Read berom Bare Badu 28 Bible Online

Bare Badu 28 - berom bible

Bare Badu 28

¹Mose a yâng BeIsrayɛl, a ye: “Ka sede yin a wok hâ Dagwi Darwey, Dagwi min, na yin gyeng naka nu de ma sé nɔng in yunung, a rɔda tɛ̀, yin dal mwa yére bemât jey na nerey.

²Gyeng in hâ Dagwi Darwey, Dagwi min, ko ê tɛ̀ nerat e ra yin e begwong detidetu:

³“A rɔda tɛ̀ nerat e ra tom de be re e bapomo na vemo de be ra e hey.

⁴“A rɔda nɔng in nèy pyak. Yin ê sɛ̀ pyɛ̂ hwiri shɛrɛk, ko berɔndɔng na vyēl min ba rɔda vɔk nèy pyak arɔng.

⁵“A rɔda tɛ̀ nerat e ra pyɛ̂ yeneng min tanga e ra pyɛ́ de yin ê kyé na yɛ.

⁶“A rɔda tɛ̀ nerat e ra kayɛ pyɛ de yin e ra.

⁷“A rɔda nɔng in wɛng jeng de bemât repugu min ba hwo in na como. Yɛn a rɔda hwo in yi e bak gwining, ko yɛn a rɔda tele yi na yin e bebak detidetu.

⁸“Dagwi Darwey, Dagwi min a rɔda tɛ̀ nerat e ra mwa fwom de yin e ra, ko a sila begban min na pyɛ̂ yeneng. A rɔda tɛ̀ nerat e ra yin e sevwel de a sé kyè wɔ nɔng in.

⁹“Ka sede yin a gyeng badu Dagwi Darwey, Dagwi min, na yin a raa ha mɛ, ko a rɔda tɛ̀ in, yin a sè bemat mɛ, sede remo de a ga kana sira a yin.

¹⁰Ano kwong, yére bemât jêy mwa ya rɔda di, a sé e Dagwi Darwey de a ga kasa hin, na yin a sè bemat mɛ, ko yê wok bengyip min.

¹¹Dagwi Darwey a rɔda nɔng in nèy pyak, na yas pyak, na pyɛ̂ hwiri pyak e vwel de á sira a bedabeda min, na a nɔng in.

¹²A rɔda tomo a yin na rwak e ji jeng yi e lagwi, kwɔn de a tik ɛ wɛ sede pyɛ́ e gban mɛ. Ano, ê tɛ̀ nerat e ra fwom mwa de yin e ra. Yin ê vɔk yas pyak de yin ê hwɔp a yére bemât jey cak, ko yin ê jama hwɔpɔ yaga bato min wɛt.

¹³Ka sede yin a gyeng naka mwa badu de ma sé nɔng in nu e ra vɛ yunung, Dagwi Darwey, Dagwi min a rɔda tɛ̀, yin sè vê nuyêl e ji yére bemât jey mwa ko vemo de bê raa yɛ̄ wɛt. Yin ê dopse vɔk pyɛ̂ nedanerey, ko yin ê se bepɛng wɛt.

¹⁴Ko yin tik nà raa gwong de ma sé dura a yin, yin re a cī fongol arɔng wɛt.”

¹⁵Mose a re nuyel, a ye: “Ka sede yin a kyɛ́ in nà wok hâ Dagwi Darwey, Dagwi min, na yin gyeng naka mwa badu mɛ vemo de ma sé nɔng in nu e ra vɛ yunung, ko gawey hemo ha rɔda hwo e ra yin:

¹⁶“Gawey e ra tom de be ra e bapomo na vemo de be ra e hey.

¹⁷“Gawey e ra pyɛ̂ yeneng min tanga e ra pyɛ́ de yin ê kyé na yɛ.

¹⁸“Gawey e ra yin, yin a rɔda vɔk nèy tyɔng. Yin ê sɛ̀ pyɛ̂ hwiri tyɔng, ko berɔndɔng na vyēl min ya rɔda vɔk nèy tyɔng arɔng.

¹⁹“Gawey e ra kayɛ pyɛ de yin e ra.

²⁰“Ka sede yin a ra neves, yaga yin a kyɛ́ in Dagwi Darwey, ko a rɔda vey na gawey, na reyɔm, ko a tɛ̀, yin ra kayɛ pyɛ kpɛɛ. Ba rɔda wey na yin mwa e ji jeng tyɔng.

