Read berom Bare Badu 31 Bible Online

Bare Badu 31 - berom bible

Bare Badu 31

¹Mose a re nuyel e de ha na bemât Israyɛl,

²a yang ɛn, “Di in, a remo neshey tɔ hom na sé naga na kuru baba, ko mê kyɛm me re nuyel na sê mwât nuyel min wɛt. Dagwi Darwey a ga ha a me, mê ye dɔ a Rɔt Yɔrdan wɛt.

³Dagwi Darwey, Dagwi min yɛ pyɛ mɛ a rɔda kyè e nuyel min na a wey na bemât yére de ya sé sangal e hwomo, yaga na yin a sey ɛ vwel o, na he sè min, ko Yɔshuwa a rɔda sè mwât nuyel min tyɛng sede remo de Dagwi Darwey a ha.

⁴Dagwi Darwey a rɔda wey na bemat o, tyɛng sede remo de a re Sihɔn na Ɔk begwɔ̀m BeAmɔr, ko a wey na sevwel mɛn.

⁵Dagwi Darwey ê nɔng in wɛng e ra yɛn, ko yin ê ra a yɛn tyɛng na pyɛ de ma ga ha a yin.

⁶Sǎ hin gak, ko yin vɔk yey ting. Yin wok bengyip mɛn wɛt. Dagwi min, Dagwi Darwey pyɛ mɛ ê kyè tanga yin. A rɔda hala hin kɛ a ye waa a hin wɛt.”

⁷E bama mo, Mose a yila Yɔshuwa ko a yang ɛ, e nuyêl bemât Israyɛl mwa, “Sǎ gak, na hwo vɔk yey ting, e hwo wɛ de hwô kyè e nuyêl bemat vemo na be wɔ̀ sey ɛ vwel o na he sè nap min, vwel hemo de Dagwi Darwey a sira na a nɔ̂ng bedabeda min.

⁸Dagwi Darwey pyɛ mɛ ê kyè e nuyel mo, na a sè tanga hwo. A rɔda hala hwo kɛ a ye waa a hwo wɛt, yaga ano, hwo wok bengyip kɛ hwo sap wɛt.”

⁹Mose a jɛk Badu Dagwi ko a nɔ̂ng bepiris vê yerê Levi, e yɛn vɛ de be jurus kundung Wuna-na-sirâ Dagwi Darwey, a nɔng ɛn vɛ yɛn na bemât nuyêl BeIsrayɛl.

¹⁰A nɔng ɛn nu a ye, “E yɛnɛ̂ kahɛ shey taama, e jeng de shey de be hala a bemat badu de be rangal hɛn ha to pom, ko hwo basa Badu vemo na gbɔng fwɔ e jeng Nzem Bǔk.

¹¹Basa a bemât Israyɛl vɛ jeng de yɛn a vey re a Dagwi Darwey, Dagwi min fongol e kwɔn hining hê re a yɛ fongol.

¹²Yila bemat o mwa — beras, na beha, na nèy, tanga bemât yére dyuk de ba sé sangal e bapomo min, yaga na kawɛ mwat a bin wok vɛ, na a masa nɔ̂ng Dagwi Darwey, Dagwi min nerey, na a gyeng basa mɛ na tsak o.

¹³Yi ano, yére min yemo de ya ga sang wok badu Dagwi Darwey, Dagwi min wɛt bê wok vɛ, yaga na yɛn a masa gyêng ha mɛ mwa yɛnɛ̂ jeng de yɛn a sé sangal e ji sevwel de yin a sé kyè wɔ ɛ̀ e gurâ Rɔt Yɔrdan, na yin a sey ɛ̀ hɛ.”

¹⁴E bama mo, Dagwi Darwey a yâng Mose, “Bwang nepɔlɔ mō na rɔngɔl pyak wɛt. Yila Yɔshuwa na hwo vey na yɛ e nuyel hom e bûk tula, yaga na me misang a yɛ fwom mɛ.” Ano kwong Mose na Yɔshuwa ba wɔ́ e nuyêl Dagwi Darwey e bûk tula,

¹⁵ko Dagwi Darwey a dura tó mɛ na yɛn e hwomo e ji rewûk rele de ra bang rwi buk o.

