Read berom Bare Badu 23 Bible Online

Bare Badu 23 - berom bible

Bare Badu 23

¹Mose a yâng BeIsrayɛl, a ye: “Mwa mwat de ba ga forok hɛ, kɛ womo de ba ga tùt pyɛ́ mɛ ê tɔk yel e tulâ bemât Dagwi wɛt.

²“Mwa mwat de ba tɔ e ji weneng wɛt, yɛ kɛ yére mɛ vɔk e zamang hê kuru bê tɔk yel e tulâ bemât Dagwi wɛt.

³“Vit à WoAmɔn kɛ WoMowap kɛ yére mɛn vɔk e zamang hê kuru, de bê tɔk yel e tulâ bemât Dagwi.

⁴Yɛn á kyɛ́ ɛn nà nɔng in pyɛ̂ re na nshi jeng de yin á nusu yi e Misra, ko yɛn á to tala Balaam Beyor wo repomô Petor e Mɛsɔpɔtamya-Bato byɛ, na a vey mok a yin gawey.

⁵Ko Dagwi Darwey, Dagwi min á tɛ̀ tong na hâ Balaam wɛt, á doyo gawey mɛ mo he tɛ́ ɛ nerat e negya, yaga a tɛ̀ yey na yin.

⁶Yin sang ra pyɛ cak na yin sɛlɛ yére bemat yemo, kɛ yin ra pyɛ de yê nɔng ɛn nedanerey wɛt.

⁷“Yin byɛnɛng BeƐdɔm wɛt, yaga yɛn a sé cáng min. Yin byɛnɛng BeMisra arɔng wɛt, yaga yin á sangal rekyɛn e sevwel mɛn raane.

⁸Ka sede behak e ji mɛn ba sé sangal na yin, ko yére mɛn yi e zamang hê netat vɔk e nuyel ya rɔda tɔk yel e tulâ bemât Dagwi.”

⁹Mose a re nuyel, a ye: “Jeng de yin a sé e dúra como, yin ra pyɛ de yê tɛ̀ in ligis wɛt.

¹⁰Ka sede mwat hwak a tɛ́ ɛ ligis yaga nshî jwat na nusu a yɛ e ji negwi nabwalak, tik na a wɔ̀ sangal e mâ dura mo tuk hane mo.

¹¹E rwa nahywegelek a rɔda kus ɛ. A rɔda toyo vey e dura mo jeng de gwi gwa ga gaba.

¹²“Yin a rɔda yong kwɔn e mâ dura, yaga na yin a nunus ɛ̀ e jey.

¹³Vɔk in gwele e ji pyɛ̂ como min, yaga na jeng de yin e wɔ̀ nusu e jey, yin cing mɛ kevɔng, na yin to bang mɛ kɛ bamâ nú jey e ji mo.

¹⁴Gyeng in dura mo haalal, yaga Dagwi Darwey, Dagwi min a sé na yin e dura mo, na a gyep in, na a nɔng in wɛng e ra vê repugu min arɔng. Yin ra pyɛ cak de ya sé kis, na Dagwi Darwey a doyo a yin ma wɛt.”

¹⁵Mose a re nuyel, a ye: “Ka sede sam a tele yi na dalɔ mɛ, ko a vey e vwel min, yaga na yin gyep ɛ, yin toyo na yɛ na dalɔ mɛ wɛt.

¹⁶A rɔda tɔk sangal e tē min e ji repomo hak de a kasa, ko yin teshe na yɛ na neves wɛt.

¹⁷“WoIsrayɛl rwas kɛ hwā a kwon tɛ́ ɛ devwes wɛt.

¹⁸Yɛn a vey na dyām de ba sɛ̀ yi e negwɔn nane e duk re a Dagwi fongol wɛt, yaga na be sila mɛ pyɛ de yɛn a ga kana sira, bê nɔng yaga fwôm Dagwi. Dagwi Darwey e kyɛ́ ɛ zakzak bemat de be ra fwom vwes gwane.

¹⁹“Ka sede hwà hwɔp a gwà mō WoIsrayɛl dyām, kɛ pyɛ cak ayi, hwo tɛ̀ ɛ a tala hwo na ndi wɛt.

²⁰Hwô tɔk tɛ̀ mwat duk a tala hwo ndi ko de gwà mō WoIsrayɛl wɛt. Gyeng redu remo, ko Dagwi Darwey, Dagwi mō a rɔda tɛ̀ nerat e ra kayɛ pyɛ de hwà rɔda ra e ji sevwel de hwà sé kyè wɔ̀ sey ɛ hɛ na hwo sangal ɛ.

²¹“Ka sede hwà sira hwo e ra pyɛ cak de hwô nɔ̂ng Dagwi Darwey, Dagwi mō, hwo tik nà sila sira mo wɛt. Yaga Dagwi Darwey a rɔda tɛ̀ hwo sila sira mo, ko a rɔda sè a hwo renɛn, sede hwà ra pyɛ mo wɛt.

²²Dagwi Darwey e tɛ̀, hwo sira a yɛ e ra pyɛ cak wɛt,

²³ko ka sede hwà sira e ra pyɛ cak na dî yey mō, ko a sé gbing-gbing na hwo ra pyɛ mo.

²⁴“Ka sede hwà sé kyè e gwong de gwa kwey e ji bwî anap mwat hwak, hwô tɔk re nèy anap o pyɛ de ya vey a hwo, ko hwo tɛ̀ nehak e ji dap mō wɛt.

²⁵“Ka sede hwà sé kyè e gwong e hwirî alkama mwat hwak, hwô tɔk hwɔlɔ yeneng o, ko hwo yɛt alkama mo na bwǎ wɛt.”