Read berom Bare Badu 33 Bible Online

Bare Badu 33 - berom bible

Bare Badu 33

¹Neha tɛ̂ nerat a nemo de Mose, mwât fwôm Dagwi a tɛ̀ e ra BeIsrayɛl gyam na a ku:

²Dagwi Darwey a yi e Raku Sinai. A sogo sede gwi e ra vwêl Ɛdɔm ko a tɛ̀ negbey e ra bemat mɛ yi e Raku Paran. Vê jɛrɛ gu kuru bá sè tanga yɛ, sede kya e vwɔ yege mɛ.

³Dagwi Darwey a tɛ̀ yey na bemat mɛ, ko mwa vê jɛrɛ ba sé gyat e vwɔ mɛ. Yɛn a ye guduruk e cât bol mɛ na yɛn a gyeng nu mɛ.

⁴Mose a nɔng ot Badu, ba sé gbɔng pyɛ nedanelɔ ne yerê Yakɔp.

⁵Dagwi Darwey a ga tɛ́ ɛ gbɔng gwɔ̀m bemat mɛ BeIsrayɛl e jeng de bemât yére mɛn na vê nuyel mɛn ba tula hɛn e dem hining.

⁶Mose a ye ngan e ra yerê Rubɛn: “Yerê Rubɛn de ya sé cen ye sang wey wɛt, mwa ano de yɛn a sé hyehyet zɔng.”

⁷E ra yerê Yuda a ye, “À Dagwi Darwey, wet betong na sesin mɛn jeng de yɛn e jama sɛlɛ. To wuna hɛn na bwang yére mɛn. Gwɛ̌ a vɔ mɛn gap, à Dagwi Darwey, na hwo sɛlɛ hɛn e ra vê repugu mɛn.”

⁸E ra yerê Levi a ye, “Urim na Tumim mo ba sé yaga bemât fwom mo vê tsak o. Hwà mara hɛn e Masa, ko hwà ra kyisa na yɛn e lel nshi ve Mɛriba.

⁹Yɛn a dal na dyɛ̂ng bato mɛn vey na hwo, dyɛ̂ng to mo ha dal hemo de be ra a beda na beneng, begwa beras kɛ nèy. Yɛn a gyeng ha mo, ko yɛn a gyeng wuna-na-sira mɛn na hwo na tsak o.

¹⁰Yɛn a rɔda basa a mwa yére Israyɛl gyêng badu mo. Yɛn a rɔda nása a hwo nenɔrɔ̂ pyɛ̂ nesang hyɔɔlɔl na ne yas de be rangas e ra gàgbang rangâs yas mo.

¹¹À Dagwi Darwey, sɛlɛ yere mɛn na ye ras, na hwo tɛ̀ nerat e ra yɛ. Vɔk yey pyɛng na pyɛ de yɛn e ra. Wey na vê repugu mɛn mwa, na yɛn a kwon to sogo e ra yɛn wɛt.”

¹²E ra yerê Bɛnyamin a ye, Yere de Dagwi Darwey a tɛ̀ yey na yɛ yê sangal tyang na yɛ. E gyeng yɛ kahɛ wosho, yaga na a gyep yɛ e berakû yɛ.

¹³E ra yerê Yɔsɛf a ye, “Tik na Dagwi Darwey a tɛ̀ nerat e ra vwel mɛn na rwak, na mwɛngɛ, na nshi yi e nɛ̂n vwel —

¹⁴hê vɔk nèy cɔ́gɔt nerat sizɔng kahɛ tuk, pyɛ̂ hwiri ryat sizɔng kagwɛ pwɛl,

¹⁵bwal rwat gwô susu yi e ra beraku beroso.

¹⁶Tik na vwel mɛn he sila na kayɛ pyɛ de ya sé ryat. Ko Dagwi Darwey a tɛ̀ nerat e ra hɛ. Yɛ de á ha yi e reburuk de kya há sè re. Tik na nerat yerê nemo ne hwo e ra yerê Yɔsɛf, yaga e yɛ de ba kasa e ji begwa mɛ.

¹⁷Yɔsɛf a vɔk gâp mus, ko a vɔk ngɛngɛ̂ kpam-cungun. Ngɛngɛ mɛ bê sè e tô ve Manase gu rining ko bê sè e tô ve Ɛfrayim gu kuru. E tɔk zagat yére bemât jey na vɛ, ko a gangas hɛn mɛ vɔk e neyɛnɛ̂ jey.”

¹⁸E ra yére Zɛbulun na Isakar a ye, “Tik na Zɛbulun a sè nedanerey e byɛ de yɛn e ragas na bedwa-nshi, ko tik na nedanerêy Isakar ne gwɛ̌ e nelɔ mɛn arɔng.

¹⁹Bagyɛng mɛn bé yila e ra rezâ Dagwi e raku mɛn, ko be nása nenɔrɔ̂ yas de na sé tyɛng e hwomo. Na ne pyɛ́ de ya sé e lɛrɛ e bazɛ̂k rekwogom. Yas gworep ya sé sede nevasal de yɛn e ngas.”

²⁰E ra yerê Gat a ye, “Be somo Dagwi de a nɔng ɛn yɛnɛ̂ vwel rey o. Gat e gyeng sede gukum na a hama vwɔ̂ pyɛ kɛ bekup fwɔ mo ayi.

²¹Yɛn a kasa bak vwel de wa dal na nerat yaga bato mɛn. Ba nɔng ɛn numo hê mwât nuyel. Yɛn a gyenges nû Dagwi Darwey na badu mɛ e jeng de bemât nuyêl BeIsrayɛl ba tula hɛn e dem hining.”

²²E ra yerê Dan a ye, “Dan a sé hwêy gukum, E gyilsit yi e Bashan.”

²³E ra yerê Naftali a ye, “Naftali a sè nerat sizɔng yi na Dagwi Darwey de a wok neta mɛ. Vwel mɛn ha yi e Gworep Galili vɔk e rwa batin.”

²⁴E ra yerê Ashɛr a ye, “Ashɛr a vɔk nerat de na dal ne bwang yére mo. Tik na begwa mɛ be simo hɛ, ko tik na vwel mɛ he vɔk batîn pat pyak.

²⁵Tik na be man rùhup bapomo mɛ na dyam, tanga dyam pama, yaga na a bin sangal ɛ tyang gbak-gbak.”

²⁶Vit à dagwi hwak de a sé sede Dagwî BeIsrayɛl. E kyè na gbɔng nerat mɛ e lagwi. E kyè e ji bale na a vey sɛlɛ hin.

²⁷A sé e Dagwi de e dopse gyepes hin, E kula hin na vɔ mɛ nesheneshey. Á rɔ́ a yin vê repugu min ko a ye, yin wey na yɛn mwa.

²⁸Yaga na BeIsrayɛl be sangal tyang na yêy dyɛngɛ e vwel mɛn. Yerê Yakɔp yê sangal e vwel de ha sila na pyɛ̂ yeneng tanga nshî anap. Lagwi wô rop mwɛngɛ e ra hɛ kayɛ jeng.

²⁹À Israyɛl hwà sé wò yey pyɛng tyɔng wɛt! Vit a hwak sede hwo. Hwà sé yere de Dagwi Darwey a ga sey o. Dagwi Darwey pyɛ mɛ a sé ruga mo na wal mo, na a gyep o, na a nɔng o wɛng. Vê repugu mo bê vey, be ra won na hwo tosho reyɔm mɛn, ko hwo hwô bɔrɔs hɛn e nɛ̂n bol mo.