Read berom Bare Badu 24 Bible Online

Bare Badu 24 - berom bible

Bare Badu 24

¹Mose a yâng BeIsrayɛl, a ye: “Ka sede mwat a ra wenêng hwā hwak, ko e bama mo a to simo hɛ wɛt, yaga a sɛ̀ pyɛ cak de e simo wɛt e ra hwā mo. Yaga ano, a jɛk a yɛ bwok gâs weneng, a nɔng ɛ gwɛ, ko a tɛ̀ ɛ e gwong wɛrɛ.

²E bama mo, hwā mo a ra wenêng mwat hwak.

³Kɛ gyeng, rwas o a to ye e simo hɛ wɛt, a jɛk a yɛ bwok gâs weneng, a nɔng ɛ gwɛ, ko a tɛ̀ ɛ mɛ e gwong wɛrɛ, kɛ gyeng, rwas o a ku ayi.

⁴Ka sede pyɛ mo ya té ano, rwas mɛ wò mɛsɛng o ê tɔk to ra weneng mɛ wɛt, yaga a ga tɛ́ ɛ kyiri na yɛ. Ka sede a to ra wenêng hwā mo, ko pyɛ yane ya sé zakzak e nuyêl Dagwi Darwey, ko yin a rɔda tɛ̀ vwel de a nɔng in ligis.”

⁵Mose a re nuyel, a ye: “Ka sede mwat a mɛsɛ̂ng jut gwel, ba rɔda hwɔlɔ hɛ vɔk e de tô como kɛ e de fwôm repomo hwak wɛt. Ba rɔda tik ɛ nà ra fwom o shey hining, yaga na a sangal e lɔ, na a tɛ̀ gwel mɛ a vɔk yey pyɛng.

⁶“Ka sede hwà hwɔp a mwat pyɛ cak, hwo jut fwà hwongo kɛ vwɔ mo de e ra mɛ fwom, na hwo ka vɔk e tô pyɛ mo wɛt. Rá ano ha rɔda dul belɔ mo nà sɛ̀ pyɛ de yɛn ê re na be dal mɛ.

⁷“Ka sede mwat a vo gwà mɛ WoIsrayɛl, na a teshe na yɛ sede sam, kɛ a row ɛ e ji sesam, ba rɔda mɔrɔ hɛ. Yi na ra ano, yin a rɔda pat neves nemo e tē min.

⁸“Jeng de gwining e ji min a sé re yɔ́m na rɔ̂ hwô rebek ves, tik na a ra tyɛng pyɛ de bepiris vè yerê Levi ba yang ɛ a ra. A raa kayɛ pyɛ de ma ga misang a yɛ.

⁹Bàre hin na pyɛ de Dagwi Darwey, Dagwi min a kana ra a Miryam, e bama de yin á nusu yi e sevwêl Misra.

¹⁰“Ka sede hwà hwɔp a WoIsrayɛl pyɛ cak, hwo raa hɛ vɔk e ji lɔ mɛ, na hwo wɔ̀ sey lek de a rɔda nɔng o wɛt.

¹¹Gyeng e majey, na a vey nɔng o pyɛ mɛ.

¹²Ka sede yɛ a sé pwɛng, ko a nɔng o pyɛ banga mɛ e lek, hwo wɔ̀ pɔl na yɛ wɛt.

¹³Toyo a yɛ na pyɛ mo kanɛ nawiri, yaga na a bin sɛ̀ pyɛ banga mɛ. Yi ano, a rɔda feng a hwo, ko Dagwi Darwey, Dagwi mō a rɔda vɔk yey pyɛng na hwo arɔng.

¹⁴“Hwo kwon mɔt mwat de a sé pwɛng, e jama sɛlɛ, kɛ e ra fwom na hwo, kɛ a sé gwà mō WoIsrayɛl kɛ mwat duk de a sé sangal e repomo min rehak ow.

¹⁵Tala hɛ dyâm fwom de a ra tuk o gyam gwi gwo gaba. E simo dyām o, na a dal mɛ. Ka sede hwà tala hɛ wɛt, a rɔda tosho a Dagwi Darwey e ra hwo, ko renɛn o ra rɔda sè e ra hwo.

¹⁶“Ba rɔda mɔbɔs bedâ nèy yaga banɛn nèy mɛn wɛt, ko ba rɔda mɔbɔs nèy yaga banɛ̂n beda mɛn arɔng wɛt. Ba rɔda mɔrɔ mwat yaga nɛn de yɛ pyɛ mɛ a ra.”

¹⁷Mose a re nuyel, a ye: “Tik na yin gas badu e tē yaga kawɛ mwat, mwa na bemat beduk tanga nehyɛn. Yin sey ɛ pyɛ bangâ kuma, na yin ka vɔk e tô pyɛ de yin a hwɔp a yɛ wɛt.

¹⁸Bàre hin, yin á sè besam e sevwêl Misra, ko Dagwi Darwey, Dagwi min á sey ɛ hin na a hala hin washak. Yaga ano de ma sé nɔng in nu, na yin gyeng redu remo.

¹⁹“Ka sede yin a sê bwal e hwiri, ko yin a ye bam a rekús rehak, yin toyo na yin wɔ jut rɛ wɛt. Tík a bemat beduk, na nehyɛn tanga bekuma, yaga na Dagwi Darwey, Dagwi min a bin tɛ̀ nerat e ra yin e mwa fwom de yin e ra.

²⁰Ka sede yin a sé dak pwat, yin to raa na dâk nelang o zang ba wɛt. Tik bwang pyɛ de ya nàra ɛ yaga bemat beduk, na nehyɛn tanga bekuma.

²¹Ka sede yin a sé vos nèy anap e hiri min, yin to raa batin o wɛt. Tik nemɔ mo yaga bemat beduk, na nehyɛn tanga bekuma.

²²Bare hin, yin á sè besam e sevwêl Misra, yaga ano de ma sé nɔng in nu na yin gyeng redu remo.”