Read berom Bare Badu 32 Bible Online

Bare Badu 32 - berom bible

Bare Badu 32

¹À jey na lagwi, wok in batîn ha hom, wok in naka pyɛ de ma sé ha.

²Ká bása hom he gabsa sede rwak, ka ha hom he sè sede mwɛngɛ, nshi e ra sɔng, wút e ra sehwey.

³Mê somo rezâ Dagwi Darwey. Ha in rehâ nerey mɛ.

⁴A sé gwofwa, fwom mɛ gwa sé gyat. Gwong mɛ gwa sé mwin. Dagwi wo tsak o — vit à kwɛlɛng. Dagwi wo cik — wo nerat.

⁵Bemat ba ra neves, ba sé nèy mɛ wɛt — ba sé ligis zɔng, zamâng bɔs, hê bare ves!

⁶A Yin ê tala Dagwi ano a? Yin betɔn, vit à netsitsɛng! A sé da min, de a yong in wɛt a? A yong in, e gyeng in!

⁷Bare jeng ye raane, jeng beda mot! Rangâl da mo, ê ha a hwo. Rangâl bemakuk bê basa a hwo.

⁸Dagwi Wo Reto Mwa a nɔ̂ng yére mwa bavwel mɛn. A gas nèy Adam, a tɛ̀ neyɛnɛ̂ bavwel, tyɛng na nèy Dagwi.

⁹Numo hê Dagwi Darwey, hɛ à nèy mɛ. Nap mɛ, hɛ à Yakɔp.

¹⁰A sɛ̀ ɛ e hêy gbingiring, e kwɔ̂n tɔɔlɔl, vit à pyɛ. A gyep ɛ, a gyeng ɛ naka, sede yenêng yis mɛ.

¹¹Sede kim wo gyeng rɛngɛ̂ wɛ, wo rìni e ra nèy wɛ, sede kim, e wuma bafabak mɛ, na a jut nɛ, na a kyè mɛ vɔk e rak o.

¹²E Dagwi nju mɛ de a kyè na Yakɔp, sana jama sɛlɛ̂ dagwi hwak duk o.

¹³A tik a re negwɔm e berahwol, a nɔng ɛ pyɛ́ ryat yi e cap. A pege hɛ na shok yi beraku, na něy yi gwofwa gwolwis.

¹⁴Nevasal vyēl na ne pɔgɔdɔk ne berɔndɔng, na bwêp tyimit byot, na beturuk de ba mɔsɔ, na bebôt begam, na pyɛ̂ yeneng ryat, na nshî anap na hwo sɔ nshî sefeng.

¹⁵Yakɔp a ga mɔsɔ, ko e dak kaa hwà ga mɔsɔ, hwà ga tɛ́ o twing, hwà ga tɛ́ o hyul-hyul! Yɛn a ye waa à Dagwi de a yong ɛn, ko yɛn a ra neshɔngɔlɔng na Gwofwa kwɔ̂n dal mɛn.

¹⁶Yɛn a wuna hɛ repugu na pyɛ́ dyuk, yɛn a nɔng ɛ shom na pyɛ̂ byɛm-byɛm mɛn.

¹⁷Yɛn a nása a cēng nɔrɔ̂ yas, yɛn a sap bedagwi bepas, cī yemo de ya ga sang ra a yɛn kɛ bedabeda mɛn pyɛ cak wɛt.

¹⁸Yin a hala Dagwi, Gwofwa de a tɔ in. Yin a ye bam à womo de a rus tɔ min.

¹⁹Dagwi Darwey a di, a tɛ̀ shom, a kyɛ́ ɛ nèy mɛ bewen na behwong.

²⁰A ye, “Mê to sɛlɛ hɛn wɛt, mê di pyɛ de yê té na yɛn. Yaga yɛn a sé zamang ves, nèy de ne wok ha wɛt.

²¹Yɛn a wuna me repugu na pyɛ de ya wul dagwi wɛt, yɛn a nɔng me shom na pyɛ̂ sekwit mɛn de ya sé yapyi. Ano mê wuna hɛn repugu na pyɛ de ya wul yere bemat wɛt. Mê nɔng ɛn shom na yerê betɔn.

²²Shom hom ya ga vo kya, hê re pere vɔk e neciwîl dem bevuvwel. Hê re jey mwa na pyɛ̂ hwirî yɛ, yê vo kya vɔk e batîs beraku.

²³Mê vey na rezot sana yɛnɛ e ra yɛn, ko mê tabas hɛn na tumbang sede be tabas ket.

²⁴Yɛn ê kushu na vyong, kushu na bêk fes, kushu na nerɔ neves. Mê tomo ngyāma vyes na ye hwo e ra yɛn, na begwɔ̂m nedɔm na be roros hɛn.

²⁵Vê nehyok bê mɔbɔs bemɛn, vê nelɔ bê vo bengyip. Bewen na behwong bê mɔrɔ, nèy-vɔ tanga bemakuk.

²⁶Ma yâng wey na yɛn hywiri, vit à mwat de ê tosho hɛn.

²⁷Ko ma simo vê repugu mɛn na be dak kaa wɛt, wɔgɔ, ba ga dal gâp bemat hom, remo de me pyɛ hom ma ra ano.”

²⁸BeIsrayɛl ba sé yere de vit à barê yey, yɛn a tɔk di pyɛ cak wɛt.

