Read berom Bare Badu 30 Bible Online

Bare Badu 30 - berom bible

Bare Badu 30

¹“A remo ma sé tɛ̀ yin kasa nerat kɛ gawey. Jeng de pyɛ́ yemo mwa ya ga té na yin, ko yin a sé sangal e tê bemât yére jey yemo de Dagwi Darwey, Dagwi min a ga shara hin e tē mɛn, yin ê bare na neha hom.

²Ka sede yin na yere min yin a rɔda toyo vey na Dagwi Darwey, na yin a gyeng badu mɛ de ma sé nɔng in vɛ yunung na yey min mwa, na simo min mwa,

³ko Dagwi Darwey, Dagwi min ê tosho reyɔm min, ê toyo na yin yi e ji sesam. A rɔda toyo na yin yi e yére bemât jey de a ga kana shara hin e ji yɛ.

⁴Ka a ka shara hin vɔk e neyɛnɛ̂ jey de na dal na neyikyik, ko yɛ Dagwi Darwey, Dagwi min a rɔda tula hin myak, na a toyo na yin.

⁵Yaga na yin a to sey ɛ vwel de ha sé nap bedabeda min. A rɔda tɛ̀ yin vɔk nedanerey na nepyak ninde na dal nemɛn.

⁶Dagwi Darwey, Dagwi min ê yong neyey min na ne yere min, sede remo de be yosom babek min, yaga na a vɔk yey pyɛng na yin. Yi ano, yin ê tɛ̀ yey na yɛ na yey min mwa, na simo min mwa, yaga na yin a vɔk neken.

⁷A rɔda gang gawey o mwa e ra bemât repugu min vemo de bá bɛrɛng hin ves ko bá tak a yin.

⁸Yaga ano, doyo hin vɔk na Dagwi Darwey, na yin wok ha mɛ, na yin gyeng badu mɛ mwa vemo de ma sé nɔng in yunung.

⁹Dagwi Darwey ê nɔng in nedanerey e ji kayɛ pyɛ de yin a ra. Yin ê vɔk nèy pyak, na yas pyak arɔng, ko hiri min bê mara pyɛ́ vit a yere mo. A rɔda vɔk yey pyɛng na a nɔng in nedanerey sede remo de á nɔ̂ng bedabeda min arɔng.

¹⁰Ko a sé gbing-gbing yin a wok ha mɛ, na yin a gyeng badu mɛ na nu mɛ mwa de ba jɛk e bwok-basa gwomo de gwó basa a yin ha mɛ mo. A sé gbing-gbing yin a doyo vey na yɛ na yey min mwa na simo min mwa.

¹¹“Nu de ma sé nɔng in yunung ha dal gap min wɛt, ha sé yikyik yi na yin arɔng wɛt.

¹²Ha sé e rak o e lagwi wɛt, de yin ê rangal, ‘E wà de ê tut na a wɔ̀ jut a wot na hɛ vey e ngamo yaga na wot a wok hɛ, na wot a gyeng hɛ arɛt?’

¹³Ha sé e ma here hê gworep de yin ê rangal wɔgɔ, ‘E wa de ê ye dɔ à gworep o na a wɔ̀ jut a wot hɛ vey e ngamo yaga na wot a wok hɛ, na wot a gyeng hɛ arɛt?’

¹⁴Wey, ha sé e ngamo na yin. Yin a tɔk hâ hɛ, yin a tɔk cap hɛ, yaga ano, yin a tɔk gyeng hɛ.

¹⁵“Di in, yunung ma sé nɔng in kasa e tê nerat na neves, e tê neken na reku.

¹⁶Ka sede yin a gyeng badu Dagwi Darwey, Dagwi min, vemo de ma sé nɔng in yunung, ko yin a tɛ̀ yey na yɛ̀, yin a kyè e begwong mɛ, yin a gyeng badu mɛ na nu mɛ, na shɔt mɛ ko yin a rɔda vɔk neken, yin tɛ́ in bemât yere ryey, ye bemat pyak. Dagwi Darwey, Dagwi min ê tɛ̀ nerat e ra yin e vwel de yin a sé kyè wɔ̀ sey ɛ hɛ na he sè min.

¹⁷Ko ka sede yin a kyɛ́ in nà gyeng ha mɛ, yin a kyɛ́ in nà wok pyɛ de e ha a yin, yin a tik be hwɔlɔ hin vɔk e de té guduruk a pyɛ̂ sekwit, na yin a re a yɛ fongol,

¹⁸ko bê wey na yin. A sé yaga ano de ma sé tusa hin ano a remo. Yin a rɔda ros pyak e vwel hane de ha sé e gurâ Rɔt Yɔrdan de yin a sé kyè wɔ̀ sey ɛ hɛ na he sè min wɛt.

¹⁹A remo ma sé nɔng in kasa e tê neken na reku, e tê nerât Dagwi na gawey mɛ, ko ma sé yila bemât lagwi na vê jey na be sè nuha e ra yerê kasa de yin ê ra. Kasa hin neken yaga bato min na nèy min.

²⁰Tɛ̀ in yey na Dagwi Darwey, Dagwi min, gyéng in ha mɛ, na yin man in na yɛ. Yi ano, yin ê vɔk neken ko mê tɛ̀ yin ros e sevwel de Dagwi Darwey a ga sira na a nɔ̂ng bedabeda min Abraham, na Yishak tanga Yakɔp.”