Read berom Bare Badu 34 Bible Online

Bare Badu 34 - berom bible

Bare Badu 34

¹Mose a kyè yi e tyɛl Mowap vɔk e Raku Nebo, vɔk e ra rak Raku Pisga de wó bɛrɛng Yeriko. E hwomo Dagwi Darwey a dura a yɛ vwel o mwa, yɛnɛ̂ vwêl Gileyat vɔk e vwêl Dan,

²na mwa vwêl Naftali, na bavwêl Ɛfrayim tanga Manase, na mwa hê Yuda e rwa ta pere wɔ̀ sɛ̀ Gworep Tē,

³na bak vwêl Yuda wo rwa batin, na tyɛl de ya yi e Yeriko, repomô batin tyét pere wɔ̀ wul Zowar.

⁴Ko Dagwi Darwey a yâng Mose, “Vwel a hemo de ma sira a Abraham, na Yishak tanga Yakɔp na me nɔ̂ng yére mɛn. Ma ga tik o na hwo di hɛ, ko mê tik o na hwo wɔ́ e hwomo wɛt.”

⁵Ano kwong Mose, mwât fwôm Dagwi Darwey a ku e hwomo e sevwêl Mowap, sede remo de Dagwi Darwey a ha.

⁶Dagwi Darwey a lɛrɛ hɛ e nɛk hwak e Mowap, womo de wo bɛrɛng repomô Bet-Pɛyɔr, ko pere vey e yunung vit à mwat de a tɔk tsak kwɔn de a lɛrɛ hɛ ɛ.

⁷Mose á vɔk neshey naga na kuru baba (120) jeng de á ku. Á rɔngɔl na gap mɛ, ko bayis mɛ bá rɔ̌ bɛrɛng jey kyɛrɛng.

⁸BeIsrayɛl ba ra sesin mɛ nepɔlɔ kuru batat (30) viisis e tyɛl Mowap.

⁹Yɔshuwa Nun a vɔk gabîk netsitsɛng sizɔng, yaga Mose á tɛ̀ vɔ mɛ e ra yɛ na a sey fwom mɛ. BeIsrayɛl ba raa ha mɛ, ko ba gyeng nu de Dagwi Darwey a kana nɔng ɛn yi na Mose.

¹⁰Ba ga sang sè zarap Dagwi e ji BeIsrayɛl sede Mose wɛt. Dagwi Darwey a ha na yɛ bayis na bayis.

¹¹Vit à zarap hwak de a ga sang ra pyɛ̂ langat na yê bes yerê yemo de Dagwi Darwey á tomo Mose na a wɔ̀ ra e ra gbɔng gwɔ̀m Misra na bemât fwom mɛ tanga e ra vwel o mwa.

¹²Vit a zarap Dagwi hwak de a ga kyɛm a ra pyɛ́ ryey yê bengyip yerê yemo de Mose á ra e bayis BeIsrayɛl mwa.