Read berom Bare Badu 16 Bible Online

Bare Badu 16 - berom bible

Bare Badu 16

¹Mose a yâng BeIsrayɛl, a ye: “E pwɛ̂l Avif, ra in Nzem Gyilsit Nelɔ na yin a nɔ̂ng Dagwi Darwey, Dagwi min nerey. A sè e nabwalak nehak e ji pwɛl o de á nusu na yin yi e Misra.

²Cī in e kwɔn de ê kasa na be re a yɛ fongol, na yin yɛrɛ cak e ji vyēl kɛ berɔndɔng min yaga pyɛ̂ Nzem Gyilsit Nelɔ, na yin nɔng ɛ mɛ nerey.

³Jeng de yin a sé re pyɛ́ mo, yin re kpam-tuk de ba yong na géy-sing wɛt. Yin a rɔda re kpam-tuk sana géy-sing nepɔlɔ netaama, sede remo de yin á ra jeng de yin á sè nusu yi e vwêl Misra dey-dey. Ré in kpam-tuk o de ba rɔda tâng wɛ à wo reyɔm, yaga na yin dopse bare na tuk de yin á nusu yi e vwêl Misra. Yin a rɔda bare na tuk o vɔk e yɛnɛ̂ neken min e jey.

⁴Hwak min e ji vwel min mwa a vɔ̀k géy-sing e lɔ mɛ e nepɔlɔ mo wɛt. Ré in e ji nabwalak o mwa banamâ yas de yin a yɛrɛ nawiri tuk hê mɛsɛng o.

⁵“Yɛrɛ hin pyɛ Nzem Gyilsit Nelɔ mo e kwɔn de Dagwi ê kasa na be re a yɛ fongol. Yin kwon ra ano e kwɔn hak duk o e ji sevwel de Dagwi Darwey, Dagwi min a rɔda nɔng in. Rá in ano nahywegelek jeng de gwi gwa ga gaba, tyɛng na jeng de yin á nusu yi e vwêl Misra.

⁷Kyé in banama mo, na yin re vɛ e kwɔ̂n re a Dagwi fongol. Nusû hwol nagasi, yin to in vɔk e nelɔ min.

⁸Yin a rɔda re kpam-tuk sana géy-sing nepɔlɔ netyiimin de ne raa. E tuk hê taama, tula hin na yin re a Dagwi Darwey, Dagwi min fongol. Yin ra fwom tuk hane wɛt.”

⁹Mose a re nuyel, a ye: “Basa hin besati betaama yi e jeng de yin a hwo bwâl alkama,

¹⁰na yin hwo Nzem Bwal, yaga na yin nɔ̂ng Dagwi Darwey, Dagwi min nerey. Vey nɔng in hɛ nɔrɔ̂ yey pyɛng tyɛng na nerat de a nɔng in.

¹¹Rá in ano e kwɔn de Dagwi ê kasa na be re a yɛ fongol. Vɔk in yey pyɛng e nuyel mɛ, yin na nèy min, na besam min. Rini hin BeLevi, na yére dyuk, na nehyɛn tanga bekuma de ba sé sangal e bapomo min arɔng.

¹²Bare hin, yin á sè besam e Misra. Yaga ano, gyeng in badu vemo naka.”

¹³Mose a re nuyel, a ye: “Bama de yin a ga dak pyɛ̂ yeneng min mwa, na yin a ga piri nshî nèy anap min, ko yin ra Nzem Bǔk nepɔlɔ netaama.

¹⁴Rá in nzem o na yey pyɛng, yin na nèy min tanga besam min. Rini hin BeLevi, na bemât yére dyuk, na nehyɛn tanga bekuma de ba sé sangal e bapomo min arɔng.

¹⁵Nɔng in Dagwi Darwey, Dagwi min nerey yi na râ nzem o nepɔlɔ netaama e kwɔn de ê kasa na be re a yɛ fongol. Vɔk in yey pyɛng, yaga Dagwi Darwey a ga tɛ̀ nerat e ra bwal min tanga fwom de yin a ga ra.

¹⁶“Tik na mwa beras vê yére min be vey re a Dagwi Darwey fongol zang tat e shey e kwɔn de ê kasa na be re a yɛ fongol. Nzem o nɛ à Nzem Gyilsit Nelɔ na Nzem Bwal tanga Nzem Bǔk. Vit a mwat de ê vey vɔ sǎn.

¹⁷Kawɛ e ji min ê vey na nɔrɔ tyɛng na gap mɛ hê pyɛ́ de Dagwi Darwey, Dagwi min a nɔng ɛ yi na nerat mɛ.”

¹⁸Mose a re nuyel, a ye: “Tɛ̀sɛ hin bemât shɔt tanga bemât nuyel behak e karɛ repomo de Dagwi Darwey, Dagwi min ê nɔng in. Bemat o ba rɔda ra a bemat shɔt na tsak o.

¹⁹Tik na be gas badu e tē sana dura simô bemat behak. Yɛn a seres dyâm bâng nu wɛt, yaga yerê nɔrɔ hane he bangas bayîs vê netsitsɛng na vê tsak o mwa arɔng, ko hê tɛ̀ ɛn be yɛt shɔ̄t na bɔs.

²⁰Rá in shɔt na tsak o, gas in badu e tē kayɛ jeng! Ano kwong, yin ê sey ɛ vwel de Dagwi Darwey, Dagwi min a sé nɔng in na yin a di wɛng e sangal e hɛ arɔng.”

²¹Mose a re nuyel, a ye: “Jeng de yin a sé lɔk gàgbang nása nɔrɔ̂ yas vɔk na Dagwi Darwey, Dagwi min, yin tɛ̀ swesêk Ashera, ci hwā mo e hagat o wɛt.

²²Ano arɔng, yin tɛ̀ gwofwa gacik de be re a cī mɛ fongol wɛt. Dagwi Darwey e kyɛ́ ɛ pyɛ́ yane zakzak.