naka, tɛ̀ in yey na Dagwi Darwey, Dagwi min, na yin sè pang na yɛ, ko ra in kayɛ pyɛ de e simo.

²³Ka sede yin a ra ano, a rɔda ro yére bemât jey yane e nuyel min, mwa ano de ya dal in na nerey na gap, ko yin a rɔda sey ɛ vwel o.

²⁴Kahɛ kwɔn de tas bol min ba rɔda bɔrɔ ha rɔda tɛ́ ɛ min. Yɛnɛ̂ sevwel min hê sè yi e hey e rwa batin vɔk e berakû Lɛbanɔn e rwa bato, yi e Gwɔrɔt Ɛifaratɛs e rwa rak vɔk e Gworep Tē e rwa ta.

²⁵Vit a mwat de ê ra retek na yin. Kahɛ kwɔn de yin a wɔ́ ɛ e sevwel o, Dagwi Darwey, Dagwi min a rɔda tɛ̀ bemat o be vɔk bengyip min, tyɛng sede remo de a ga kana sira.

²⁶“Di, yin yunung yin ê tɔk kasa nerat kɛ gawey.

²⁷Yin a rɔda sɛ̀ nerat, ka sede yin a gyeng badu Dagwi Darwey, Dagwi min vemo de ma sé nɔng in yunung.

²⁸Ko ka sede yin a kyɛ́ in nà gyeng badu mo, na yin a hala gwong de ma sé dura a yin, na yin a hwo re a cī fongol, cī yemo de ya ga sang ra a yin pyɛ cak wɛt, ano de gawey hê hwo e ra yin.

²⁹E bama de Dagwi Darwey a vey na yin e ji vwel de yin a sé kyè wɔ̀ sey ɛ hɛ, na yin a sangal ɛ, tik na yin a mok rehâ nerat o yi e ra Raku Gɛrizim, ko rehâ gawey o yi e ra Raku Ɛbal.

³⁰Beraku beba vemo ba sé e rwa ta na Rɔt Yɔrdan, e yɛnɛ̂ sevwel de BeKanaan ba sé sangal ɛ a remo e nɛk rɔt o. Beraku mo ba sé vɔk e rwa tâ gwong bagat na cɔ́gɔt ouk yê More, bagat na repomô Gilgal.

³¹Yin a vey bagât ye dɔ à Rɔt Yɔrdan, na yin a sey ɛ vwel de Dagwi Darwey, Dagwi min a sé nɔng in. Jeng de yin a sangal e ji hɛ,

³²tē in naka na yin a gyeng mwa badu de ma sé nɔng in vɛ yunung.”