²¹A rɔda tomo tumbang de wô hala hin wɛt, sɛ̌ wa tala kawɛ e ji min yi e vwel de yin a sé kyè wɔ̀ sey ɛ hɛ, na yin sangal ɛ.

²²Dagwi Darwey a rɔda tɛ̀ nerɔ de ne tē dɔ, ne hwo e ra yin, nedem min nê pus, ko yin ê fes mɛ arɔng. A rɔda tomo na nehwogot tanga gûl rak mwa na mbùl na gwo wey na pyɛ̂ hiri min. Pyɛ̂ rezot yemo ya rɔda tak a yin pere vɔk e jeng reku min.

²³Rwak wô rop wɛt, ko vwel hê hworok, hê tɛ́ ɛ kashalang sede gbondong.

²⁴E tô rwak o, Dagwi Darwey a rɔda tomo na búm tanga wúla, sɛ̌ ba wey na yin mwa vit.

²⁵“Dagwi Darwey a rɔda nɔ̂ng vɛ repugu min wɛng e ra yin. Yin a rɔda hwo ɛn na como yi e bak gwining, ko yin a rɔda tele yi na yɛn e bebak detidetu. Jeng de bemât jey mwa bê di pyɛ de ya sé té na yin, yɛn ê vo bengyip ding-ding.

²⁶Jeng de yin ê kushu, benon na ngyāma ya rɔda vey re banama min, ko vit a mwat de ê shira vɛ.

²⁷Dagwi Darwey a rɔda tɛ̀ bebweykanang be hwo, sede remo de á kana ra a BeMisra. A rɔda tɛ̀ benot be hwo e ra yin, wá ha rɔda re in, babek min bê sos tyɔng wɛt, ko yin ê tɔk tɛ̀ tyang wɛt.

²⁸Dagwi Darwey a rɔda tɛ̀, yin tē how, ê tɛ̀ nebùga ne hwo e ra yin, na a sè a yin kpɛɛ.

²⁹E tê-gwi, yin a rɔda kyě ra kìkap, sede bebók de be tɔk gas nagwi na naturuk wɛt. Ko yin ê di wɛng e ji pyɛ́ de yin e ra wɛt. Bemat bê dopse mɔt in, bê seres ɛ pyɛ́ min na gap, ko vit a mwat de ê sɛlɛ hin.

³⁰“Gwining e ji min a rɔda hwono hwong, ko e mwat duk de ê dyɛng na yɛ. Hwak a rɔda lɔk lɔ, ko ê sang sangal e hɛ wɛt. A rɔda tus bwî anap, ko a rɔda re nèy o wɛt.

³¹Ba rɔda yɛt berɔndɔng min e bayis min, ko yin ê re cɛ̂k nama mo cak wɛt. Bê sey ɛ bemadung min be kyè mɛ e bayis min, ko bê toyo a yin na vɛ wɛt. Ba rɔda nɔ̂ng bemât repugu min vyēl min, ko vit a mwat de ê sɛlɛ hin.

³²Bê nɔ̂ng bemât yére dyuk nèy min bewen na behwong sede besam, ko yin sè bɛrɛng zɔng. Yin sǎ e de paa bayis min kahɛ tuk e de bɛrɛng gwông toyô nèy min, ko wís.

³³Bemât yére dyuk ba rɔda hashe pyɛ̂ cap de yin a ga pɛngɛ hin e de how o, ko ba rɔda tala hin na pyɛ cak wɛt, sɛ̌ bê midra hin zɔng, bê tak a yin reyɔm.

³⁴Bɛ́rɛng pyɛ́ yemo yê tɛ̀, a tang in how.

³⁵Dagwi Darwey a rɔda tɛ̀ bebweykanang de be royo pep be hwo e ra bol min, bê re rebek min yi e rato vɔk e tas bol, ko yin ê tɔk tɛ̀ tyang wɛt.

³⁶“Dagwi Darwey a rɔda jut in, yin na gbɔng gwɔ̀m min vɔk e vwel duk hinde yin kɛ bedabeda min ba ga sang tɔk hɛ wɛt. E hwomo, yin a rɔda re a pyɛ̂ sekwit de ba yong na cɔgɔt tanga beta fongol.

