Read berom Bare Badu 21 Bible Online

Bare Badu 21 - berom bible

Bare Badu 21

¹Mose a yâng BeIsrayɛl, a ye: “Ka sede ba sɛ̀ revîn mwat de ba mɔrɔ e cwɛl hwak e sevwel de Dagwi Darwey, Dagwi min a sé kyè wɔ̀ nɔng in, ko ba tɔk mwat de a mɔrɔ hɛ wɛt,

²tik na bemakuk na bemât shɔt bak vwel o be nusu, na be wɔ̀ mara neyikyîk kwɔn de revîn mwat o ra sé ɛ vɔk e bapomo de ba sé bagat na kwɔn o.

³Ano, bemakûk repomo de ra dal na nebagat, ba rɔda kasa shep rɔndɔng de ba ga sang rɔgɔs a yɛ swesêk vɔk berɔndɔng wɛt.

⁴Yɛn a rɔda kyè na yɛ vɔk e kwɔn hak bagat na rɔt de he ye jɔng wɛt, ko ba ga sang tow kwɔn o, kɛ be tus ɛ pyɛ cak wɛt, ko ba rɔda kwɔrɔ fwɔ̂ rɔndɔng o e hwomo.

⁵Bepiris ve yerê Levi ba rɔda vey bagat, yaga Dagwi Darwey, Dagwi min a ga kasa hɛn na be ra a yɛ fwom, na be tɛ̀ a bemat nerat e ji reza mɛ. E yɛn vɛ de be yɛt shɔ̄t ka sede bemat ba ra yol kɛ ba tak a mwat hwak.

⁶E bama mo, mwa bemakuk vê repomo mo de ba ra revîn mwat o ba rɔda kus vɔ mɛn e ra rɔndɔng o.

⁷Ko ba rɔda ye, ‘A sé e vɔ mot de ba mɔrɔ mwat o wɛt, ko wot a di mwat de a mɔrɔ hɛ arɔng wɛt.

⁸À Dagwi Darwey, hala a bemat mō BeIsrayɛl de hwà viri yi e sevwêl Misra. Hwo tɛ̀ nedirîk mɔrɔ̂ mwat rwat womo e ra wot, bemat mō, wɛt.’ Ko Dagwi Darwey ê hala nɛn o.

⁹Ano kwong, ba rɔda tɛ̀ nedirîk mɔrɔ̂ mwat o e ra yin wɛt, yaga yin a ga ra pyɛ de Dagwi Darwey e simo be ra.”

¹⁰Mose a re nuyel, a ye: “Jeng de Dagwi Darwey, Dagwi min a nɔng in wɛng e ji como, ko yin a vos bemat e de jugu mo,

¹¹gyeng rɔ̌ gwining e ji min a rɔda di hwā hwak rwat o e ji mɛn de a simo hɛ, ko a simo a ra weneng mɛ.

¹²A rɔda jut ɛ vɔk e lɔ mɛ, ê tɛ̀ ɛ, a wula to ko a yɛt bekwǒk vɔ mɛ,

¹³a sege berugu mɛ, ko a rɔda sangal e lɔ mo e de sesîn da mɛ na neng mɛ pwɛl gwining. E bama mo, mwat o ê tɔk ra weneng mɛ.

¹⁴Ka sede e jeng cak e to simo hɛ wɛt, ko a hala hɛ na a kyè washak. Ê tɔk row ɛ kɛ a teshe na yɛ sede sam wɛt, yaga a ga kana dyɛng na yɛ na retek.”

¹⁵Mose a re nuyel, a ye: “Ka sede mwat a vɔk beha beba, ko a dal na simo hwak e ji mɛn, ko ba vě tɔs a yɛ nèy bewen, ko hwey kinat o ha sé hwêy hwâ yey mɛ wɛt.

¹⁶Ka sede mwat o a yong ɛ̀, na a gas a nèy o pyɛ̂ nedanelɔ mɛn, ê tɔk kasa hwêy hwâ yey mɛ na a nɔ̂ng hɛ pyɛ̂ nedanelɔ yê hwey kinat wɛt.

¹⁷A sé gbing-gbing a tɔk pyɛ jining: hwêy hwā de a sé hwâ yey mɛ wɛt hɛ à hwey kinat. A nɔ̂ng hɛ zang ba hê pyɛ́ mɛ mwa, yaga e hɛ de a tanga tɔ, ko hê vɔk nedanelɔ lɔ mo.”

¹⁸Mose a re nuyel, a ye: “Ka sede mwat a vɔk hwêy wen de ha sé gbàrak, ko he gyeng hâ da mɛ na neng wɛt, mwa ano de yɛn e sǎ e de tabâk hɛ,

¹⁹da mɛ na neng mɛ ba rɔda jut ɛ vɔk na bemakuk e durâ repomo de yɛn a sé ɛ na be ra a yɛ shɔt.

²⁰Yɛn a rɔda yang ɛn ngan, ‘Hwêy mot hemo ha sé gbarak, ko he gyeng ha mot wɛt. He kat serwéy ko he sǎ e de fêng siring zɔng.’

²¹Ano kwong, berâs repomo mo ba rɔda tó hɛ na beta sɛ̌ ha ku. Yi ano, yin a rɔda pat neves nemo yi e tē min. Kawɛ mwat e ji BeIsrayɛl a rɔda wok pyɛ de ya ga té, ko ê tɛ̀ bengyip.”

²²Mose a re nuyel, a ye: “Ka sede ba ga yɛrɛ a mwat shɔt reku yaga renɛn de a ga ra, ba ga mɔrɔ hɛ, ko ba rɔgɔs revin o e ra cɔgɔt,

²³yin tik rebek o re pɔl ɛ wɛt. Lɛrɛ hin rɛ tuk hane mo, yaga revîn mwat e ra cɔgɔt ra sé pyɛ de Dagwi e kyini yɛ. Yin tɛ̀ vwel de Dagwi Darwey, Dagwi min a sé nɔng in ligis wɛt.”