Read berom Bare Badu 14 Bible Online

Bare Badu 14 - berom bible

Bare Badu 14

¹Mose a yâng BeIsrayɛl, a ye:“Yin a sé nèy Dagwi Darwey, Dagwi min. Yaga ano, jeng de yin e tosho vemo de ba ga kushu, yin wɔrɔ babek min na neba wɛt. Yin hwon tôt batili min wɛt arɔng, sede remo de bwang bemat be ra.

²Yin a sé vê Dagwi Darwey, Dagwi min. A ga kana kasa hin yi e yére jey mwa, yaga na yin a se vê yey mɛ.”

³“Yin kwon re ngyama cak de ya sé a Dagwi Darwey byɛm-byɛm.

⁴Yin ê tɔk re yas na ngyāma yemo ngan: berɔndɔng, na vyēl pyɛng na vyēl shi,

⁵na ròs, na vyêl hey, na vow, na bwang yere yɛ.

⁶Mwa yɛ ya vɔk shashap bekwǒk bol, ko ye tē gbuk à pyɛ́.

⁷“Ko yin re bemaryat, na befey tanga shonong wɛt. Mwa ano de ye tē gbuk à pyɛ́, ko ya vɔk shashap bekwǒk bol wɛt, ya sé kyiri na yin.

⁸Yin re bezà arɔng wɛt, Mwa ano de ba vɔk shashap bekwǒk bol, ko ba tē gbuk à pyɛ́ wɛt, ba sé kyiri na yin. Yin re banamâ ngyāma yemo wɛt, kɛ yin ka ra bavîn yɛ arɔng wɛt.

⁹“Yin ê tɔk re pyɛ́ cen de ya sé e ji nshi yemo de ya vɔk bafabak na gafosok zɔng.

¹⁰Ko kayɛ pyɛ cen de ya vɔk bafabak na gafosok wɛt, yin re yɛ wɛt, tɛ̀ in yɛ e ji pyɛ́ de ya sé kyiri.

¹¹“Yin ê tɔk re kagwɛ gwonon de gwa sé haalal.

¹²Ko yerê benon vemo de yin ê tɔk re wɛt à vemo, bekim, na berap, na bekwɛng, na bejagawey, na behwǎk, na ying-gyi, na bengyuwa, na behántɔ̀k, na bekǔl, na mwa yére benon vôs betɔk: na bedúrutsung, na berǎrit.

¹⁹Mwa pyɛ́ de ya vɔk bafabak na bol sede bèkwɔshey ya sé byɛm-byɛm na yin, yin re yɛ wɛt.

²⁰Ko yin ê tɔk re yére yɔ́rɔ de ya sé haalal.

²¹“Yin re pyɛ de ya ku wɛt. Yin ê tɔk tik bemât yére dyuk de ba sé sangal na yin be re yɛ, kɛ yin row a bemât yére dyuk behak yɛ. Yin a sé bemât Dagwi Darwey, Dagwi min, ey, yin a sé bemɛ. “Yin kyé namâ kekwey vyel e ji nevasâl neng o wɛt.”

²²Mose a re nuyel, a ye: “E kahɛ shey, nɔng in pyɔlɔ, yɛ à pyɛ jining e ji pyɛ́ kuru yê kayɛ pyɛ de yin a sè e hiri min.

²³E bama mo, yin wɔ́ mɛ e kwɔn de Dagwi Darwey, Dagwi min a ga kasa na be re a yɛ ɛ fongol. E hwomo, re in pyɔlɔ̂ pyɛ̂ yeneng, na yê nshî anap tanga yê něy pwat. Ré in nèy mɛsɛng ne berɔndɔng na vyēl min arɔng. Ra in ano, na yin a masa gwông sâp Dagwi Darwey, Dagwi min kayɛ jeng.

²⁴“Ka sede kwɔ̂n re fongol o ha sé a yin yikyik, ko pyɛ́ mo de Dagwi Darwey a nɔng in ya sé pyak ding-ding, yin ê tɔk kyè na yɛ mwa wɛt, ko yin ra ngan:

²⁵Row in pyɔlɔ mo, na yin a kyè na dyām o vɔk e kwɔ̂n rê fongol o.

²⁶E hwomo, sey in pyɛ̂ re de yin e simo yaga nzem na dyām o. Sey in berɔndɔng, na vyēl, na nshî anap kɛ yerê nshi de na vɔk gap, na kayɛ pyɛ de yin e simo. Ré in na yin sɔ pyɛ́ mo e hwomo na belɔ min, na yin a vɔk yey pyɛng.

²⁷Rini hin BeLevi arɔng de ba sé sangal e bapomo min, yaga yɛn a vɔk benap e vwel o wɛt.

²⁸“E yɛnɛ̂ bwal kahɛ shey hê netat, vey in na pyɔlɔ̂ pyɛ̂ hiri min, na yin bang yɛ e begban bapomo min.

²⁹Pyɛ́ mo ya rɔda sè yê BeLevi, remo de yɛn a vɔk benap wɛt. Nɔng in bepɛng de ba sé sangal e bapomo min, vɛ à nehyɛn na bekuma tanga bemât yere dyuk, pyɛ́ mo arɔng. Yɛn a rɔda vey vɛ pyɛ́ de be simo yi e ji yɛ. Rá in ano, ko Dagwi Darwey, Dagwi min a rɔda tɛ̀ a yin nerat e ra kayɛ pyɛ de yin e ra.”