Read berom Bare Badu 2 Bible Online

Bare Badu 2 - berom bible

Bare Badu 2

¹“Wot a doyo, ko wot a hwo kyè vɔk e hey. Wot a raa gwong vɔk e Gworep Sere, sede remo de Dagwi Darwey a nɔng ot nu. Wot a ra jeng pyak, wot e kyě rini e hêy beraku Ɛdɔm.

²“Tuhak, Dagwi Darwey a yang me wɔgɔ,

³jeng de wot a rɔ̀nɔs e vwêl beraku mo ya ga vey ano, tik na wot kyè vɔk e bak rwa bato.

⁴A yang me, me misang hin ngan: ‘Yin a sé kyè wɔ̀ kwey e vwêl Ɛdɔm, yɛnɛ̂ vwêl begwa min yerê Esau. Yɛn e wok bengyip min,

⁵ko yin kwon hwo ɛn na como ko tyɔng wɛt, yaga mê ka nɔt in kekwɔn tɛ̂ bwol e vwel mɛn wɛt. Ma ga nɔng ɛn vwêl beraku Seyir na he tɛ́ ɛ nap mɛn.

⁶Ko yin ê tala dyâm pyɛ̂ re na nshî sɔ de yin ê sey na yɛn e negya.’

⁷“Mwin, Dagwi Darwey, Dagwi mot a ga tɛ̀ nerat e ra wot e ji kayɛ pyɛ de wot a ga ra. A ga kyě bɛrɛng hot naka jeng de wot a kyě gǎ e hey rey o hemo. A ga sangal tanga wot neshey kuru banaas nemo, ko a ga nɔngɔs hot kayɛ pyɛ de wot a simo.

⁸“Ano kwong, wot a re nuyel na kwɛngɛl o, ko wot a hala yɛnɛ vwêl Seyir de begwa mot yerê Esau ya se ɛ. Wot a to hàla gwong de gwa kwey yi e bapomô Elat na Ɛziyɔn-Gɛbɛr vɔk e Gbɔng Rep Nevwashe. E bama mo, wot a doyo, wot a raa gwông hêy Mowap.

⁹Ko Dagwi Darwey a hwo yang me, ‘Yin shɔk a BeMowap yey, kɛ yin hwo ɛn na como wɛt, yaga mê nɔt in bak vwel mɛn hwak wɛt. Yɛn a sé yerê Lɔt, ko ma ga nɔng ɛn gbɔng repomô Ar, na re tɛ́ ɛ nap mɛn.’ ”

¹⁰Gyam na Dagwi a nɔng BeMowap vwel mɛn, gbɔng yerê bemat berey o cak de bá tang ɛn a BeƐmi bá kana sangal e hwomo. Yɛn á sè bèlis o sede yerê bemat berey o cak de bá tang ɛn à BeAnak.

¹¹Bá tâng BeƐmi mo à BeRɛfa, sede remo de bá tâng BeAnak à BeRɛfa arɔng, ko bemât Mowap ba tâng BeRɛfa mo à BeƐmi.

¹²BeHori bá kana sangal e vwêl Seyir a raane, ko yerê Esau yá ro ɛn yi e hɛ, yá wey na yɛn hywiri, ko yɛn a sangal ɛ. E bama mo, BeIsrayɛl ba ra ano arɔng na bemat e vwel de Dagwi Darwey á nɔng ɛn, na he sè nap mɛn.

¹³“Jeng de wot a wul Rɔt Zɛrɛt, wot a ye dɔ a rɛ, tyɛng na pyɛ de Dagwi a yang ot.

¹⁴Pyɛ́ yemo ya té neshey kuru batat na nɛ rwit (38) e bama de wot a ga hala Kadɛsh Barneya. E jeng o, mwa bemat de bá kana tɔk tô como e Kadɛsh Barneya ba ga kushu vit, tyɛng na pyɛ de Dagwi Darwey á kana ha, ya rɔda té.

¹⁵Ko yɛ pyɛ mɛ á ra begwong de mwa hɛn ba kushu.

¹⁶“E bama de yɛn a ga kushu mwa,

¹⁷Dagwi Darwey a yang me,

¹⁸‘Yunung yin a rɔda kwey e yɛnɛ̂ vwêl Mowap ko yin ê hala repomô Ar.

¹⁹Yin a rɔda kwey e vwêl BeAmɔn. Ko yin shɔk a yɛn yey, kɛ yin hwo ɛn na como wɛt, yaga mê nɔt in bak vwel mɛn hwak wɛt. Yɛn a sé yerê Lɔt, ko ma ga nɔng ɛn bak vwel o na wo tɛ́ ɛ nap mɛn.’ ”

²⁰Bá to tâng yɛnɛ̂ vwel hemo mo à vwêl BeRɛfa. Yɛn à bemat de bá kana sangal e ji hɛ. BeAmɔn bá kana yila bemat o à BeZamzum.

