Read berom Bare Badu 12 Bible Online

Bare Badu 12 - berom bible

Bare Badu 12

¹Mose a yâng BeIsrayɛl: “Badu ma vemo de yin a rɔda gyeng vɛ mwa jeng de yin a sé sangal e ji sevwel de Dagwi Darwey, Dagwi wo bedabeda min a sé kyè wɔ̀ nɔng in. Wok in vɛ naka!

²“Yére bemat de ya sé sangal e vwel de yin a sé kyè wɔ sey ɛ mo, ye re a cī fongol. Ano, e bama de yin a re vwel o, wey in na mwa nekwɔn rê fongol mɛn o, kɛ na sé e beraku kɛ berahwol, kɛ e nɛ̂n cɔ́gɔt de ya vɔk berang pyak ayi.

³Gangas hin begagbang nása nɔrɔ̂ yas vɔk na cī mɛn, mɔbɔs hin beta de ba tɛ̀ vɛ cik, rangas hin sesêk Ashera, ci hwā mo, na yin a tow pyɛ̂ sekwit mɛn arɔng. Yin tɛt ɛ pyɛ cak de yê bare a yin na cī mo wɛt.

⁴“Yin masa yére bemât vwel o, na yin re a Dagwi Darwey, Dagwi min fongol e nekwɔn detidetu wɛt.

⁵Ko yin ê kyese e kwɔn hining zɔng de ê kasa e yɛnɛ̂ vwel hê yére min cak. Kwɔn a hane de ê simo na a sangal ɛ.

⁶E hwomo, yin a rɔda nása nenɔrɔ̂ yas burang tanga bwang nenɔrɔ. E hwomo arɔng, yin ê vey na pyɔlɔ min, na pyɛ́ de yin a ga sira na yin a nɔ̂ng Dagwi Darwey nɔrɔ̂ yɛ, na nɔrɔ̂ yey pyɛng min, mwa na nèy ne mɛsɛng ne berɔndɔng na vyēl min.

⁷E hwomo, e nuyêl Dagwi Darwey, Dagwi min de a ga tɛ̀ nerat mɛ e ra yin, yin mwa na belɔ min yin a rɔda re, na yin wok netâ pyɛ́ ryat de yin a ga ra fwom yaga yɛ.

⁸“Yin ê to ra pyɛ́ de yin a ga tɔ́k in e de ra mo wɛt. Pere vey e remo, mwa hin yin e re a Dagwi fongol e begwong de yin a di ba jam a yin zɔng.

⁹Yin a rɔngɔl nà yel e vwel de Dagwi Darwey, Dagwi min a sé nɔng in nap hɛ, kwɔn de yin a rɔda sangal ɛ e ji netyang.

¹⁰Ko jeng de yin a ye dɔ à Rɔt Yɔrdan, Dagwi Darwey a rɔda tik in, yin a sey ɛ sevwel o. A rɔda gyep in yi e vê repugu min mwa, ko yin a rɔda sangal tyang.

¹¹Ano kwong, a sé gbing-gbing yin vey a yɛ e kwɔn de ê kasa, na kayɛ pyɛ de ma nɔng nu e ra yɛ, yɛ à nenɔrɔ̂ yas burang tanga bwang nenɔrɔ, na pyɔlɔ min, tanga pyɛ́ de yin a ga sira na yin a nɔng ɛ.

¹²E hwomo, e kwɔn de Dagwi Darwey, Dagwi min a kasa, yin ê vɔk yey pyɛng, yin na nèy min, na besam min, beras na beha. Rini hin BeLevi arɔng de ba sɛ́ sangal e bapomo min, yaga yɛn a vɔk benap e vwel o wɛt.

¹³“Tē in naka, yin kwon nása nenɔrɔ min e kahɛ kwɔn de yin a kasa zɔng wɛt.

¹⁴Nása hin nɛ e kwɔn hining zɔng de Dagwi Darwey ê kasa e yɛnɛ̂ vwel hê yere min cak. A sé e hwomo zɔng de yin a rɔda ra ɛ kayɛ pyɛ de ma nɔng in nu e ra yɛ.

¹⁵“Ko di, yin a rɔda tɔk yɛt yas min, na yin a re e kahɛ kwɔn de yin a sangal ɛ. Yin ê tɔk re neyɛnɛ̂ yas de Dagwi Darwey ê nɔng in. Mwâ hin, kɛ yin a sé haalal kɛ ligis ayi, yin ê tɔk re yɛ, tyɛng sede remo de yin a sé re banamâ ròs kɛ vow ayi.