¹⁶Dagwi Darwey a hwo yâng Mose, “Hwà vey bagât wɔ̀ sɛ beda mo, ko e bamâ mo bemat o ba rɔda sè sede bedebeves, bê kwɔrɔs wuna-na-sira de ma kana ra na yɛn. Yɛn ê ye waa a me, ko yɛn ê re a pyɛ̂ sekwit yê vwel de yɛn a sé kyè wɔ̀ yel ɛ fongol.

¹⁷Jeng de pyɛ́ yemo yê té, ma rɔda vo shom na yɛn, mê ye waa a hɛn, ko mê kyɛ́ me nà sɛlɛ hɛn. Rezot reves detidetu rê ré ɛn, ko e bama mo, yɛn ê de tɔk, pyɛ́ yemo ya sé té e ra yɛn yaga me, Dagwi mɛn, ma to sé na yɛn wɛt.

¹⁸Mê kyé me nà to sɛlɛ hɛn, yaga yɛn a ga ra pyɛ́ vyes, ko yɛn a jama sɛlɛ na pyɛ̂ sekwit.

¹⁹“A remo, jɛ́k in lwɛ̄lɛ gwomo, na bemât Israyɛl be masa gwɛ na rato, yaga gwa rɔda sè nuha e ra yɛn.

²⁰Mê kyè na yɛn vɔk e vwel de ha vɔk pyɛ́ shɛrɛk ko ha siri naka, sede remo de ma sira a bedabeda mɛn. E hwomo, yɛn ê re pyɛ́ pyak de yɛn e simo, yɛn ê sangal na yêy dyɛngɛ, ko yɛn ê ye rɛng na be re a pyɛ̂ sekwit fongol. Yɛn ê byɛs me, ko bê kwɔrɔ wuna-na-sira hom.

²¹Nezap rezot reves nê hwo e ra yɛn. Yɛn ê re nuyel na râ lwɛ̄lɛ gwomo, ko gwô sè nuha e ra yɛn yaga nèy mɛn nê dopse bare na gwɛ. A remo, gyam na me kyè na yɛn vɔk e vwel de ma sira na me nɔng ɛn, ma tɔk báre mɛn.”

²²Tuk hane, Mose e jɛk lwɛ̄lɛ mo, ko a hwo masa a bemât Israyɛl o gwɛ.

²³Ano arɔng, Dagwi a ha na Yɔshuwa Nun, a yang ɛ, “Sǎ gak, ko hwo vɔk yey ting. Hwà rɔda kyè na bemât Israyɛl vɔk e sevwel de ma sira na me nɔng ɛn, ko mê sè tanga hwo.”

²⁴Jeng de Mose a yɛnɛ jɛ̂k badu vemo mwa e bwok-basa,

²⁵a yâng bepiris ve yerê Levi, vemo de be jurus Kundung Wuna-na-Sirâ Dagwi Darwey,

²⁶“Ná in bwok-basa Badu Dagwi gwomo na yin a tik gwɛ e hagât Kundung Wuna-na-Sirâ Dagwi Darwey, Dagwi min, na gwo nàra e hwomo, yaga na gwo sè nuha e ra bemat mɛ.

²⁷Ma tɔk negbarak tanga sogô nehywɛ min. Yin a ga sogo a Dagwi Darwey na nehywɛ e jeng hom, ko yin ê ra pyɛ de ya dal ano bama de ma ga kyè.

²⁸Tula bemât nuyêl yére min, tanga bemât nuyêl tom e nuyel hom, yaga na me ha a yin pyɛ́ yemo e nuyel mɛn. Mê yila bemât lagwi na vê jey na be sè bemât nuha hom e ra yɛn.

²⁹Ma tɔk, e bama de ma ga kyè, bemat o ba rɔda ra neves, be ye rɛng yi e gwong de ma ga dura a yɛn. Ko e jeng de ye kyè vey, yɛn ê man na rezot, yaga yɛn a ga nɔ̂ng Dagwi Darwey shom yi na râ pyɛ́ de a yang ɛn kyiri.”

³⁰E bama mo, Mose a basa lwɛlɛ mo mwa e betong mwa bemât Israyɛl: