Read berom Bare Badu 26 Bible Online

Bare Badu 26 - berom bible

Bare Badu 26

¹Mose a yâng BeIsrayɛl, a ye: “E bama de yin a ga sey ɛ sevwel de Dagwi Darwey, Dagwi min a sé nɔng in na yin sangal ɛ,

²kawɛ e ji min a rɔda tɛ̀ pyɛ́ de ya tānga vel yê kayɛ pyɛ de a yɛt bwal o e ji shap, ko a kyè mɛ vɔk e kwɔn de Dagwi Darwey, Dagwi min ê kasa na be re a yɛ fongol.

³A rɔda wɔ na piris de a ra fwom e jeng o, a yang ɛ, ‘Yunung, ma sé ha e nuyel Dagwi Darwey, Dagwi mō, ma ga yel e sevwel de a kana sira a beda mot na a nɔng ot.’

⁴“Piris o a rɔda sey shap o yi na yɛ, ko ê tik yɛ e nuyêl gàgbang rangâs yas vɔk na Dagwi Darwey, Dagwi min.

⁵Ano, mwat de a vey na shap o a rɔda ha e nuyêl Dagwi Darwey, Dagwi min a ye, ‘Dâ beda hom á sè WoAram de á kyě kyè, ko á jut belɔ mɛ a wɔ̀ sangal mɛ e Misra. Yɛn á sè bemat tyɔng zɔng, jeng de yɛn á kyè vɔk e hwomo, ko yɛn á wɔ̀ tɛ́ ɛn yere ryey, ye gap arɔng.

⁶Ko BeMisra bá midra hot tyɔng wɛt, ko bá tɛ̀ ot wot a ra fwom pwep.

⁷E bama mo, wot á tosho a hwo à Dagwi Darwey, Dagwi wo bedabeda mot, na hwo sɛlɛ hot. Hwà wok ot, ko hwà di yerê neves de ba ra a wot, na negbang de wot á sɔ, tanga begwong de bá tak a wot.

⁸Hwà nusu na wot yi e Misra na gbɔng reto mō na gap mō arɔng. Hwà ra pyɛ̂ langat na pyɛ̂ bes, ko hwà tɛ̀ pyɛ́ vyes detidetu ye té.

⁹Hwà vey na wot e ngamo, hwà nɔng ot vwel de ha siri, ko he nɔngɔs pyɛ́ shɛrɛk.

¹⁰A remo, ma vey na pyɛ́ de ya tānga vel e hiri de hwo à Dagwi Darwey hwà nɔng me.’ “Ano kwong, mwat o a rɔda tik shap o e nuyêl gàgbang rangâs yas o, na a re a Dagwi Darwey fongol e hwomo.

¹¹Ko a rɔda vɔk yey pyɛng na mwa pyɛ́ ryat de Dagwi Darwey, Dagwi min a ga nɔng ɛ na belɔ mɛ. Ko tik in BeLevi na bemât yére dyuk de ba sé sangal na yin be ra nzem o tanga yin.”

¹²Mose a re nuyel, a ye: “E kahɛ shey hê netat, nɔng in pyɔlɔ, yɛ a pyɛ jining e ji pyɛ́ kuru yê pyɛ̂ hiri min. Yin ê nɔ̂ng BeLevi, na bemât yére dyuk, na nehyɛn tanga bekuma pyɛ́ mo, yaga na yɛn a bin sɛ̀ pyɛ́ de yɛn ê re e bapomo min. Jeng de yin a ga ra ano,

¹³ko yin yâng Dagwi Darwey, ‘Vit a pyɛ de ya sé myo de ya tɛ́t ɛ e lɔ hom. Ma ga nɔ̂ng BeLevi, na bemât yére dyuk, na nehyɛn tanga bekuma yɛ tyɛng na pyɛ de hwà nɔng nu na me ra. Ma ga tik nà gyeng kɛ ma ye bam a redu mō rehak e ra rehâ pyɔlɔ wɛt.

¹⁴Ma ga re pyɛ́ mō cak e jeng de má sè sesin wɛt. Jeng de má sè ligis, ma ra yɛ wɛt, ko ma nára cak nɔrɔ vɔk na mwat de a ga ku wɛt. À Dagwi Darwey, ma ga gyeng ha mo myak. Ma ga ra kayɛ pyɛ de hwà nɔng nu e ra yɛ.

¹⁵Bɛrɛng hot yi e kwɔ̂n jɛrɛ mō e lagwi, na hwo tɛ̀ nerat e ra wot, bemat mō BeIsrayɛl. Tɛ̀ nerat e ra vwel de hwà nɔng ot, hemo de ha siri, ko he nɔngɔs pyɛ́ shɛrɛk, sede remo de hwà kana sira a bedabeda mot.’ ”

¹⁶Mose a re nuyel, a ye: “Yunung, Dagwi Darwey, Dagwi min a ga nɔng in nu, na yin gyeng badu mɛ mwa. Gyeng in vɛ na yey min mwa, na simo min mwa.

¹⁷Yunung, yin a ga ha wɛshɛrɛk, Dagwi Darwey a sé Dagwi min, ko yin a ga sira, na yin a raa ha mɛ, yin gyeng badu mɛ mwa, na yin ra kayɛ pyɛ de a nɔng in nu e ra yɛ.

¹⁸Ko yunung, Dagwi Darwey a ga ha wɛshɛrɛk, yin a se bemat vê yey mɛ, sede remo de a sira a yin, ko a nɔng in nu, na yin a gyeng badu mɛ mwa.

¹⁹Yɛ Dagwi Darwey a yong mwa yére bemât jey, ko a rɔda tɛ̀, yin vɔk reza de ra dal rê bwang o mwa. Bê somo hin, bê nɔng in nerey de na dal mwa. Yin ê se vê Dagwi Darwey, Dagwi min yɛ nju mɛ, tyɛng sede remo de a ga sira hɛ.”