Read berom Bare Badu 15 Bible Online

Bare Badu 15 - berom bible

Bare Badu 15

¹Mose a yâng BeIsrayɛl, a ye: “E yɛnɛ̂ kahɛ shey hê netaama, yin a rɔda hala a bemat mwa dyām de yin e rangal hɛn.

²Yin ê ra ngan: Kawɛ mwat de a ga kana hwɔp a gwà mɛ WoIsrayɛl dyām a rɔda hala a yɛ yɛ. A to wɔ̀ sey yɛ wɛt, yaga Dagwi Darwey a ga ye, be hala yɛ.

³Yin ê tɔk wɔ̀ sey pyɛ́ de yin e rangâl bemât yére dyuk, ko yin ê wɔ̀ sey pyɛ́ de yin e rangâl yere min wɛt.

⁴“Ka sede yin a raa hâ Dagwi Darwey, Dagwi min, na yin gyeng na nehywɛ kayɛ pyɛ de ma nɔng in nu e ra yɛ yunung, ko bê sɛ pwɛng e ji min wɛt. Yaga a rɔda tɛ̀ nerat e vwel de a sé nɔng in hɛ nap.

⁶A rɔda tɛ̀ nerat e ra yin, sede remo de a ga kana sira a yin. Yin a rɔda hwɔ́p a bemât yére pyak dyām, ko yin ê jama hwɔpɔ̂ pyɛ cak yi na behak mɛn wɛt. Yin a rɔda vɔk reto e ra yére bemat pyak, ko yerê bemat cak yê vɔk reto e ra yin wɛt.

⁷“Ka sede gwà min WoIsrayɛl de a sé sangal e repomo min rehak e vwel de Dagwi Darwey, Dagwi min a sé nɔng in a bidɛ pyɛ cak, yin dura simô bato, na yin kyɛ́ in nà sɛlɛ hɛ wɛt.

⁸Dura hin a yɛ nerat, na yin hwɔp a yɛ pyɛ de e simo.

⁹Yin kyɛ́ in nà hwɔp a yɛ pyɛ cak, yaga shey hê netaama de bê hala a bemat pyɛ de ba hwɔp ha ga vey bagat wɛt. Yin tik báre ves yerê hemo he yel e ji neyey min wɛt. Ka sede yin a kyɛ́ in nà hwɔp a yɛ pyɛ de e simo, ko yɛ a rɔda tosho vɔk na Dagwi Darwey e ra pyɛ de yin a ra a yɛ, ko renɛn o rê sè e ra bato min.

¹⁰Nɔng in hɛ pyɛ mo washak sana simô to, ko Dagwi Darwey a rɔda tɛ̀ a yin nerat e ji kayɛ pyɛ de yin e ra.

¹¹“Kayɛ jeng ba rɔda sɛ̀ BeIsrayɛl behak de ba sé bepɛng de be jama sɛlɛ. Yaga ano, ma sé nɔng in nu, viri hin vwɔ na yin sɛlɛ hɛn.”

¹²Mose a re nuyel, a ye: “Ka sede WoIsrayɛl hwak, rwas kɛ hwā, a row tó mɛ e sesam na gwà mɛ WoIsrayɛl hwak, tik na a ra a dalɔ mɛ fwom shey tyiimin. E shey hê taama bê viri hɛ na a kyè washak.

¹³Yin hala hɛ vɔ sǎn wɛt.

¹⁴Viri hin vwɔ na yin nɔng ɛ cak e ji pyɛ́ de Dagwi Darwey a nɔng in, vyēl na pyɛ̂ yeneng na nshî anap.

¹⁵Bare hin, yin á sè besam e Misra, ko Dagwi Darwey, Dagwi min á viri hin washak yi e hwomo. A sé yaga ano de ma sé nɔ́ng in nu hemo yunung.

¹⁶Ka sede sam o a kyɛ́ ɛ nà kyè, yaga a tɛ̀ yey na hwo tanga belɔ mō, ko a wok netâ sangal o,

¹⁷hwà rɔda jut ɛ vɔk e ruhûp lɔ mō, ko hwô boro a yɛ fwong na kwet e ra cɔgɔ̂t rwi mo. Ano, a rɔda nàra sam mō vɔk e neyɛnɛ̂ neshey mɛ e jey. Hwà rɔda ra tyɛng ano na sam hwā mo.

¹⁸“Hwo lashê yey jeng de hwà sé tɛ̀ sam mo e gwong wɛt. A ga ra a hwo fwom shey tyiimin e nû rebit pyɛ de hwà yâng talâ mwat de hwà jut na a ra a hwo fwom. Rá ano, ko Dagwi Darwey, Dagwi mō a rɔda tɛ̀ nerat e ra hwo e ji kayɛ pyɛ de hwó ra.”

¹⁹Mose a re nuyel, a ye: “Tik in detu yaga Dagwi Darwey, Dagwi mwa tɔ̂ mɛsɛng o hê berɔndɔng tanga vyēl min de ya sé beras o. Yin tɛ̀ bemus o be ra a yin fwom hwak, kɛ yin yɛt setôt vyēl o wɛt.

²⁰Kahɛ shey yin na belɔ min yin a rɔda wɔ na tɔ̂ mɛsɛ̂ng yas o e kwɔn de Dagwi Darwey ê kasa na be re a yɛ fongol. E hwomo, yin ê re banama mo.

²¹“Ka sede yas o ye yɔmɔng, kɛ ya sé buga, kɛ pyɛ vyes cak ya mǎ yɛ, yin wɔ̀ nára a Dagwi Darwey, Dagwi min nɔrɔ̂ yɛ wɛt.

²²Yin ê tɔk yɛt yɛ̄, yin re e lɔ. Kawɛ e ji min ê tɔk re banama mo, kɛ a sé haalal kɛ ligis ayi, tyɛng sede remo de yin e re banamâ ròs kɛ vow ow.

²³Yin re nemi mo wɛt, ko yin losho nɛ e vwel sede nshi e negya.”