Read berom Bare Badu 17 Bible Online

Bare Badu 17 - berom bible

Bare Badu 17

¹“Yin nára a Dagwi Darwey, Dagwi min nɔrɔ̂ yas hê rɔndɔng kɛ vyel de ya vɔk ram wɛt. E sè a yɛ byɛm-byɛm.

²“Kɛ gyeng, tuhak yin ê wok, e ji repomo min rehak, mwat hwak kɛ hwā hwak a ga ra a Dagwi Darwey renɛn.

³A gyili wuna-na-sira mɛ na yin, a hwo re a ci kɛ gwi, kɛ pwɛl, kɛ netangacɛn fongol. Yi ano, a kyɛ́ ɛ nà gyeng nu de Dagwi Darwey a nɔng in.

⁴Jeng de yin a wok ano, ko yin ngyɛgɛt ha mo yɛɛlɛl. Ka sede yin a sɛ̀, pyɛ byɛm-byɛm o ya ga té e sevwêl Israyɛl mwin,

⁵ko tik na yin jut mwat o, rwas kɛ hwā, vɔk e mâ repomo, ko yin tó ɛ na beta na yin a mɔrɔ hɛ.

⁶“Ko di, ba rɔda mɔrɔ mwat o wɛt sɛ̌ bemat beba kɛ betat ba nɔng nuha e ra yɛ. Yin mɔrɔ hɛ wɛt sede mwât nuha a sé gwining zɔng.

⁷Bemât nuha mo vɛ de bê tānga hwo tó ɛ na beta mo, ko bwang bemat be de raa. Yi ano, yin a rɔda pat neves nemo yi e tē min.”

⁸Mose a re nuyel, a ye: “E jeng cak, shɔ̄t o cak yê sè a bemât shɔt min gbang na be yɛt yɛ̄, sede shɔ̂t mɔrɔ̂ mwat na nengyas kɛ na gawey, kɛ ba mǎ mwat hwak ding-ding, kɛ shɔ̂t pyɛ̂ nedanelɔ. Ka sede pyɛ́ yemo ya té, ko yin wɔ́ mɛ e kwɔn de Dagwi Darwey, Dagwi min ê kasa na be re a yɛ fongol.

⁹E hwomo, yin ê dura a BeLevi, bepiris, kɛ mwât shɔt wo jeng o, ko yɛn a rɔda yɛrɛ shɔt o.

¹⁰Yɛn ê dura pyɛ de yin ê ra. Sey in shɔt de yɛn a yɛrɛ mo, na yin raa tyɛng pyɛ de yɛn a misang a yin yɛɛlɛl.

¹²“Kawɛ mwat de a kyɛ́ ɛ na garen nà raa pyɛ de piris de e ra a Dagwi Darwey fwom kɛ mwât shɔt o ba ha a yɛ, ba rɔda mɔrɔ hɛ. Yi ano, ba rɔda pat neves nemo yi e ji BeIsrayɛl.

¹³Bemat mwa ba rɔda wok pyɛ de ya ga té, ba rɔda wok bengyip, ko bê kyɛm be to ra ano wɛt.”

¹⁴Mose a re nuyel, a ye: “E bama de yin a ga sey ɛ sevwel de Dagwi Darwey, Dagwi min a sé kyè wɔ̀ nɔng in, yin a ga sangal e ji hɛ, ko yin a rɔda yong ɛ, yin e simo gbɔng gwɔ̀m tyɛng sede yére dyuk de ya gwɔrɔ hin.

¹⁵Yin ê tɔk ra ano, ko tɛ̀ in womo de Dagwi Darwey a ga kana kasa. Yɛ a rɔda sè yere min. Yin tɛ̀ yere dyuk na ye sè gbɔng gwɔ̀m min wɛt.

¹⁶Gbɔng gwɔ̀m o a vɔ̀k bedwa pyak wɛt, ko de a tomo bemat vɔk e sevwêl Misra, na be wɔ̀ gwɛ̌ sey a yɛ bedwa wɛt, yaga Dagwi Darwey a ga ye, bemat mɛ bê sang to ɛn vɔk e hwomo wɛt.

¹⁷Gwɔ̀m o a vɔk beha pyak arɔng wɛt. Bê tɛ̀ ɛ a doyo yi na Dagwi Darwey. A jama a to mɛ nedanerey ne dyam shinang na dyam pyɛng ding-ding wɛt.

¹⁸“Jeng de a ga tɛ́ ɛ gbɔng gwɔ̀m, tik na a tɛ̀ be hashe a yɛ badu mo e jɛk yi e bwok-basa de bepiris, yɛn a BeLevi, be tikis gwɛ.

¹⁹A rɔda vɔk bwok-basa mo bagat na yɛ, na a kyě basa gwɛ kahɛ tuk de a sé kwen. Ano de ê masa na a sap Dagwi Darwey, na a gyeng kayɛ pyɛ de ba nɔng nu e ra yɛ e ji mo naka.

²⁰Ka sede ê ra ano, ê tos to na a bare, yɛ a dal bwang begwa mɛ BeIsrayɛl wɛt, ko ê gyeng badu Dagwi Darwey e kagwɛ gwong arɔng. Yi ano, a rɔda re negwɔm neshey pyak, ko yere mɛ ya rɔda re negwɔm e ra BeIsrayɛl bezamang pyak arɔng.”