Read berom Bare Badu 20 Bible Online

Bare Badu 20 - berom bible

Bare Badu 20

¹Mose a yâng BeIsrayɛl: “Jeng de yin a sé kyè wɔ̀ tó como na vê repugu min, ko yin a di, yɛn a vɔk bekyɛkyɛ̂ bedwa, na bedwa tanga bemât como de ba dal in na nepyak, yin wok bengyip mɛn wɛt, Dagwi Darwey, Dagwi min de á sey ɛ hin yi e Misra a rɔda sè tanga yin.

²Gyam na yin a hwo como mo, piris a rɔda vey e nuyêl bemât como min, ko ê yang ɛn,

³À yin bemât Israyɛl, wet in betong! Yunung, yin a sé kyè wɔ̀ hwo como. Yin wok bengyip bemât repugu min, kɛ a yang in gbɛrɛk na yin lingsit wɛt.

⁴Dagwi Darwey, Dagwi min a rɔda kyè tanga yin, ê to como na vê repugu min, ko ê nɔng in wɛng.

⁵“E bama mo, bemât fwôm gwɔ̀m ba rɔda ha na bemat o, bê yang ɛn, ‘Mwat hwak a sé e ji min de a sé mɛsɛ̂ng lɔk lɔ pas, ko a ga yel ɛ e ngyen wɛt a? Tik na a to ɛ wɛrɛ. Ka ano wɛt, ka ba mɔrɔ hɛ e de como mo, ko a sé e mwat hwak de ê wɔ̀ yel e lɔ mo.

⁶“ ‘Mwat hwak a sé e ngamo de á mɛsɛng tus bwî batîn anap, ko a ga kana sɛ gwông vôs nèy anap o wɛt a? Tik na a to ɛ wɛrɛ. Ka ano wɛt, ka ba mɔrɔ hɛ e de como mo, ko a sé e mwat hwak de ê wok netâ nshî anap o.

⁷“ ‘Mwat hwak a sé e ngamo de e hwono hwong a? Tik na a to ɛ wɛrɛ, ka ano wɛt, ka ba mɔrɔ hɛ e de como mo, ko a sé e mwat hwak de ê ra weneng na hwong de e hwono mo.’

⁸“Bemât fwôm gwɔ̀m o ba rɔda to gwɛ̌ yâng bemat o, ‘Mwat hwak a sé e ngamo de nemi na ga gaba a yɛ e yey, ko a ga tɛ̀ bengyip a? Tik na a to ɛ wɛrɛ. Ka ano wɛt, ko yɛ a rɔda tɛ̀ a bemɛn negbɛrɛk.’

⁹E bama de ba ga yɛnɛ ha na yɛn, ko bê kasa bemât nuyêl bemât como vê karɛ regyɛng mɛn.

¹⁰“Jeng de yin a sé kyè wɔ̀ hwo repomo rehak, yin tānga nɔ̂ng bemat o gwong na yɛn a jama sangâl netyang na yin.

¹¹Ka sede yɛn a ye ey, ko ba wuma rùhup mɛn, na yɛn a jama sangâl netyang, ko yɛn mwa bê ra a yin fwôm retek.

¹²Ko ka sede bemat o ba kyɛ́ ɛn nà jamâ sangâl netyang na yin, yɛn a dal na simô como e negya, ko yin rɔnɔ repomo mo.

¹³E bama mo, jeng de Dagwi Darwey, Dagwi min a tɛ̀, yin a re repomo mo, ko yin mɔrɔ kawɛ rwas e ji rɛ.

¹⁴Yin ê tɔk hashe a bato min beha mo, na nèy o, na yas mɛn tanga kayɛ pyɛ de ya sé e ji repomo mo. Yin ê tɔk ra fwom na kayɛ pyɛ ye bemât repugu min o. Dagwi Darwey a ga nɔng in yɛ.

¹⁵Gwong a gwomo de yin a rɔda ra na bapomo de ba sé yikyik na vwel de yin a rɔda sangal ɛ.

¹⁶Ko ka sede yin a re bapomo e sevwel de Dagwi Darwey, Dagwi min a sé nɔng in nap sɛ, ko gbing-gbing yin ka mɔbɔs kayɛ pyɛ cen.

¹⁷Wey in na bemat o mwa hywiri, yɛn BeHiti, na BeAmɔr, na BeKanaan, na BePɛrizi, na BeHivi tanga BeYebus, sede remo de Dagwi a nɔng in nu na yin a ra.

¹⁸Ka ano wɛt, yɛn ê masa a yin pyɛ̂ byɛm-byɛm de yɛn e ragas e de re a ci mɛn fongol.

¹⁹Jeng de yin a sé kyě jama gwông hwô repomo rehak na como, yin tow batîn cɔ́gɔt de be tɔs nèy de be re nɛ wɛt, ka como mo ya ka ros e rɛ̌ ayi. Ré in nèy cɔ́gɔt o, ko yin wey na batin o wɛt. Batîn cɔ́gɔt ba sé bemat de yin ê ra como na vɛ wɛt.

²⁰Yin ê tɔk tow cɔ́gɔt, na yin yong mɛ nekwɔn turus e ra jwa-pomo, na yin a yel, yin re repomo mo. Ko ra in fwom na cɔ́gɔt de ye mara nèy de be re wɛt.”