Read berom Bare Badu 6 Bible Online

Bare Badu 6 - berom bible

Bare Badu 6

¹Mose a yâng BeIsrayɛl: “Badu ma vemo de Dagwi Darwey, Dagwi min a nɔng me nu, na me basa a yin vɛ. Gyeng in vɛ e ji sevwel de yin a sé kyè wɔ̀ yel na yin sangal ɛ.

²Sap in Dagwi Darwey, Dagwi min, na yin a gyeng badu mɛ mwa de ma sé nɔng in vɛ jojot. Ra in ano, yin na yére min, ko yin ê sangal e ji sevwel o neshey pyak.

³À yin BeIsrayɛl, wok in, na yin a gyeng badu mo! Yi ano, yin a rɔda sangal tyang, yin ê tɛ́ in yére ryey. Yin a rɔda sangal e vwel de ha siri, ko he nɔngɔs pyɛ́ shɛrɛk, tyɛng sede remo de Dagwi Darwey, Dagwi wo bedabeda min a ga kana sira na a nɔng in hɛ.

⁴“Wet in betong, à yin BeIsrayɛl! Dagwi Darwey a sé Dagwi mot, yɛ Dagwi Darwey nju mɛ.

⁵Yaga ano, tɛ̀ in yey na yɛ na yey min mwa, na simo min mwa, na gap min mwa arɔng.

⁶“Vɔk in badu vemo de ma sé nɔng in yunung e yey min.

⁷Rá in berem na nèy min e ra vɛ. Yin dopse ha e ra vɛ kayɛ jeng, jeng de yin a sé e lɔ, na jeng de yin a sé e jey, jeng de yin a sé kyè wɔ dyɛng, jeng de yin a sene arɔng.

⁸Jɛk in vɛ, na yin a rɔgɔs vɛ e bègasɔ min tanga e batili min, na yin a dopse bare na vɛ.

⁹Jɛk in vɛ e ra sesêk ri duk min tanga e ra ri rùhup bapomo min arɔng.”

¹⁰Mose a re nuyel, a ye: “Dagwi Darwey, Dagwi min ê wɔ na yin e ji sevwel de a simo a nɔng in, sede remo de á sira a bedabeda min Abraham, na Yishak tanga Yakɔp. E hwomo, yin ê sɛ̀ bagbɔng bapomo de ba vɔk nelɔ nerat de yin a lɔk nɛ wɛt.

¹¹Nelɔ mo na rɔda sila na pyɛ́ ryat de yin a tɛ̀ yɛ e ji mo wɛt. Yin ê sɛ̀ hes de yin a kas wɛt, na hirî batîn anap na ve pat de yin a tus arɔng wɛt. Jeng de yin ê vɔk kayɛ pyɛ de yin e simo, na yin a re shɛrɛk,

¹²ko tē in naka yin kwon ye bam à Dagwi Darwey, de á sey ɛ hin yi e Misra yi e kwɔn de yin á sè ɛ besam!

¹³“Sap in Dagwi Darwey, Dagwi min, re in a yɛ nju mɛ zɔng fongol, ko yin sira na reza mɛ nju mɛ zɔng.

¹⁴Yin re a cī fongol wɛt, cī yane de yére dyuk de ya gwɔrɔ hin ye re a yɛ fongol.

¹⁵Ka sede yin a re a cī fongol, shôm Dagwi Darwey ya rɔda hwo e ra yin sede kya, ko ya rɔda wey na yin mwa hywiri. Yaga Dagwi Darwey, Dagwi min, de a sé tanga yin, e tɔk niri na mwat de e simo a sey ɛ nerey mɛ wɛt.

¹⁶“Yin kwon mara nirî Dagwi Darwey, Dagwi min sede remo de yin á ra e Misra.

¹⁷Tē in naka, na yin gyeng badu mɛ mwa de a ga nɔng in.

¹⁸Ra in pyɛ́ de a ye, ya sé tyɛng ko ya sé ryat arɔng. Ano kayɛ pyɛ ya rɔda kyè a yin naka, ko yin a rɔda tɔk wɔ̀ sey ɛ vwel de ha sé rat, hemo de Dagwi Darwey á kana sira a bedabeda min na a nɔng ɛn hɛ.

¹⁹Ko yin a rɔda ro vê repugu min yi e hɛ, tyɛng sede remo de a ga kana sira arɔng.

²⁰“E jeng de ye kyè vey, nèy min na rɔda ba rangal hin, nê ye, ‘Yaga sɛ́ de Dagwi Darwey, Dagwi mot a nɔng ot badu vemo mwa arɛt?’

²¹“Ko yin a rɔda yang ɛn ngan, ‘Wot á sè besam gbɔng gwɔ̀m Misra, ko Dagwi Darwey á nusu na wot na gbɔng reto mɛ.

²²Wot á di de á ra pyɛ̂ bes tanga pyɛ̂ bengyip sizɔng. Yi ano, á vey na gbɔng reyɔm e ra gbɔng gwɔ̀m o, na belɔ mɛ tanga mwa bwang BeMisra mo.

²³Ko wot, yɛ á nusu na wot yi e Misra mo, na a vey na wot e ngamo, na a ba nɔng ot vwel hemo, sede remo de á kana sira a bedabeda mot.

²⁴Ano kwong, Dagwi Darwey, Dagwi mot a nɔng ot nu, wot gyeng badu vemo mwa, na wot a sap ɛ arɔng. Ka wot a ra ano, kayɛ pyɛ yê kyè naka na wot, ko wot ê rɔngɔl beken, sede remo de wot a sé yunung.

²⁵Ka sede wot a gyeng kayɛ pyɛ de Dagwi a nɔng ot nu e ra yɛ na tsak o, ko yɛ a rɔda vɔk yey pyɛng na wot.’ ”