Read berom Bare Badu 13 Bible Online

Bare Badu 13 - berom bible

Bare Badu 13

¹Mose a re nuyel, a ye:“Kɛ gyeng, tuhak zarap Dagwi wo bɔs, kɛ mwat de e ra fwom na negwi de a ranas ê vey. Ê ra pyɛ langat kɛ pyɛ bes cak, na a tɛ̀ in, yin hwo sap cī yére dyuk ko yin re a yɛ fongol, cī yemo de ya ga sang ra a yin pyɛ cak wɛt.

³Yin tɛ̀ tong na ha mɛ mo wɛt. Dagwi Darwey, Dagwi min a sé ra fwom na mwat o na a mara hin mɛ, na a di kɛ yin a tɛ̀ yey na yɛ na yey min na simo min mwa arɛt.

⁴Raa hin Dagwi Darwey nju mɛ zɔng, sap in hɛ arɔng. Wok in ha mɛ, na yin a gyeng Badu mɛ. Ré in a yɛ fongol na yin a se pang na yɛ.

⁵E yɛ de a viri hin yi e sesam, na a nusu na yin yi e Misra. Ka sede zarap kɛ mwât ranas negwi a tɛ̀ in, na yin a gas in na Dagwi Darwey, Dagwi min, na yin a tik raà gwong mɛ, gbing-gbing be mɔrɔ mwat o, yaga a sé mwat vwes. Yi ano, yin a rɔda pat neves nemo yi e tē min.

⁶“Kɛ gyeng, tuhak gwà mō, kɛ hwey mō wen kɛ hwong, kɛ hwā mō de hwà tɛ̀ yey na yɛ, kɛ sâ yey mō a ha a hwo yaang, ‘Wot re a cī fongol.’ Yɛn e simo tɛ̀ in na yin sap cî bemât yére dyuk de bê gwɔrɔ hin bagat kɛ yikyik ayi, mwa ano de cī mo ya ga sang ra a yin kɛ bedabeda min pyɛ cak wɛt.

⁸Hwo tik ɛ a kwɛlɛng hwo, kɛ hwo ka wet betong na ha mɛ mo wɛt. Hwo wok nemwishish mɛ, kɛ a sè a hwo rìishish na yɛ wɛt, hwo gyep ɛ arɔng wɛt.

⁹Mɔrɔ mwat o! Hwo tānga hwo tó ɛ na beta gyam na bwang bemat be de raa hwo.

¹⁰Tó in hɛ na beta na yin mɔrɔ hɛ! A ga kana tē ngyɛ́k na a gas o na Dagwi Darwey, Dagwi mō, de a nusu na yin yi e sevwêl Misra, kwɔn de yin a sè ɛ besam.

¹¹Ano kwong, mwa BeIsrayɛl bê wok pyɛ de ya ga té. Yɛn ê tɛ̀ bengyip, ko hwak ê sang to ba ra yerê pyɛ vyes yemo wɛt.

¹²“Kɛ gyeng, tuhak yin ê wok, e repomo rehak e ji vemo de Dagwi Darwey, Dagwi min a sé nɔng in vɛ,

¹³bemat beves behak min ba ga kwɛlɛng bwang bemât repomo mo na be re a cī fongol, mwa ano de cī ya ga sang ra a yin pyɛ cak ryat wɛt.

¹⁴Ngyɛgɛt hin ha mo yɛɛlɛl. Ka sede yin a sè, bemat o ba ga ra pyɛ byɛm-byɛm o mwin,

¹⁵ko mɔbɔs hin mwa hɛn na yas mɛn. Wey in na repomo mo mwa vit.

¹⁶Vey in na pyɛ̂ nedanerey yê bemat o, ko yin tula yɛ e dura. E bama mo, yin tɛ̀ kya e repomo mo na kayɛ pyɛ de ya sé e ji rɛ sede pyɛ̂ nɔrɔ de be rangas a Dagwi Darwey, Dagwi min. Yin a rɔda hala repomo mo e barin nesheneshey, be sang to lɔk rɛ wɛt.

¹⁷Yin kwon vɛ a bato min pyɛ cak de ba nɔng nu, yin wey na yɛ. Yi ano, Dagwi Darwey, a rɔda hàla shom vyes mɛ. Ê wok nemwishish min, ko ê tɛ̀, yin gwɛ̌ hin na nepyak, sede remo de á kana sira a bedabeda min.

¹⁸Ê ra ano, ka sede yin a gyeng nu me de ma nɔng in yunung, na yin a ra pyɛ de ya jam a yɛ.”