Read berom Bare Badu 3 Bible Online

Bare Badu 3 - berom bible

Bare Badu 3

¹Mose a re nuyel, a ye: “E bama mo, wot a kyè vɔk e bak rwa bato, vɔk e bak yɛnɛ̂ vwêl Bashan. Ko Gbɔng Gwɔ̀m Ɔk na bemat mɛ mwa ba nusu, na be tó como na wot bagat na repomô Ɛdirɛi.

²Ko Dagwi Darwey a yang me, ‘Hwo wok bengyip mɛ wɛt. Ma rɔda nára hɛ, na bemat mɛ tanga yɛnɛ̂ sevwel mɛ mwa e vwɔ mō. Rá a yɛ tyɛng pyɛ de hwà ra a Sihɔn, gbɔng gwɔ̀m BeAmɔr de á re negwɔm yi e Hɛshbɔn.’

³“Ano kwong, Dagwi Darwey á tɛ̀ Gbɔng Gwɔ̀m Ɔk na bemât como mɛ e vɔ mot, ko wot á mɔbɔs hɛn hywiri.

⁴E jeng o, wot á re bapomo mɛ mwa kuru batyiimin, de ba sé e bak vwêl Argop e yɛnɛ̂ sevwel Bashan na como.

⁵Bá kana lɔk bapomo mo mwa vɛ na gap, ko bá gwɔrɔ vɛ na bejwâ-pomo de bá vɔk ruhup, na bedyam manâs vɛ. Ko bá vɔk nebapomo nehak pyak de bá gwɔrɔ nɛ na bejwa wɛt.

⁶Wot á wey na bapomo mo mwa, ko wot á mɔbɔs beras na beha tanga nèy vɛ, tyɛng sede remo de wot á ra a bapomô Gbɔng Gwɔ̀m Sihɔn wo Hɛshbɔn.

⁷Ko wot á hashe yas mɛn, mwa na pyɛ̂ jugu e bapomo mo.

⁸“Yi ano, wot á sey ɛ mwa bavwel de ba sé e bak rwa rak na Rɔt Yɔrdan, yi e Rɔt Arnɔn pere vɔk e Raku Hɛrmɔn, yi e vɔ begbɔng begwɔ̀m BeAmɔr beba mo.

⁹Bemât repomô Sidɔn bá yila rakû Hɛrmɔn o à Siriyɔn, ko BeAmɔr bá yila wɛ à Senir.

¹⁰Wot á sey ɛ bapomo de ba sé e ra tas vwel o arɔng, na yɛnɛ̂ bavwêl Gileyat na Bashan pere vɔk e bapomô Saleka na Ɛdirɛi, vɛ à bapomo beba de Ɔk, gbɔng gwɔ̀m Bashan á kana re negwɔm e ra vɛ.

¹¹“Gbɔng Gwɔ̀m Ɔk á sè wo yɛnɛ mo wo BeRɛfa. Bá yong kundung revin mɛ,[1] netes o ná sè sede mita benaas, ko nelis o ná sè bagat mita beba. Be tɔk di gwɛ pere vey e remo e gbɔng repomô BeAmɔn de be tâng rɛ à Raba.”

¹²Mose a re nuyel, a ye: “Jeng de wot á sey ɛ vwel o, ma nɔ̂ng yére Rubɛn na Gat yɛnɛ̂ vwel de ha sé e bak rwa bato na repomô Arower, bagat na Rɔt Arnɔn. Ma gwɛ̌ a yɛn ɛ rebît vwêl berakû Gileyat na bapomô vɛ mwa.

¹³Ma nɔ̂ng rebît yerê Manase bwang vwêl Gileyat o na vwêl Bashan mwa, kwɔn de Ɔk á kana re ɛ negwɔm. “Ba kana tâng bak vwêl Argop e Bashan à vwêl BeRɛfa.

¹⁴Yayir, mwât yerê Manase, á re yɛnɛ̂ vwêl Argop na como, pere vɔk e yɛnɛ̂ bapomô Gɛshur na Maaka. A vos a nèy bapomo mo reza mɛ, ko bé rɔɔ tâng nɛ à Nebapomô Yayir.

