Read berom Bare Badu 22 Bible Online

Bare Badu 22 - berom bible

Bare Badu 22

¹Mose a yâng BeIsrayɛl, a ye: “Ka sede hwà di rɔndɔng kɛ vyel gwà mō WoIsrayɛl de ya ga tùt ɛ, hwo tik yɛ wɛt, vo yɛ, na hwo wɔ̀ nɔ́ng ɛ yɛ.

²Ko ka sede dâ yɛ a sé sangal yikyik yi na hwo, kɛ hwà tɔk dâ yɛ mo wɛt, ko hwo kyè na yɛ vɔk e lɔ. Jeng de da mo a rɔda kyě jama yɛ, ko hwo nɔng ɛ pyɛ mɛ.

³Rá tyɛng ano ka sede hwà sɛ̀ madung, kɛ rugu kɛ kayɛ pyɛ de ya vuru hɛ. Hwo tik nà sɛlɛ wɛt.

⁴Ka sede madung kɛ rɔndɔ̂ng gwà mō WoIsrayɛl wa ga gaba na pyɛ́ e gwong, hwo tik ɛ̀ wɛ e vwel o wɛt, sɛlɛ da mo, na yin a to tɛ̀ yas o ye sogo e ra bol yɛ.”

⁵Mose a re nuyel, a ye: “Beha be tɛ̀ pyɛ̂ beras wɛt, kɛ beras be tɛ̀ berugû beha wɛt arɔng. Dagwi Darwey, Dagwi min e kyɛ́ ɛ zakzak bemat de be ra ano.

⁶“Ka sede hwà sɛ̀ rɛngɛ̂ kenon e ra cɔgɔt kɛ e vwel ayi, ko kenon o ka sé e dyɛngɛ e ra bagyi mo, kɛ ka sé na nèy de ka ga kana kwɛ́k nɛ, hwo jut kenon o na nèy o wɛt.

⁷“Hwô tɔk hashe nèy o, ko hwo tik neng o wo kyè. Ano kayɛ pyɛ yê kyè a hwo naka, ko nepɔlɔ mō nê gwɛ hɛn arɔng.

⁸“Jeng de hwà sé lɔk lɔ pas lɔ̂ ye gup, tē naka na hwo gwɔrɔ vwarâ ye gup o na lɔk tyɔng vɔk e rak o. Yi ano, ka mwat a gaba yi e ra wɛ, ko a ku, bê rangal hwo nemi mɛ wɛt.

⁹“Hwo tús pyɛ cak e ji hwiri gwining o na batîn anap wɛt. Ka sede hwà ra ano, a sé gbing-gbing hwo vey na kayɛ pyɛ de hwà vos e hwiri mo e kwɔ̂n re a Dagwi fongol.

¹⁰“Hwo wuna rɔndɔng tanga madung na be hwɔlɔ ron gwining o wɛt.

¹¹“Hwo tɛ̀ rugu de ba lɔk gwɛ na wuulu be kyɛ̀sɛ ɛ̀ linen wɛt.

¹²“Tɛ̀ bebwɛshɛ e bato-kwɔng banaas vê berugu mō.”

¹³Mose a re nuyel, a ye: “Ka sede mwat a ra wenêng hwong, ko e bama mo a ye e to simo hɛ wɛt,

¹⁴ko a lashe a hwong o za wɔgɔ, á sè yorom-hwong jeng de yɛn á ra weneng wɛt.

¹⁵“Ka sede pyɛ mo ya té ano, ko da na neng mɛ be jut rugû bâng gwât gwel de gwa vɔk ɛ nemi de na dura hwong o á sè yorom o e jeng weneng. Yɛn a rɔda wɔ̀ dura a bemakuk repomo mo gwɛ e dúra.

¹⁶Dâ hwong o a rɔda yang ɛn, ‘Ma nɔ̂ng sá womo hwóng hom e weneng, ko a remo e to simo hɛ wɛt.

¹⁷A ga lashe za mɛ wɔgɔ, á sè yorom-hwong jeng de yɛn á ra weneng wɛt. Di in, pyɛ nuha à yemo de ya dura, hwóng hom á sè yorom!’ Ko yɛn ê dura rugu mo.

¹⁸Ano kwong, bemakuk o ba rɔda jut rwas o, be dak ɛ.

¹⁹Yɛn a rɔda to re ɛ rekyìt rê kilo gwining wo dyam pyɛng, ko be nɔ̂ng tyà mɛ mo, yaga mwat o a ga lashe zâ hwông BeIsrayɛl. Ko a rɔda re nuyel na yɛ, a rɔda tɔk gas ɛ na yɛ mwa jeng de a sé kwen wɛt.

²⁰Ko ka sede pyɛ de rwas o a ha ya sé mwin, ko da na neng hwong o ba tɔk dura, á sè yorom-hwong e jeng weneng wɛt,

²¹ba rɔda pat hwong o e rwi ruhûp lɔ da mɛ, ko e hwomo e jey, berâs repomo mo ba rɔda tó ɛ na beta sɛ̌ a ku. A ga ra pyɛ rekyen e ji BeIsrayɛl de a ra nejwang yɛ a sè rɔngɔl e lɔ da mɛ gyam na a ra weneng. Yi ano, yin a rɔda pat neves nemo yi e tē min.

²²Ka sede ba vo mwat a sè dyɛng na hwâ mwat hwak, ko ba rɔda wey na yɛn mwa beba. Yi na ra ano, yin a rɔda pat neves nemo yi na yin.

²³“Ka sede mwat a sè dyɛng na hwong de mwat hwak e hwono e ji repomo,

²⁴yin a rɔda pat ɛn vɔk e dúra, ko yin tó ɛn na beta yin mɔbɔs hɛn. Ba rɔda mɔrɔ hwong o yaga a dak sekun na bemat be vey sey ɛ wɛt, mwa ano de a sé e ji repomo kwɔn de bemat ba rɔda wok sekun mɛ. Ba rɔda mɔrɔ mwat o arɔng, yaga a dyɛng na hwâ mwat hwak. Yi ano, yin a rɔda pat neves nemo yi e tē min.

²⁵“Ka sede mwat hwak a vo hwong de be hwono hɛ e hey, a dyɛng na yɛ na gap, ko e mwat o nju mɛ de ba rɔda mɔrɔ.

²⁶Ba rɔda ra a hwong o pyɛ cak wɛt, yaga a ga ra nɛn de ha vey be wey na yɛ wɛt. Shɔt yerê yemo ya sé tyɛng na ye mwat de a hwo sá mɛ na yol, ko a mɔrɔ hɛ.

²⁷Mwat o a dyɛng na hwong de be hwono mo na gap e hey. Mwa ano de hwong o a dak sekun na be sɛlɛ hɛ, ko vit a mwat bagat na a sey ɛ.

²⁸“Ka sede mwat a vo hwong de be hwono hɛ wɛt, ko a dyɛng na yɛ, ko ba vo ɛn ɛ,

²⁹mwat o a rɔda tala dâ hwong o yas ye kilo gwining wo dyam pyɛng, ko hwong o a rɔda tɛ́ ɛ hwā mɛ, yaga a dyɛng na yɛ na gap. A rɔda tɔk gas ɛ na yɛ mwa jeng de a sé kwen wɛt.

³⁰“Mwat hwak a byɛs da mɛ yi na dyɛng na hwak e ji beha mɛ wɛt.”