Read berom Bare Badu 19 Bible Online

Bare Badu 19 - berom bible

Bare Badu 19

¹Mose a yâng BeIsrayɛl: “E bama de Dagwi Darwey, Dagwi min a ga wey na bemat de a sé kyè wɔ nɔng in vwel mɛn, ko yin a ga sey ɛ bapomo mɛn na nelɔ mɛn, yin sangal ɛ,

²gas in yɛnɛ̂ vwel o zɔng tat. Kahɛ mo hê vɔk repomo de bê tɔk wul e rɛ dey-dey. Ko mwat de a mɔrɔ mwat a rɔda tɔk tele, a wɔ̀ dal e hak e ji bapomo mo.

⁴“Ko di, gwong de bê sey mwat de a mɔrɔ mwat o gwɛ à, mwat o a mɔrɔ mumwɛ e gawey, ko a kana sé mwât repugu mɛ wɛt. Ano de ê tɔk tele vɔk e hak e ji bapomo mo na a wɔ̀ dal.

⁵“Sede ngan, ka sede bemat beba ba wɔ̀ tow cɔ́gɔt e ji rehwot, jeng de yɛn a sê tow o, celes tyem mɛ ya nusu hɛ, ya wɔ̀ mɔrɔ sá mɛ. Yɛ mwât tyem o ê tɔk tele vɔk e rehak e ji bapomo batat o, na a wɔ̀ dal.

⁶Ka sede repomo mo ra yâng sé rining zɔng, ko gyeng rɔ̌ ra sé yikyik, ko mwât pyɔ̌n nemî gwa mɛ ê tɔk vo ɛ e gwong, a mɔrɔ hɛ na shom, mwa ano de a mɔrɔ gwà mɛ mo na nengyas wɛt, ko mwat o a kana sé wo repugu mɛ wɛt arɔng.

⁷A sé yaga ano de ma nɔng in nu, yin kasa bapomo batat.

⁸Gyeng in mwa badu de ma sé ha a yin yunung, tɛ̀ in yey na Dagwi Darwey, Dagwi min, na yin a raa begwong mɛ kayɛ jeng. Ka yin a ra ano, ê gwɛ̌ a yin nepyak vwel o, sede remo de á ha a bedabeda min, ko ê nɔng in mwa vwel de a ga kana sira a yin e ra hɛ. E jeng o, yin ê to kasa bapomo mo bahak batat.

¹⁰E gwong gwomo, bê mɔrɔ mwat rwat e vwel min de Dagwi Darwey, Dagwi min ê nɔng in hɛ nap wɛt. Ka sede yin a ra ano wɛt, ko bê gang in na shɔt rekû mwat rwat o.

¹¹Ko ka sede mwat e bɛɛ mumwɛ ves, a wɔ lɛrɛ hɛ, a hwo e ra yɛ, a mɔrɔ hɛ, ko a tele vɔk e hak e ji bapomô dál o.

¹²Ka sede a ra ano, ko bemakûk repomo mɛ ba rɔda tomo be wɔ̀ yila hɛ, ko bê nára hɛ e vwɔ̂ mwât talâ pyɔ̌n nemî gwa mɛ, yaga na a mɔrɔ hɛ arɔng.

¹³Yin wok nemwishish mɛ wɛt. Pát in mwât mɔrɔ̂ mwat womo yi e ji BeIsrayɛl, yaga na yin bin sangal tyang.”

¹⁴Mose a re nuyel, a ye: “Yin kwon gwɛ sek beta batô benap min vemo de beda min ba tɛ̀ e susu mo e sevwel de Dagwi Darwey, Dagwi min a nɔng in.

¹⁵“Nuhâ mwat gwining ha vey na be gang mwat na kahɛ yerê renɛn wɛt. A sé gbing-gbing be sɛ bemât nuha beba kɛ betat gyam na be de gang mwat na shɔt.

¹⁶“Ka sede mwat gwining a nɔng nuhâ bɔs e ra mumwɛ,

¹⁷tik na mwa hɛn be kyè vɔk e kwɔ̂n re a Dagwi fongol. Bepiris na bemât shɔt vê jeng o ba rɔda ra a yɛn shɔt o.

¹⁸Yɛn a rɔda ngyɛgɛt ha mo yɛɛlɛl. Ka sede ba sɛ mwat o a vɛ́ bɔs e ra gwà mɛ WoIsrayɛl,

¹⁹ko ba rɔda tabak hɛ na tabak de a kana simo be ra a gwà mɛ mo. Yi ano, yin a rɔda pat neves nemo yi e ji BeIsrayɛl.

²⁰Bwang bemat ba rɔda wok pyɛ de ya ga té, yɛn a rɔda vo bengyip, ko hwak a rɔda sang to ra pyɛ vyes yerê yane wɛt.

²¹Yin wok nemwishish mwat de a ra ano wɛt. Tabak o ha rɔda sè hê talâ mwat tyɛng na pyɛ de a ra wɔgɔ, neken e tô neken, yis e tô yis, hwin e tô hwin, vwɔ e tô vwɔ, na bwol e tô bwol arɔng.”