Read berom Bare Badu 4 Bible Online

Bare Badu 4 - berom bible

Bare Badu 4

¹Mose a re nuyel, a ye: “À yin BeIsrayɛl, Wok in badu mwa de ma sé basa a yin. Ka sede yin a gyeng vɛ, yin ê nàra beken, yin ê wo yel, na yin a re sevwel de Dagwi Darwey, a sé kyè wɔ̀ nɔng in. E yɛ de bedabeda min ba re a yɛ fongol.

²Gyeng in nu mɛ de ma ga nɔng in. Yin gwɛ̌ kɛ yin tɛt ɛ pyɛ cak wɛt.

³“Yin pyɛ min, yin a ga di pyɛ de á ra e Raku Peyor. Á wey na kawɛ mwat de á re a ci de ba tang yɛ à Baal fongol e hwomo.

⁴Ko yin de yin a sé pang na Dagwi Darwey, Dagwi min, yin a rɔngɔl beken yunung.

⁵“Ma ga basa a yin badu mo mwa, sede remo de Dagwi Darwey, Dagwi hom a yang me, me ra. Gyeng in vɛ e vwel de yin a sé kyè wɔ̀ yel na yin a sey ɛ hɛ, yin a sangal ɛ.

⁶Gyeng in vɛ na tsak o, ko bemât yére dyuk bê di yerê netsitsɛng de yin a vɔk. Jeng de yɛn a wok rehâ badu Dagwi de yin e gyeng vɛ, yɛn a rɔda ye, ‘Yerê bemat ryey o yemo ya vɔk netsitsɛng na tɔk sizɔng!’

⁷Kayɛ jeng de wot e yila na Dagwi Darwey, Dagwi mot na a sɛlɛ hot, a sé bagat na wot. Ko vit a yerê jey cak, ka ya ka dal na nerey, de ya vɔk Dagwi hwak de a sé bagat na yɛ.

⁸Ano arɔng, vit a yere cak, ka ya ka dal na nerey, de ya vɔk badu barat de be gas mɛ pyɛ́ e tē sede yerê vemo de ma ga basa a yin vɛ yunung.”

⁹Mose a re nuyel, a ye: “Tē in naka, na yin gyeng bato min. Yin kwon ye bam a pyɛ́ de yin a ga di na bayis min gbak-gbak wɛt. Ko há in a nèy min tanga nèy nèy min yɛ.

¹⁰Bare hin na tuk de yin á tumal e nuyêl Dagwi Darwey, Dagwi min e Raku Sinai. Yɛ á kana yang me, ‘Tula a me bemat o mwa. Me simo yɛn a wok pyɛ de ma rɔda ha, na yɛn a gyeng yɛ mwa neyɛnɛ̂ neken mɛn. Tik na yɛn a basa a nèy mɛn, na ne ra tyɛng ano arɔng.’

¹¹“Tuk hane, yin a wɔ bagat, na yin a tumal e fwɔ̂ raku. Bale bá bang wɛ kyīp-kyip, ko balêm kya ba tabas yi e ra wɛ vɔk e lagwi.

¹²Dagwi Darwey á ha na yin yi e ji kya mo. Yin á wok ha mɛ, yin á tɔk pyɛ de a sé ha, ko yin á ka di ɛ wɛt.

¹³Á ha a yin pyɛ́ de ya sé gbing-gbing e ra wuna-na-sira de a ra na yin. Á nɔng in nu, yin gyeng Badu Kuru vemo de a jɛk e ra beta bagasak beba.

¹⁴E jeng o, Dagwi á yang me, me basa a yin badu mwa de yin ê gyeng vɛ e vwel de yin a sé kyè wɔ̀ yel, na yin a sey ɛ hɛ, yin a sangal ɛ.”

¹⁵Mose a re nuyel, a ye: “Jeng de Dagwi Darwey á ha na yin yi e ji kya e Raku Sinai, yin á di ɛ ko tyɔng wɛt. Yaga ano, tē in naka,

¹⁶yin kwon ra a yɛ banɛn yi na yong a bato min kayiyɛ yerê pyɛ sekwit, kɛ ya sé rwas kɛ hwā mo,

¹⁷kɛ ya sé ngyama kɛ gwonon,

¹⁸kɛ ya sé pyɛ gabaga kɛ tɔk ayi.