³⁷A rɔda sè a bemât bavwel de Dagwi Darwey a rɔda shara hin ɛ kpɔrɔk e ra pyɛ de ya té na yin. Yɛn ê byɛs in ko bê teshe na yin.

³⁸“Yin ê wɔ̀ tus yére pyak, ko bwal o gwô sè hyehyet zɔng, yaga rawal wô re pyɛ́ mo.

³⁹Yin ê tus bě anap, yin bɛrɛng vɛ naka, ko yin ê vos nèy anap o kɛ yin sɔ nshi mo wɛt, yaga bekǔt bê re batîn anap o.

⁴⁰Batîn pat bê tabas e kahɛ kwɔn e vwel min, ko yin ê sɛ̀ něy o na yin mɔmɔ wɛt, yaga cúyu mo yê tē zùt.

⁴¹Yin ê vɔk nèy bewen na behwong, ko nà rɔda sè na yin wɛt, yaga bê hashe nɛ e jugu vɔk e de sesam.

⁴²Yɔrɔ yê re batîn cɔ́gɔt min na pyɛ́ hiri min hywiri.

⁴³“Bemât yére dyuk de ba sé sangal e vwel min ba rɔda gwɛ̌ sɛsɛm reto, ko remin rê sǎ e de tɛrɛs hɛ.

⁴⁴Yɛn a rɔda sè e ra yin yaga dyām de bê hwɔpɔs a yin, ko yin mwa yin ê sè e nɛn mɛn. Yɛn a rɔda sè vê nuyêl e ji yére bemât jey mwa ko yin a rɔda sè vemo de bê raa yɛ̄.

⁴⁵“Gawey hemo mwa ha rɔda hwo e ra yin, ko hê sǎ e de tak a yin sɛ̌ ha wey na yin pyɛt, yaga yin a gyeng hâ Dagwi Darwey, Dagwi min wɛt, na yin raa mwa badu de a nɔng in nu e ra vɛ wɛt.

⁴⁶Silâ gawey o ha rɔda sè pyɛ nuhâ shɔt Dagwi e ra yin na yére min nesheneshey.

⁴⁷Mwa ano de Dagwi Darwey a ga tɛ̀ nerat e ra yin e kagwɛ gwong, ko yin a kyɛ́ in nà ra a yɛ fwom na yey pyɛng na feng a yɛ arɔng.

⁴⁸Yaga ano, yin ê ra a bemât repugu de Dagwi Darwey ê tomo e ra yin fwom. Yin a rɔda vɔk vyong, na yêy hwɔshɔ ko yin ê sè kpimit arɔng, yin ê jama kayɛ pyɛ. Dagwi Darwey ê ngyɔ hin na swesêk vɔk besam sɛ̌ ba wey na yin pyɛt.

⁴⁹Dagwi Darwey a rɔda vey na yere cak yikyik yi e yɛnɛ̂ jey ko yê ha lem de yin a tɔk wɛt na ye vɔk reto e ra yin. Yɛn a rɔda hwo e ra yin sede kim.

⁵⁰Bemât yere mo bê vɔk yey pep, ko bê nɔ̂ng mwat hwak nerey kɛ be wok nemwishish mɛ wɛt, kɛ bwôt mwat kɛ mwakuk ayi.

⁵¹Yɛn a rɔda re yas min na pyɛ̂ hiri min, ko yin ê kushu na vyong. Yɛn ê tɛ́t a yin pyɛ̂ yeneng, kɛ nshî anap, kɛ něy pwat, kɛ berɔndɔng, kɛ vyēl wɛt, sɛ̌ yin a pere wɔ̀ kushu vit.

⁵²Yɛn a rɔda hwo e ra karɛ repomo e ji sevwel de Dagwi Darwey, Dagwi min a sé nɔng in, ko yɛn ê gangas nekwɔn dal na bejwâ-pomo mo de yin a tɛ̀ gap min e ra vɛ.

⁵³“Jeng de vê repugu min ba ga rɔnɔ bapomo min o, be ngyɔ in ko yin ê re nèy jim min — banamâ nèy bewen na behwong min nemo de Dagwi Darwey, Dagwi min a nɔng in.

