Read berom Bare Badu 29 Bible Online

Bare Badu 29 - berom bible

Bare Badu 29

¹Vemo vɛ à batin hâ wuna-na-sira de Dagwi Darwey a nɔ̂ng Mose nu na a ra na bemât Israyɛl e sevwel Mowap, Dagwi Darwey a gwɛ̌ wuna-na-sira hemo e ra hinde á kana ra na yɛn e ra Raku Sinai.

²Mose a tula bemât Israyɛl mwa ko a yang ɛn, “Yin pyɛ min yin á di pyɛ de Dagwi Darwey á ra na gbɔng gwɔ̀m Misra, na bemât nuyel mɛ tanga mwa bemât sevwêl Misra mo.

³Yin á di betumbang beves, na pyɛ̂ bes, na gbɔng pyɛ̂ langat de Dagwi Darwey á ra.

⁴Ko pere vey e yunung, Dagwi Darwey a ga nɔng in yey de yê tɔk cap-ha mo, kɛ bayis de bê di yɛ, kɛ betong de bê wok yɛ arɔng wɛt.

⁵“Neshey kuru banaas me Dagwi Darwey ma kyè na yin e hey, ko berugu min kɛ bekpatak min bá hama hɛn wɛt.

⁶Yin á sɛ̀ kpam-tuk de yin ê re kɛ nshî anap, kɛ nshi de ne tɛ̀ sefeng na yin sɔ wɛt, yaga na a basa a yin, e mɛ de ma sé Dagwi min.

⁷Ko jeng de yin á wul kwɔn hemo, Gbɔng Gwɔ̀m Sihɔn wo Hɛshbɔn na Gbɔng Gwɔ̀m Ɔk wo Bashan bá nusu na be tó como na wot. Ko wot á re ɛn,

⁸wot á sey ɛ̀ vwel mɛn, ko wot á gas a yerê Rubɛn, na Gat tanga rebit Manase hɛ.

⁹Yaga ano, gyeng in na tsak o batîn hâ wuna-na-sira hemo, yaga na yin a di wɛng e kayɛ pyɛ de yin e ra.

¹⁰“Yunung yin a sé tumal e nuyêl Dagwi Darwey, Dagwi min, mwâ hin bemât nuyêl yére min, na bemakuk, na bemât nuyêl tom, na mwa beras Israyɛl,

¹¹na nèy, na bemât yére dyuk de ba sé sangal na yin, de be tow a yin cɔ́gɔt na be vos a yin nshi.

¹²Yin a sé e ngamo yunung na yin wuna hin na sira hemo de Dagwi Darwey, Dagwi min, a sé ra na yin tanga gawey o arɔng,

¹³yaga na Dagwi Darwey a bin nɔng in nuha hemo wɔgɔ, yin a sé yerê bemat jey mɛ, ko yɛ a sé Dagwi min, sede remo de a ga kana sira a yin na bedabeda min Abraham, na Yishak tanga Yakɔp.

¹⁴A sé e yin nju min zɔng wɛt de ma sé wuna hin na sira hemo tanga gawey o,

¹⁵ma sé ra hɛ na wot mwa de wot a sé tumal e ngamo e nuyel mɛ yunung, mwa tanga yere min de ya sé e ngamo wɛt.

¹⁶“Bare hin na yerê sangal mot e Misra tanga yere kwɛngɛl de wot á ra wot kyě kyesem e yɛnɛ bavwêl bemât yére cak.

¹⁷Yin á kyě bɛrɛng yerê pyɛ̂ sekwit mɛn vyes de ba yong na cɔ́gɔt, na beta, na dyam pyɛng tanga dyam shinang.

¹⁸Tē in naka na rwas hwak kɛ hwā, kɛ bemât lɔ hak, kɛ vê yere cak, de ba sé e tumal e ngamo yunung be doyo a Dagwi Darwey, Dagwi mot bama, na be re a pyɛ̂ sekwit yê yére dyuk cak fongol. Ka sede hwak e ji min a ra ano, ko ê sè sede tîn cɔgɔt de nèy o ne reneng kpashak, ko na vɔk nedɔm arɔng.

¹⁹Sede mwat yerê womo a wok neha gawey nemo, a tɛ̀ a tó mɛ nerat, ko a rɔda bare, ‘Kayɛ pyɛ ya rɔda sè a me gyat, mwa ano de me re nuyel e de râ pyɛ́ de yey hom ye simo.’ Ra ano ha rɔda vey na gawey e ra vwel de he sɛsɛm rwak tanga hemo de ha sé hwɔ́k-hwɔk.

²⁰Dagwi Darwey ê sang simo a hala a mwat o wɛt, ko shom mɛ na repugu mɛ yê hwo e ra yɛ. Gawey hemo de ba jɛk e ji bwok-basa gwomo mwa ha rɔda kaba hɛ, ko Dagwi Darwey ê wey na reza mɛ e jey.

²¹Dagwi Darwey a rɔda pat ɛ nju mɛ yi e yére BeIsrayɛl na be nɔng ɛ rezot tyɛng na gawey hê wuna-na-sira de ma jɛk e ji bwok-basa badu gwomo.

²²“Nèy min ne yere de ye kyè vey tanga bemât yére dyuk de ba rɔda yi e bavwêl yikyik, bê ba di gawey de ha hwo e ra vwel o tanga nezap nerɔ de Dagwi Darwey a tak a yin na nɛ, ko yɛn ê ye,

²³Vwel o mwa ha sé re kyâ negang na nevwashe! Vit a pyɛ de yê ta, vit a pyɛ de yê tulu, ko vit a sɔng e ji hɛ. Gawey o hê sè sede hê Sɔdɔm na Gɔmɔra, Adma na Zɛbɔyim vemo de Dagwi Darwey á wey na vɛ e ji shom mɛ.

²⁴Yére bemât jey mwa ya rɔda rangal, yē ye, ‘Yaga sɛ́ de Dagwi Darwey a ra na vwel o ano ɛ? Yaga sɛ́ de a tɛ̀ shom mɛ ye tē puu ano ɛ?’

²⁵“Ba rɔda toyo a yɛn ngan, ‘A sé yaga bemat o ba kyɛ́ ɛn nà raa wuna-na-sirâ Dagwi Darwey, Dagwi wo beda mɛn, hemo de á kana ra na yɛn jeng de á nusu na yɛn yi e sevwêl Misra.

²⁶Yɛn a kyè ba wɔ̀ re a cī fongol, ba tē a yɛ guduruk, cī yemo de ya ga sang ra a yin pyɛ cak wɛt, ko e yɛ̀ de á nɔng ɛn yɛ wɛt.

²⁷Yaga ano, shôm Dagwi Darwey yá tē puu e ra vwel o, ko á tɛ̀ nezap gawey de ba jɛk e bwok-basa gwomo ne hwo e ra hɛ.

²⁸Dagwi Darwey a lùt ɛn yaga nepêp shom mɛ, de ya tē puu, na gbɔng lashê yey mɛ yi e vwel mɛn o, ko a wɔ̀ shara hɛn e vwel hak duk o, sede remo de yɛn a sé ɛ̀ yunung.’

²⁹Pyɛ́ cak ya sé de Dagwi Darwey, Dagwi mot a tik yɛ e lɛrɛ, ko a ga wunta a wot badu mɛ wɛshɛrɛk, yaga na wot tanga yere mot wot gyeng vɛ nesheneshey.”