¹⁹Ko jeng de yin e bɛrɛng lagwi, yin e di gwi, kɛ pwɛl, kɛ netangacɛn ayi. Pyɛ cak ye tɔgɔs hin, na yin a sap kɛ yin a re a yɛ fongol wɛt. Di in, Dagwi Darwey, Dagwi min a nɔ̂ng bemât yére dyuk yerê pyɛ́ yemo na yɛn a sap yɛ e negya.

²⁰Ko e yin de yɛ a wɔ̀ sey ɛ hin yi e vwêl Misra, e de sesam de sé royo pep sede kyâ fwam-ju. A pat in, yaga na a bin tɛ̀ in yin a sè bemat mɛ, sede remo de yin a sé a remo.

²¹“Ko a sé yaga yin de Dagwi Darwey, Dagwi min, á tɛ̀ shom na me, ko a sira hɛ, mê ye dɔ à Rɔt Yɔrdan, na me yel e vwel rat o mo wɛt, vwel o de a sé kyè wɔ̀ nɔng in hɛ nap.

²²Yaga ano, ma rɔda ku e bak vwel o womo, mê sang ye dɔ à rɔt o wɛt. Ko yin, yin a sé kyè wɔ̀ ye dɔ, na yin a sey ɛ vwel rat o mo, na yin a sangal ɛ.

²³Tē in naka, yin kwon ye bam a wuna-na-sira de Dagwi Darwey, Dagwi min a ga kana ra na yin wɛt! Gyeng in nu de a nɔng in wɔgɔ, yin yong a bato min kayiyɛ yerê pyɛ sekwit wɛt.

²⁴Yaga Dagwi Darwey, Dagwi min a sé sede kyâ nebep. E tɛ̀ yey na bemat mɛ sizɔng, ko e simo, na yin re a pyɛ cak fongol wɛt, sɛ̌ yɛ nju mɛ zɔng.

²⁵“E jeng tyɔng, yin ê ye dɔ a Rɔt Yɔrdan, na yin a sangal e vwel o. E hwomo, yin ê vɔk nèy, ko nèy o nê vɔk nemɛn arɔng. E bamâ neshey pyak, gyeng, yin ê hwo yongos nezap pyɛ̂ sekwit, mwa ano de Dagwi Darwey e kyɛ́ ɛ pyɛ́ mo. Yaga ano, ma sé tusa hin yunung, ko ma sé yila bemât lagwi na jey, na be se nuha hom e ra yin: Ka sede yin a ba yong pyɛ̂ sekwit o, Dagwi Darwey ê vo shom na yin, ko yin ê pɔl ɛ ba wɛt. Ê wey na yin vit.

²⁶

²⁷Tyɔng e ji min zɔng de bê dal, ko Dagwi Darwey a rɔda tɛ̀ in gbing-gbing yin hala vwel o, ko ê shara hin e tê bwang yére bemât jey.

²⁸E hwomo, bê tɛ̀ in, yin a re a pyɛ̂ sekwit fongol, yemo de bemat ba yong na vɔ mɛn na cɔ́gɔt kɛ beta. Pyɛ́ mo ye bɛrɛng jey kɛ ye wok ha wɛt, ye re pyɛ́ wɛt, ko ye wok nesang wɛt.

²⁹E yɛnɛ mo, jeng de yin a sé e ji reyɔm e ji bemat o, ko pyɛ́ yemo mwa ye hwo e ra yin, yin a rɔda hwo jama Dagwi Darwey, Dagwi min. Ka sede yin a jama hɛ na yey rining, na yin a gyeng ha mɛ, ko yin ê sɛ̀ ɛ.

³⁰

³¹Yɛ a sé Dagwi wo nemwishish. A rɔda ye waa a hin, kɛ ê wey na yin wɛt, ko a rɔda ye bam a wuna-na-sira de á ra na bedabeda min wɛt.

³²“Nygɛgɛt hin pyɛ́ de ya ga kana té raane, gyam na be tɔs in, yimo yi e jeng de Dagwi à kana yong mwasi e jey yemo. Ngyɛgɛt hin pyɛ́ de ya sé e ji jey o mwa e gùna mo. Rangal hin bato min wɔgɔ, pyɛ cak ryey o ya ga sang té de bemat ba wok fwɔ̂ ci cak de ya ha a yɛn yi e ji balêm kya, ko yɛn a rɔngɔl beken arɛt? Mwat hwak a ga sang wok hâ pyɛ cak de ya dal ha hemo arɛt? Ko a sé e Dagwi min de á ha na yin ano!