⁵⁴Mwât yey ryat, wo nehywɛ e tē min a rɔda wok nemwishish gwa jim mɛ wɛt, kɛ ne hwâ yey mɛ, kɛ bwang nèy mɛ neken o,

⁵⁵na a nɔ̂t hwak e ji mɛn namâ nèy mɛ de a sé re wɛt, yaga vit a bwang pyɛ cak de ya pɔl a yɛ, yaga rezot de e sɔ a remo de bemât repugu min ba ga rɔnɔ bapomo min o mwa.

⁵⁶Hwâ yey ryat wo nehywɛ e tē min, womo de yaga yerê yey ryat na nehywɛ mɛ na tɔ̂k pyɛ́ mɛ a rɔda wok nemwishish rwâs yey mɛ na nèy tɔ́ mɛ wen na hwong,

⁵⁷nà nɔt ɛn gwolwèk jim mɛ tanga nèy de yɛ pyɛ mɛ a tɔs nɛ, yaga e simo na a de re gwɛ mwa na nèy mɛ mo nju mɛ e lɛrɛ, remo de ba ga rɔnɔ repomo mɛn o, yaga yerê rezot de bemât repugu mɛn ba nɔng ɛn yi na rɔnɔ̂ bapomo min o.

⁵⁸“Ka sede yin a gyeng na tsak o, mwa pyɛ́ de Dagwi a basa a yin, yemo de ba jɛk e ji bwok-basa gwomo, ko ka sede yin a nɔ̂ng rezâ Dagwi Darwey, Dagwi min remo de ra sé pyɛ langat ye bengyip nerey wɛt,

⁵⁹ko yɛ ê tomo a yin tanga yére min nerɔ de ne tɛ̀ tyang wɛt tanga betumbang beves de be tɔk tala hɛn arɔng wɛt.

⁶⁰A rɔda to vey a yin na mwa nerɔ neves de yin á sɔ rezot na nɛ e Misra, ko nê nàra e ra yin.

⁶¹A rɔda to tomo e ra yin mwa yerê nerɔ na betumbang de ba ha hâ vɛ e bwok-basa gwomo gwo badu na basâ Dagwi, ko e bama mo bê ba wey na yin hywiri.

⁶²Mwa ano de yin ê tɛ́ in pyak sede netangacɛn e lagwi, ko tyɔng e ji min zɔng de bê dal, yaga yin a kyɛ́ in nà gyeng hâ Dagwi Darwey, Dagwi min.

⁶³Sede remo de a jam a Dagwi Darwey, na a tɛ̀ in yin sɛ̀ pyɛ̂ nedanerey na a gwɛ̌ nepyak min, a sé ano de ê jam a yɛ na a wey na yin na a vey na gawey e ra yin arɔng. Bê ba luyu hin yi e vwel de yin a sé kyè wɔ̀ sey ɛ na he sè nap min.

⁶⁴“Dagwi Darwey a rɔda shara hin e ji yére bemât jey, yi e yɛnɛ̂ jey hê bak womo vɔk e hê bak woro, ko e hwomo yin ê ba re a cī de ba yong na cɔ́gɔt tanga beta fongol, cī yemo de ya ga sang ra a yin kɛ bedabeda min pyɛ cak wɛt.

⁶⁵Yin ê sɛ̀ yêy dyɛngɛ e kwɔn hak wɛt, ko yin ê vɔk kwɔn hak de yin ê ye ha sé min wɛt. Dagwi Darwey a rɔda tɛ̀ nemi ne kyě gabsa a yin e yey, ê sè a yin kpɛɛ, ko yin ê yɛ waa a bato min.

⁶⁶Neken min na rɔda sè e ji reyɔm kayɛ jeng. Nagwi na naturuk yin a rɔda sǎ e de vôs bengyip, ko yin ê sǎ e ji bengyip reku.

⁶⁷Yey min yê sǎ e de dak na bengyip e ra kayɛ pyɛ de yin a di. Nagasi yin ê mok ka nawiri na ga pom, ko nawiri yin ê mok ka nagasi na ga pom.

⁶⁸Dagwi Darwey, a rɔda to tomo hin vɔk e Misra e ji bedwa-nshi, mwa ano de ma ga kana ye, yin ê sang to wɔ́ e hwomo wɛt. E hwomo yin ê jama yin row bato min na vê repugu min na yin sè besam mɛn, ko bê sɛ̀ mwat de ê simo a sey in wɛt.”