²⁹Ka yɛn a vɔk netsitsɛng ka yɛn a yâng di wɛng, yɛn a yâng tɔk di pyɛ de yê té.

³⁰Yaga sɛ́ de mwat gwining ê re bemat gu rining e como, ko bemat beba be re bemat gu kuru ɛ? Dagwi Darwey, Dagwi mɛn a ga ye waa a hɛn, Dagwi Darwey, Gwofwa mɛn de a nára hɛn na vê repugu mɛn wɛt a?

³¹Bedagwi de yɛn a tɛ̀ gap e ra vɛ sede beta, ba sé sede Dagwi mot, Gwofwa mot wɛt. Ba ga gang vê repugu mot na shɔt.

³²Tîn anap mɛn ha sé sede vê Sɔdɔm na Gɔmɔra. Nèy anap mɛn na vɔk nedɔm, bwi mɛn gwo tɔs nèy de ne reneng.

³³Nshî anap mɛn na sé sede ba yong na nedɔ̂m begwɔ̄m

³⁴Dagwi Darwey a tɔk pyɛ́ yemo mwa wɛt a? A vɔk yɛ e duk bâng pyɛ́ mɛ.

³⁵A ye, “E me de me talsa pyɛ̂ mwa, me pyɛ hom mê tabak hɛn.” Jeng ye kyè vey de yɛn ê gaba, tûk rezot mɛn ha vey bagat, tûk reyɔm mɛn hê vey e ra yɛn dey-dey.

³⁶E yɛnɛ mo, Dagwi Darwey ê yɛrɛ shɔt e tē, jeng de a di gap mɛn ha ga tala hɛ. Ê tosho reyɔ̂m bemât fwom mɛ, jeng de a di de yɛn ê tɔk sɛlɛ bato mɛn wɛt.

³⁷E bama mo, Dagwi Darwey ê ha hâ yɛnɛ mo, “Bedagwi min berey, beta de yin a tɛ̀ gap e ra vɛ a vɛ ɛ?

³⁸Yin a nɔngɔs hɛn sebwêp nɔrɔ̂ yas min ko yin a nɔngɔs hɛn nshî anap min na be sɔ. Tik na he vey sɛlɛ hin a remo, tik na he sè bǔk min.

³⁹Di in, e me nju hom de ma sé Dagwi, vit a dagwi hwak. Me mɔrɔ, ko me nɔng neken, me mǎ mwat, ko me to tɛ̀ ɛ tyang. Vit a mwat de e tɔk sey ɛ pyɛ yi e vwɔ hom.

⁴⁰A remo me nára vwɔ hom e gwi na me sira na neken hom mwin wɔgɔ,

⁴¹mê lɔ̌ wal hom de wɔ́ nɛp, na me gas mɛ badu e tē. Mê tala vê repugu hom pyɔ̌n mɛn, na me tabak vemo de be kyɛ́ ɛn me.

⁴²Nemi mɛn nê sè a ket hom sede siring vɛ̀, ko nama mɛn hê sè a wal hom sede pyɛ̂ rê wɛ — nemî bavin na ne vê ngyang, nemî nèy lɔ gwɔ̀m.”

⁴³À yerê bemât jey, ra in a bemât Dagwi biibi! Ê tala nemî bemât fwom mɛ. Ê tala bemât repugu mɛn pyɔ̌n mɛn, ê hala a bemat mɛ banɛn mɛn, ko ê fung vwel o.

⁴⁴Mose na Yɔshuwa Nun ba basa neha lwɛ̄lɛ gwomo, yaga na BeIsrayɛl be wok nɛ naka.

⁴⁵Jeng de Mose a ga yɛnɛ nɔ̂ng bemat o basâ Dagwi,

⁴⁶ko a ye, “Tē in naka na yin a gyeng badu vemo de ma sé tɛ̀ be sè nuha yunung. Basa hin a nèy min vɛ arɔng, yaga na yɛn a gyeng neha badu Dagwi mwa na tsak o.

⁴⁷Batîn basa vemo ba sé yapyi wɛt, ko ba sé pyɛ de yê gyeng neken min. Gyéng in vɛ, ko yin ê ros e de sangal e vwel hane e gurâ Rɔt Yɔrdan de yin a sé kyè wɔ̀ sey ɛ na he se min.”

⁴⁸E tuk hane, Dagwi Darwey a yâng Mose,

⁴⁹“Kyè vɔk e berakû Abarim e sevwêl Mowap, de be bɛrɛng repomô Yeriko, tut e ra Raku Nebo, na hwo bɛrɛng sevwêl Kanaan de ma sé kyè wɔ̀ nɔ̂ng BeIsrayɛl na be vɔk hɛ.

⁵⁰Hwô wɔ̀ sɛ̀ beda mō e ra rak raku mo, sede remo de gwà mō Aharon á ra ano e ra rak Raku Hɔr,

⁵¹yaga mwa hin yin a ra a me pyɛ de ya sé tsak o wɛt e nuyêl BeIsrayɛl. Jeng de yin á sè e jɔt nshî Mɛriba, bagat na repomô Kadɛsh e hêy Zin, yin a tɛ̀ reza hom jɛrɛ e nuyêl bemat o wɛt.

⁵²Hwô tɔk bɛrɛng vwel o yi e jey, ko hwô yel e hɛ wɛt, vwel de ma sé kyè wɔ̀ nɔ̂ng BeIsrayɛl.”