Read berom Bare Badu 27 Bible Online

Bare Badu 27 - berom bible

Bare Badu 27

¹Mose na bemakûk BeIsrayɛl ba tumal e nuyel bemat mwa, a hwo yâng ɛn, “Gyeng in badu mwa de ma sé nɔng in nu yunung.

²Tuk de yin a rɔda ba ye dɔ a Rɔt Yɔrdan, na yin a yel e ji sevwel de Dagwi Darwey, Dagwi min a sé nɔng in, hashe hin beta berey o na yin tɛ̀ vɛ cik, yin lolom vɛ na būm.

³Ka sede yin a wul, ko yin jɛk mwa badu vemo e ra vɛ. E bama mo, yin ê yel e vwel hemo de ha siri, ko he nɔng pyɛ́ shɛrɛk. Hɛ à vwel de Dagwi Darwey, Dagwi wo bedabeda min a ga sira na a nɔng in.

⁴E bama de yin a ga wɛrin e gura gworo gwô Rɔt Yɔrdan, tɛ̀sɛ hin beta mo e ra Raku Ɛbal, sede remo de ma sé nɔng in nu yunung, ko yin de lolom vɛ na būm.

⁵E hwomo, lɔk in gàgbang rangâs yas vɔk na Dagwi na beta de ba yong na pyɛ̂ fwom yê dyam wɛt.

⁶Lɔk in hɛ na beta de ba dak vɛ wɛt. Yin a rɔda nása nenɔrɔ̂ yas burang e ra hɛ.

⁷Yin ê nása nenɔrɔ̂ wuna nesa arɔng, ko yin ê re banama mo na yey pyɛng e nuyêl Dagwi Darwey, Dagwi min.

⁸Ko yin a rɔda jɛk ɛ wɛshɛrɛk karɛ retin hâ badu Dagwi e ra beta de yin a ga lolom o.”

⁹E bama mo, Mose na bepiris vê yerê Levi ba tumal e nuyel mwa BeIsrayɛl, ko a yang ɛn, “Ala in à BeIsrayɛl ɛ! Wet in betong. Yunung, yin a ga tɛ́ in bemât Dagwi Darwey, Dagwi min.

¹⁰Yaga ano, wok in ha mɛ, na yin a gyeng mwa badu mɛ de ma sé nɔng in nu e ra vɛ yunung.”

¹¹Tuk hane mo, Mose a to yâng bemât Israyɛl,

¹²“Bama de yin a ga ye dɔ à Rɔt Yɔrdan, yére Simɛyɔn, na Levi, na Yuda, na Isakar, na Yɔsɛf tanga Bɛnyamin ya rɔda tumal e ra Raku Gɛrizim, na ye mok a BeIsrayɛl nerat.

¹³Ko yére Rubɛn, na Gat, na Ashɛr, na Zɛbulun, na Dan tanga Naftali ya rɔda tumal e ra Raku Ɛbal, na ye mok a yɛn gawey.

¹⁴BeLevi ba rɔda ha neha nemo ngyat-ngyat:

¹⁵“ ‘Gawey e ra mwat de a yong pyɛ sekwit na cɔgɔt kɛ dyam, na a re a yɛ fongol e lɛrɛ! Dagwi Darwey e kyɛ́ ɛ zakzak yerê pyɛ́ yemo de mwasi a yong.’ Ko bemat o mwa ba rɔda toyo mɛ, bê ye, ‘Ano.’

¹⁶‘Gawey e ra mwat de a byɛs da na neng mɛ!’ Ko bemat o mwa ba rɔda toyo mɛ, bê ye, ‘Ano.’

¹⁷‘Gawey e ra mwat de a gwɛ̌ sek tô cap mwât vwara mɛ.’ Ko bemat o mwa ba rɔda toyo mɛ, bê ye, ‘Ano.’

¹⁸‘Gawey e ra mwat de a dura a bwók gwong duk o!’ Ko bemat o mwa ba rɔda toyo mɛ, bê ye, ‘Ano.’

¹⁹‘Gawey e ra mwat de a tik nà gas a bemat beduk na nehyɛn tanga bekuma shɔt e tē!’ Ko bemat o mwa ba rɔda toyo mɛ, bê ye, ‘Ano.’

²⁰‘Gawey e ra mwat de a byɛs da mɛ yi na dyɛng na hwak e ji beha mɛ!’ Ko bemat o mwa ba rɔda toyo mɛ, bê ye, ‘Ano.’

²¹‘Gawey e ra mwat de a dyɛng na ngyama!’ Ko bemat o mwa ba rɔda toyo mɛ, bê ye, ‘Ano.’

²²‘Gawey e ra mwat de a dyɛng na gwà jim mɛ hwong o kɛ gwà mɛ e da mɛn!’ Ko bemat o mwa ba rɔda toyo mɛ, bê ye, ‘Ano.’

²³‘Gawey e ra mwat de a dyɛng na gùna mɛ.’ Ko bemat o mwa ba rɔda toyo mɛ, bê ye, ‘Ano.’

²⁴‘Gawey e ra mwat de a mɔrɔ mwat e lɛrɛ.’ Ko bemat o mwa ba rɔda toyo mɛ, bê ye, ‘Ano.’

²⁵‘Gawey e ra mwat de a sey dyām, yaga na a mɔrɔ mɛ mwat de a ra nɛn hak wɛt.’ Ko bemat o mwa ba rɔda toyo mɛ, bê ye, ‘Ano.’

²⁶‘Gawey e ra mwat de a kyɛ́ ɛ nà gyeng badu vemo, na a raa vɛ wɛt!’ Ko bemat o mwa ba rɔda toyo mɛ, bê ye, ‘Ano.’ ”