²¹BeZamzum o bá sè belis sede BeAnak. Yɛn á sè yere ryey, ko yɛn á sè pyak arɔng. Ko Dagwi Darwey á sɛlɛ BeAmɔn o, na be wey na BeZamzum o. Bá sey ɛ vwel o, ko ba sangal ɛ.

²²Dagwi Darwey á sɛlɛ hɛn, sede remo de á kana sɛlɛ BeƐdɔm, yerê Esau e vwêl Seyir. Á nɔng BeHori mo e vɔ BeƐdɔm o, bá sey ɛ vwel o, bá sangal ɛ. Yɛn a rɔɔ sangal e hɛ pere vey e remo.

²³Bemat de ba tang vɛ, à BeAvi ba kana sangal e bapomô bak vwel Gaza. Ko bemat de ba yi e rezîk Kaftor ba sey ɛ vwel mɛn o, ko yɛn a sangal e hɛ.

²⁴“E bama de wot a ga kwey yɛnɛ̂ vwêl Mowap, Dagwi Darwey a yang ot, ‘Sogo hin, na yin ye dɔ a Rɔt Arnɔn. Ma sé nɔng in Sihɔn, gbɔng gwɔ̀m Hɛshbɔn wo BeAmɔr na vwel mɛ e vɔ min. Hwo in hɛ na como, na yin a sey ɛ vwel o, na yin a sangal ɛ.

²⁵E ngamo nuyel, mê tɛ̀ mwa yére bemât jey be vɔk bengyip min. Yɛn ê vow na bengyip ras de ba tɛ̀ a yɛn reza min.’ ”

²⁶“Ano arɔng, ma tomo betom yi e hêy Kɛdɛmɔt vɔk na Sihɔn, gbɔng gwɔ̀m Hɛshbɔn, na wot yong sangâl netyang na yɛ. Ma yang ɛ,

²⁷‘Tik wot kwey e vwel mō tyang. Wot ê kyè cik zɔng, wot ê hala gwong, na wot a ye rɛng e kwɔn hak wɛt.

²⁸Wot ê tala dyâm pyɛ́ de wot ê re na nshi de wot ê sɔ arɔng. Pyɛ jining de wot e simo yɛ à, hwo tik ot wot kwey cik e vwel mō,

²⁹wot pere wɔ̀ ye dɔ à Rɔt Yɔrdan, na wot a yel e vwel de Dagwi Darwey, Dagwi mot a sé kyè wɔ̀ nɔng ot hɛ. Ko di, yerê Esau de ya sangal e Ɛdɔm, tanga BeMowap de ba sangal e Ar, bá simo a wot, wot kwey e yɛnɛ̂ vwel mɛn ano.’

³⁰“Ko Sihɔn o a shǎl a wot nà kwey e sevwel mɛ. Dagwi Darwey, Dagwi mot a bare a tɛ̀ ɛ gbàrak, na a simo to como na wot. Dagwi Darwey, a yang me, ‘Di, ma sé kyè wɔ sɛlɛ hwo, na hwo re Sihɔn o na como, na hwo sey ɛ vwel mɛ. Yaga ano, hwo in hɛ.’

³²“Ko Sihɔn a nusu na bemat mɛ mwa, na be tó como na wot bagat na repomô Yahas.

³³Ko Dagwi Darwey, Dagwi mot a nɔng ot wɛng e ra yɛn. Wot a mɔrɔ hɛ, na nèy mɛ bewen o, na bemât como mɛ mwa.

³⁴Wot a re karɛ repomo mɛ na como, ko wot a wey na karɛ mo hywiri. Wot a mɔbɔs bemat o mwa, beras, na beha tanga nèy. Wot a tik hwak kwen wɛt.

³⁵E yas mɛn zɔng de wot a hashe, mwa na pyɛ̂ jugu e bapomo mo.

³⁶Dagwi Darwey, Dagwi mot a sɛlɛ hot na wot a re bapomo mo mwa na como, yi e repomô Arower, de ra sé e rak nɛk Rɔt Arnɔn, mwa na repomo de ra sé e tê nɛk o, wot a kyè mɛ pere wɔ̀ wul susû vwêl Gileyat. Vit a repomo mɛn rehak de ra vɔk jwa-pomo de wa dal gap mot nà gangas wɛ.

³⁷“Ko wot á wɔ́ bagat na yɛnɛ̂ vwêl BeAmɔn wɛt, kɛ kwogôm Rɔt Yabɔk kɛ bapomô vwêl beraku, tyɛng sede Dagwi Darwey, Dagwi mot a nɔng ot nu.”