¹⁶Ko yin re nemî yɛ wɛt. Losho hin nɛ e vwel sede nshi.

¹⁷“Yin re pyɛ́ de ba tik jaram yaga Dagwi Darwey e nekwɔn sangal min wɛt, kɛ pyɛ́ mo ya sé pyɔlɔ̂ pyɛ̂ hiri, kɛ nshî anap, kɛ něy pwat min, kɛ nèy ne mɛsɛng ne berɔndɔng na vyēl min, kɛ nɔrɔ̂ pyɛ́ de yin a ga sira na yin a nɔ̂ng Dagwi Darwey yɛ, kɛ nenɔrɔ̂ yey pyɛng min, kɛ kahihɛ nɔrɔ ayi.

¹⁸Yin na nèy min, na besam min tanga BeLevi de ba sé sangal e bapomo min ba rɔda re pyɛ́ mo e nuyêl Dagwi Darwey, Dagwi min e kwɔn de ê kasa. Ré in na yin wok netâ pyɛ́ ryat de yin a ga ra fwom yaga yɛ.

¹⁹Ko yin tik nà bare na BeLevi mwa jeng de yin a sé sangal e vwel min o wɛt.

²⁰“Jeng de Dagwi Darwey a gwɛ̌ a yin neyɛnɛ̂ vwel o, sede remo de a ga sira, yin a rɔda tɔk re banama kayɛ jeng de yin a simo.

²¹Ka sede kwɔn hining hê re a Dagwi fongol ha sé yikyik yi na yin, ko yin ê tɔk yɛt behak e ji berɔndɔng kɛ vyēl de Dagwi Darwey a nɔng in na yin a re, e nelɔ min, sede remo de ma ga kana ha a yin.

²²Kawɛ mwat, kɛ a sé haalal kɛ ligis ayi, a rɔda tɔk re banama mo, tyɛng sede remo de e re vê ròs kɛ vow ayi.

²³Yin kwon re banama mo de nemi nè sè rɔngɔl e ji vɛ wɛt, yaga nekên pyɛ na sé e ji nemi, ko yin re nekên pyɛ mo e ji renama wɛt.

²⁴Yin re nemi sede pyɛ́ wɛt, ko losho hin nɛ e vwel sede nshi e negya.

²⁵Ka sede yin a gyeng redu remo, Dagwi Darwey a rɔda vɔk yey pyɛng na yin, ko kayɛ pyɛ ya rɔda kyè a yin na yére min naka arɔng.

²⁶“Ko pyɛ̂ nɔrɔ min tanga nenɔrɔ de yin a ga sira na yin a nɔ̂ng Dagwi Darwey yɛ, kyè in na yɛ vɔk e kwɔn de e simo be re a yɛ ɛ fongol.

²⁷Jeng de yin ê nára nɔrɔ̂ yas burang, yin ê rangas nama mo mwa na nemi mo e ra gàgbang rangâs yas vɔk na Dagwi Darwey. Ko na nɔrɔ̂ wunâ nesa, losho hin nemi mo e ra gàgbang rangas o, ko yin re banama mo.

²⁸Gyeng in kayɛ pyɛ de ma ga nɔng in nu e ra yɛ, ko kayɛ pyɛ ya rɔda kyè a yin na yére min naka nesheneshey, yaga yin a sé ra pyɛ de ya sé tyɛng, yemo de ye pɛngɛ a Dagwi Darwey, Dagwi min yey.”

²⁹Mose a re nuyel, a ye: “Dagwi Darwey, Dagwi min a rɔda wey na yére bemât vwel o jeng de yin a hwo como na yɛn, ko yin a rɔda sey ɛ hɛ, yin sangal ɛ.

³⁰E jeng o, tē in naka yin raa negwɔn rê fongol mɛn wɛt, yaga nê sè a yin rwik e fwɔ. Yin jama na yin tɔk begwong de yɛn a re a cī mɛn fongol, yaga na yin raa gwɛ wɛt.

³¹Yin re a Dagwi Darwey, Dagwi min fongol e begwong de yɛn e re a cī mɛn fongol wɛt. Yɛn e ra mwa pyɛ́ de ya sé a yɛ byɛm-byɛm, yemo de e kyɛ́ ɛ tyɔng wɛt wɔgɔ, yɛn e nása nèy mɛn nɔrɔ̂ rangas burang yaga cī mɛn.

³²Rá in kayɛ pyɛ de ma nɔng in nu e ra yɛ. Yin gwɛ̌ pyɛ cak e ra yɛ kɛ yin tɛt pyɛ cak arɔng wɛt.”