Read berom Bare Badu 18 Bible Online

Bare Badu 18 - berom bible

Bare Badu 18

¹Mose a yâng BeIsrayɛl: “Yerê Levi de berâs yɛ ba sé bepiris ya rɔda vɔk benap mɛn vê vwel e ji BeIsrayɛl wɛt. Ko yɛn a rɔda sɛ pyɛ́ mɛn yi e pyɛ̂ nenɔrɔ detidetu de be nɔngɔ̂s Dagwi Darwey.

²Yɛn a rɔda vɔk benap tó mɛn sede bwang yére Israyɛl wɛt. Benap mɛn vɛ a nerat de yɛn a rɔda sɛsɛm yi e de ra a Dagwi Darwey fwom, tyɛng sede remo de a ga kana sira a yɛn.

³“Kayɛ jeng de bê nára nɔrɔ̂ berɔndɔng kɛ tyīmit, ko ba rɔda nɔ̂ng bepiris tô vwɔ mo, na namâ kup nu mo, na bú mo. Numo mɛn a hane.

⁴Ba rɔda nɔng ɛn pyɛ́ de ya tānga vel e hiri arɔng, yɛ à pyɛ̂ yeneng, na nshî anap, na něy pwat tanga tôt tyīmit de ba tānga yɛt kahɛ shey.

⁵Dagwi Darwey, Dagwi min a kasa yerê Levi yi e bwang yére Israyɛl, na ye ra a yɛ fwom nesheneshey.

⁶“Kawɛ WoLevi a vɔk gwong, na a sogo yi e karɛ repomô BeIsrayɛl, na a kyè vɔk e kwɔn de Dagwi ê kasa na be re a yɛ fongol.

⁷E hwomo, ê tɔk ra a Dagwi Darwey, Dagwi mɛ fwom, tyɛng na bemɛn de be ra gwɛ e hwomo.

⁸Ba rɔda nɔng ɛ pyɛ́ tyɛng na yê bemɛn, sana bare na pyɛ de e sɛsɛm yi e rɛsɛl pyɛ̂ belɔ mɛ.”

⁹Mose a re nuyel, a ye: “Jeng de yin a pom e sevwel de Dagwi Darwey, Dagwi min a sé nɔng in, yin kwon raa negwɔn neves ne yére bemat de ya sé e hwomo wɛt.

¹⁰Yin nása nèy min nɔrɔ̂ rangas vɔk na cī wɛt. Yin tik bemat min be ragas kayɛ yerê vyoshon kɛ bes ves kɛ sekwit wɛt. Be ha na bevuvwel kɛ be ra negarap arɔng wɛt.

¹²Dagwi Darwey, Dagwi min e kyɛ́ ɛ zakzak bemat de be ra pyɛ̂ byɛm-byɛm yemo. A sé yaga pyɛ́ yemo de a sé ro bemat de ba sé sangal e vwel de yin a sé kyè wɔ sey ɛ hɛ.

¹³Ko yin, wuna hin pang na yey min mwa na Dagwi Darwey.”

¹⁴Mose a re nuyel, a ye: “Bemât vwel de yin a sé kyè wɔ̀ sey ɛ hɛ, na yin a sangal ɛ, be raa vô du hê bemat de be ragas vyoshon na negarap. Ko Dagwi Darwey, Dagwi min e simo a yin na yin a ragas ano wɛt.

¹⁵A rɔda tomo a yin na zarap yi na yɛ sede me. Ê se yi e ji bemat min, ko tik na yin a raa ha mɛ.

¹⁶Mwin, pyɛ ma yane de yin á rangal tuk de yin á tula hin e Raku Hɔrɛp. Yin á ye, ‘Wot e simo Dagwi Darwey pyɛ mɛ a to há na wot wɛt. Wot e to simo di gbɔng kya hemo arɔng wɛt. Wot e wok bengyip, wot ê kushu!’

¹⁷“Yaga ano, Dagwi Darwey á yang me, ‘Di, yɛn a ga ra won de ha sé rat.

¹⁸Ma rɔda tomo a yɛn na zarap hom sede hwo yi e ji mɛn. Ma rɔda ha a yɛ pyɛ de a rɔda ha, ko ê ha a bemat o kayɛ pyɛ de ma nɔng nu e ra yɛ.

¹⁹Remo de ha mo ha yi na me, ma rɔda tabak kawɛ mwat de a kyɛ́ ɛ nà gyeng hɛ.

²⁰Ko ka sede zarap a kyɛm a ha ha hak e ji reza hom, ko ma nɔng ɛ nu na a ha ano wɛt, ba rɔda mɔrɔ hɛ. Ba rɔda ra ano na zarap de a ha pyɛ cak e ji rezâ ci arɔng.’

²¹“Gyeng rɔ̌ yin ê dasap na gwong de yin ê tɔk, ha de zarap o a ha ha yi na Dagwi Darwey arɛt?

²²Ka sede a ha pyɛ cak e ji rezâ Dagwi Darwey, ko pyɛ mo ya té tyɛng ano wɛt, hane ha dura, ha mo ha yi na Dagwi Darwey wɛt. Mwat o a ha hɛ na reto mɛ pyɛ mɛ. Yin wok bengyip wɛt.”