³³

³⁴Kɛ yin a ga sang wok, ci cak ya ga wɔ̀ jut bemat yi e yerê vwel hak, na ye tɛ̀ vɛ be tɛ́ ɛn bemât yɛ arɛt? Wey! Ko a sé e Dagwi Darwey, Dagwi min de á ra na yin ano e sevwêl Misra. E bayis min, á ra gbɔng pyɛ̂ langat na pyɛ̂ bes. A vey na tumbang detidetu tanga como, ko a nusu na yin na gbɔng reto mɛ na gap mɛ.

³⁵“Dagwi Darwey á ra pyɛ́ yemo mwa, na yin a tɔk, e yɛ nju mɛ zɔng de a sé Dagwi, ko vit a hwak sede yɛ.

³⁶A tik in, na yin a wok fwɔ mɛ yi e lagwi, yaga na a bin misang a yin ha mɛ. Ko e ngamo e jey, a tɛ̀ in, yin a di kya mɛ rey o sedesi, ko yin a wok ha mɛ yi e ji hɛ.

³⁷Dagwi a tɛ̀ yey na bedabeda min, ko a kasa hin. A pat in na gbɔng reto mɛ yi e sevwêl Misra.

³⁸A remo, ê ro yerê bemât jey de ya dal in na nerey mwa na gap yi e nuyel min. Ê vey na yin e sevwel mɛn o, na a nɔng in sɛ nap.

³⁹“Yaga ano, bare hin yunung, yin kwon ye bam wɛt, Dagwi Darwey a sé Dagwi e lagwi na jey. Vit a Dagwi hwak.

⁴⁰Gyeng in badu mɛ mwa de ma ga nɔng in vɛ yunung, ko kayɛ pyɛ ya rɔda kyè a yin na yere min naka. Yin a rɔda ros e jey e vwel hemo de Dagwi Darwey, Dagwi min a sé nɔng in hɛ na hē sè benap min gbak-gbak.”

⁴¹E bama mo, Mose a paa bapomo batat e rwa rak na Rɔt Yɔrdan,

⁴²yaga na mwat a tɔk tele a wɔ̀ dal ɛ, ka sede a mɔrɔ mwat e gawey, ko mwat o a sé mwât repugu mɛ wɛt. Mwât mɔrɔ̂ mwat o e tɔk wɔ̀ dal e hak e ji bagbɔng bapomo mo, ko bê raa hɛ be wɔ̀ mɔrɔ hɛ e ji rɛ wɛt.

⁴³Ba paa Bɛzɛr de ra sé e ra tas hey yaga yerê Rubɛn, na Ramɔt e bak vwêl Gileyat yaga yerê Gat tanga Golan e bak vwêl Bashan yaga yerê Manase.

⁴⁴Badu Dagwi a vemo tanga basa detidetu e ra vɛ de Mose a nɔ̂ng BeIsrayɛl e bama de yɛn a ga nusu hɛn yi e sevwêl Misra.

⁴⁵

⁴⁶A nɔng ɛn vɛ jeng de yɛn á sè e nɛk wo rwa rak na Rɔt Yɔrdan bagat na repomô Bet-Pɛyɔr. Yɛnɛ̂ vwel o há kana sè hê Gbɔng Gwɔ̀m Sihɔn wo BeAmɔr de a re negwɔm yi e repomô Hɛshbɔn. Mose tanga bemât comô BeIsrayɛl bá re hɛ na como jeng de yɛn á kana nusu yi e sevwêl Misra.

⁴⁷Yɛn á sey ɛ vwel mɛ mo, mwa na hê Gbɔng Gwɔ̀m Ɔk wo Bashan, hwak e ji begbɔng begwɔ̀m BeAmɔr de á sangal e rwa ta na Rɔt Yɔrdan.

⁴⁸Vwel o há sè yi e repomô Arower e hagât Rɔt Arnɔn vɔk e rwa bato pere wɔ̀ sɛ̀ mɛ Raku Hɛrmɔn de ba tang wɛ à Siriyɔn[2] arɔng.

⁴⁹Vwel o ha wɔ̀ wuna ɛ mwa yɛnɛ̂ vwel hê rwa rak na Rɔt Yɔrdan pere vɔk e Gbɔng Rep Nevwashe e rwa batin, ko e rwa rak ha wɔ̀ wul fwɔ̂ Raku Piska.