Read berom Bare Badu 25 Bible Online

Bare Badu 25 - berom bible

Bare Badu 25

¹Mose a yâng BeIsrayɛl, a ye: “Ka sede BeIsrayɛl beba ba sé ra shɔt na bemɛn, ko ba sey hâ hwak, ba gang hwak na yɛ.

²Ka sede ba yɛrɛ shɔt o wɔgɔ, ba dak womo de ba sɛ̀ ɛ na renɛn, ko tik na mwât shɔt o a tɛ̀ ɛ, a dyɛng gup na be de dak ɛ. Nepyak dák o nê sè tyɛng na yerê nɛn de a ra.

³Bê tɔk dak ɛ zang kuru banaas, ko he dal ano wɛt, yaga ka sede ha dal ano, ko gansa ê ra pyɛ de yê tɛ̀ be byɛs ɛ.

⁴“Jeng de hywàrak wa sé ra a hwo fwom, hwo bang nû wɛ wɛt.”

⁵Mose a re nuyel, a ye: “Ka sede begwa beba ba sé sangal e dem hining, ko hwak e ji mɛn a ku sana sɛ̀ hwêy wen, kuma mo a rɔda tɔk ra weneng na mwat de a sé wo lɔ mo wɛt. A sé e gwà rwas o de a rɔda vɔk ɛ.

⁶Hwêy wen hê mɛsɛng de yɛn ê tɔ na kuma mo ha rɔda sè hê mwat de a wey o, yaga na reza mɛ re re nuyel e ji BeIsrayɛl.

⁷Ka sede gwà mo a simo na a vɔk shin mɛ mo wɛt, hwā mo a rɔda wɔ na bemakuk e dura, a yang ɛn, ‘Gwà kwɔ̌ rwas hom a kyɛ́ ɛ nà vɔk me, na a ra fwom de gwa sé mwɛ e lɔ mó. A kyɛ́ ɛ nà sɛ̀ a gwà mɛ hwey wen de hê re nuyel na za mɛ e ji BeIsrayɛl.’ Ko bemakuk o ba rɔda yila gwà mo, na be ha na yɛ. Ka sede a kyɛ́ ɛ nà vɔk ɛ gbak,

⁹ko shin mɛ mo a rɔda wɔ̀ sɛ̀ ɛ e nuyêl bemakuk o, a rɔda pat kpatak gwining yi e bwôl shin mɛ mo, a tulus a yɛ netey e bayis, ko a ye, ‘Pyɛ ma yemo de be ra na mwat de a kyɛ́ ɛ nà ye cik a gwà mɛ lɔ!’

¹⁰Ba rɔda yila lɔ mɛ e ji BeIsrayɛl na rezâ, ‘Lɔ̂ mwat de ba ga pat kpatak mɛ.’ ”

¹¹Mose a re nuyel, a ye: “Ka sede bemat beba ba sé ra yol, ko hwâ gwining e ji mɛn de e simo a sɛlɛ rwas mɛ, a wɔ̀ kaba lyôk sâ yol mɛn,

¹²kpɔktɔ hin vwɔ mɛ, yin wok nemwishish mɛ wɛt.

¹³“Yin vɔk pyɛ̂ masâ nedirik bya e ji pyɛ́ min kɛ neshǐ masâ pyɛ́ neba, e nelɔ min na yin mɔt mɛ bemat wɛt.

¹⁵Rá in fwom na yemo de ya sé tyɛng, ko ya sé mwin arɔng. Ano, nepɔlɔ min nê gwɛ̌ hɛn e sevwel de Dagwi Darwey, Dagwi min a sé nɔng in.

¹⁶Dagwi Darwey e kyɛ́ ɛ zakzak bemât mɔ̂t bemat.”

¹⁷Mose a re nuyel, a ye: “Bàre hin na pyɛ de BeAmalɛk bá ra a yin e bama de yin á nusu yi e Misra.

¹⁸Yɛn a hwo in na jugu e bama de yin a ga ruru, ko yin a ga tɛ́ in gbɛrɛk, ko yɛn á mɔbɔs mwa vemo de ba rɔ̌ hwɔlɔ bol e bama. Yɛn a ra ano, yaga pyɛ mɛn ya sé na Dagwi wɛt.

¹⁹Yaga ano, jeng de Dagwi Darwey, Dagwi min a rɔda nɔng in sevwel o, ko a ga tik in, yin sangal tyang yi e bemât repugu de ba gwɔrɔ hin, yong in na yin a mɔbɔs BeAmalɛk mwa hwiri, na be to bare na yɛn wɛt. Yin ye bam wɛt!”