Read berom Bare Badu 5 Bible Online

Bare Badu 5 - berom bible

Bare Badu 5

¹Mose a yila BeIsrayɛl mwa e dem hining, ko a yang ɛn: À yin BeIsrayɛl, wet in betong na mwa badu de ma rɔda nɔng in yunung. Masa hin vɛ, na yin a gyeng vɛ naka.

²Dagwi Darwey, Dagwi mot a wuna hɛ na sira tanga wot e ra tɛ̂t Raku Hɔrɛp.

³A wuna hɛ na bedabeda mot zɔng wɛt, ko na mwa hot de wot a sé beken yunung.

⁴E hwomo e ra raku mo, Dagwi Darwey a ha na yin bayis na bayis yi e ji kya,

⁵ko yin á wok bengyip kya mo, ko yin á kyɛ́ in nà tut e raku mo. Ano, ma tumal e tē min na Dagwi Darwey e jeng o, na me há a yin pyɛ de yɛ á sè ha. “Pyɛ́ ma yemo mwa de a ye:

⁶“ ‘E me wɛ à Dagwi Darwey de ma sé Dagwi mō. Ma nusu na hwo yi e ji sesam e sevwêl Misra.

⁷“ ‘Hwo vɔk Dagwi hwak detu na me wɛt.

⁸“ ‘Hwo yong a tó mo pyɛ cak ye sekwit de ya sé rezinâ pyɛ cak e lagwi, kɛ e jey, kɛ e ji gworep e nɛ̂n vwel wɛt.

⁹Hwo gaba e cat bol pyɛ sekwit na hwo re a yɛ fongol wɛt. Yaga me, Dagwi Darwey, Dagwi mō, me tɛ̀ yey na bemat hom sizɔng, ko me simo na hwo tɛ̀ yey na me zɔng arɔng. Mê tala vemo de ba kyɛ́ ɛn me. Mê to tala nèy mɛn wɔ̀ sɛ̀ zamang hê netat na hê nenaas.

¹⁰Ko vemo de ba tɛ̀ yey mɛn na me, de ba gyeng badu hom, mê dura nerat hom e ra bezamang gu kpɛɛ.

¹¹“ ‘Hwo ra fwom na reza hom e gwong vwes wɛt. Me Dagwi Darwey, Dagwi mō ma rɔda tabak mwat de a ra fwom vwes na reza hom.

¹²“ ‘Gyeng Tûk Shábat. Ha sé tuk de ma tik hɛ jaram yaga me, sede remo de ma nɔng o nu, me, Dagwi Darwey, Dagwi mō.

¹³Hwà vɔk nepɔlɔ netyiimin, na hwo ra fwom mō mwa.

¹⁴Ko tuk hê taama ha sé tûk pɔngɔ, ha sé jaram yaga me Dagwi Darwey, Dagwi mō. Mwat a ra fwom hwak e tuk hane mo wɛt kɛ hwo, kɛ nèy mō, kɛ sam mō rwas o kɛ hwā mo, kɛ rɔndɔng mō, kɛ madung mō, kɛ bwang yas mō, kɛ kwɛnɛt de a sé sangal e pomo mō. Ano, besam mō ba rɔda pɔng sede hwo arɔng.

¹⁵Bare, hwà kana sè sam e sevwêl Misra, ko me, Dagwi Darwey, Dagwi mō ma nusu na hwo na gbɔng reto na gap hom. Yaga ano de ma nɔng o nu na hwo gyeng Tuk Shábat.

¹⁶“ ‘Nɔ̂ng da mō na neng mō nerey, sede remo de ma nɔng o nu. Ano, kayɛ pyɛ yê kyè a hwo naka, ko nepɔlɔ mō nê gwɛ̌ hɛn e sevwel de me, Dagwi Darwey, Dagwi mō ma sé nɔng o.

¹⁷“ ‘Hwo mɔrɔ mwat wɛt.

¹⁸“ ‘Hwo ra nejwang wɛt.

¹⁹“ ‘Hwo shigi wɛt.

²⁰“ ‘Hwo nɔng nuha bɔs e ra mwat hwak wɛt.

²¹“ ‘Hwo mara yis e ra hwā kɛ rwâs mwat hwak wɛt. Hwo mara yis e ra lɔ mɛ, kɛ cap mɛ, kɛ sam mɛ rwas o kɛ hwā mo, kɛ rɔndɔng mɛ, kɛ madung mɛ, kɛ kayɛ pyɛ de ya sé myɛ.’

²²“Badu ma vemo de Dagwi Darwey a nɔng in jeng de yin á tula hin e fwɔ̂ raku. A há na fwɔ mɛ gwô gap yi e ji kya tanga yi e ji rele de ra siri, a nɔng in badu vemo zɔng, a to gwɛ̌ ɛ bahak wɛt. E bama mo, a jɛk vɛ e ra beta bagasak beba, ko a nɔng me vɛ.”

²³“Jeng de kya há sè e raku mo, ko yin á wok fwɔ yi e ji rele de ra siri, mwa bemât nuyel yére min tanga bemakuk bá vey na me,

²⁴ba ye, ‘Yunung, Dagwi Darwey, Dagwi mot a ga dura a wot nerey mɛ na gbɔng nerat mɛ. Wot á wok fwɔ mɛ yi e ji kya! Wot a ga di, mwat ê tɔk re nuyel na neken mwa ano de Dagwi a sé ha na yɛ.

²⁵Ko a remo, wot ê jama reku e ji kya rey o sedesi hane arɛt? Mwin, wot ê kushu, ka sede wot a re nuyel na wok fwɔ̂ Dagwi Darwey, Dagwi mot.

²⁶Mwat hwak a ga sang nàra kwen e bama de a wok Dagwi wo neken a sé ha yi e ji kya a?

²⁷Di, e hwo à Mose de hwô to toyo, na hwo wɔ̀ wok kayɛ pyɛ de Dagwi Darwey, Dagwi mot a sé ha. E bama mo, hwô de gyirik na hwo ba ha a wot pyɛ de a ha a hwo. Wot a rɔda wet betong na ha mo, ko wot ê gyeng hɛ.’

²⁸“Jeng de Dagwi Darwey a wok ha hane, a yang me, ‘Ma ga wok pyɛ de bemat o ba ha, ko yɛn a ha yɛt.

²⁹Káa, ka yɛn a dopse bare ano! Ka yɛn a dopse nɔng me nerey, na be gyeng badu hom mwa. Ano de kayɛ pyɛ yê sè a yɛn gyat, yɛn tanga yére mɛn nesheneshey.

³⁰Ci wɔ̀ ha a yɛn, yɛn a to ɛn vɔk e bǔk mɛn.

³¹Ko hwo, sangal e ngamo na me. Mê nɔng o nu na badu hom mwa arɔng. Basa a bemat vɛ, yaga na yɛn a gyeng vɛ e ji sevwel de ma sé kyè wɔ̀ nɔng ɛn.’ ”

³²Mose a re nuyel, a ye: “A yin BeIsrayɛl, tē in naka, na yin ra kayɛ pyɛ de Dagwi Darwey, Dagwi min a ga nɔng in nu e ra yɛ. Yin kyɛ́ in nà gyeng bahak e ji badu mɛ wɛt.

³³Raa hin gwong de a dura a yin e ji badu mɛ, yaga na kayɛ pyɛ ye kyè a yin naka, na yin ros e jey e vwel de yin a sé kyè wɔ̀ sey ɛ hɛ na he sè nap min.”