¹⁵Ma nɔ̂ng bemât ruhûp Makir wo yerê Manase vwêl Gileyat.

¹⁶Ano arɔng, ma nɔ̂ng yére Rubɛn na Gat yɛnɛ̂ vwel de ha kaba yi e Gileyat pere wɔ̀ ta e Rɔt Arnɔn. Yɛnɛ̂ vwel o hɛ à Rɔt Arnɔn o e bak rwa batin, ko e bak rwa bato, yɛnɛ mo à Rɔt Yabɔk, ko gura mo gworo gwa sé vwêl BeAmɔn.

¹⁷E rwa rak, yɛnɛ mɛ ha raa Rɔt Yɔrdan yi e Gworep Galili vɔk e Gbɔng Rep Nevwashe e rwa batin, pere vɔk e fwɔ̂ Raku Piska e rwa rak.

¹⁸“E jeng o, ma misang a yin, ma yang in ngan: ‘Dagwi Darwey, Dagwi mot a ga nɔng in vwel hemo e rwa rak na Rɔt Yɔrdan, na he sè nap min. Yaga ano, tɛ̀ in bemât como min be hashe pyɛ̂ como, na be tanga wɔ̀ ye dɔ a Rɔt Yɔrdan o e ra cáng min, yére Israyɛl, na yin a wɔ̀ sɛlɛ hɛn.

¹⁹Ko tik in beha min na nèy e bapomo de ma ga gas a yin. Tik in yas min arɔng, ma tɔk yin a vɔk yas pyak.

²⁰Wɔ̀ sɛlɛ hin cáng min sɛ̌ yɛn a sɛ̀ vwel o mɛn de Dagwi Darwey a rɔda nɔng ɛn e bak rwa ta wo Rɔt Yɔrdan, na a to tik ɛn be sangal e hwomo e ji netyang, sede remo de a ga ra a yin e gura gwomo. E bama de kayɛ pyɛ ya ga dyɛng tyang, ko yin de to in vey e vwel de ma ga gas a yin hɛ.’

²¹“Ko ma misang a Yɔshuwa, ma yang ɛ, ‘Hwà ga di kayɛ pyɛ de Dagwi Darwey, Dagwi mot a ga ra a begbɔng begwɔ̀m beba vemo, yɛ Sihɔn na Ɔk. A rɔda ra a kawɛ gbɔng gwɔ̀m de yin ê hwo ɛ na como tyɛng ano.

²²Hwo kwon vo bengyip wɛt! Dagwi Darwey, Dagwi mot a rɔda tó a yin como mo.’ ”

²³Mose a re nuyel, a ye: “E jeng yane, ma shonong e ra Dagwi Darwey, ma ye, ‘À Darwey, Dagwi Darwey, hwà ga mɛsɛng dura a me nerey mō na reto mō. Vit à Dagwi hwak e lagwi kɛ e jey de ê tɔk ra pyɛ́ ryey yerê yemo de hwà ga ra!

²⁵Gabɔk wɛt, tik na me ye dɔ à Rɔt Yɔrdan, na me di vwel rat hane e gura gworo, vwêl beraku rat hane mwa na berakû Lɛbanɔn arɔng.’

²⁶“Ko di, a sé yaga yin de Dagwi Darwey a tɛ̀ shom na me, ko a tɛ̀ tong na won hom wɛt. A yang me, ‘Gwà ga vey ano! Hwo kwon to hanat ha hemo wɛt!

²⁷Wɔ̀ tut e ra ratɛ̂t Raku Piska, na hwo bɛrɛng vɔk e rwa bato na rwa batin, vɔk e rwa rak na rwa ta. Bɛrɛng pyɛ́ de hwô di hywɛ, yaga hwô sang ye dɔ a Rɔt Yɔrdan wɛt.

²⁸Misang a Yɔshuwa pyɛ́ de a rɔda ra. Gwɛ̌ a yɛ gap, na a vɔk cwey râ yɛ. E yɛ wɛ de a rɔda kyè na bemat o wɔ̀ ye dɔ a rɔt o, na yɛn a re sevwel de hwô bɛrɛng.’

²⁹“Ko wot a nàra e nɛk de wó bɛrɛng repomô Bet-Pɛyɔr.”