Read berom Bare Badu 7 Bible Online

Bare Badu 7 - berom bible

Bare Badu 7

¹Mose a yâng BeIsrayɛl: “Dagwi Darwey, Dagwi min a rɔda vey na yin e vwel de yin ê sey ɛ hɛ, na yin sangal ɛ. Yɛ a rɔda ró yére pyak yi e ji hɛ, yɛ à BeHiti, na BeGirgash, na BeAmɔr, na BeKanaan, na BePɛrizi, na BeHivi tanga BeYebus. Yére tyaama mo ya dal in na nepyak na gap arɔng.

²Jeng de Dagwi Darwey, Dagwi min, a rɔda tɛ̀ bemat vemo e vwɔ min, yin re ɛn e como, ko a sé gbing-gbing, yin mɔbɔs hɛn hywiri. Yin ra gafiri na yɛn kɛ yin wok nemwishish mɛn wɛt.

³Yin ra weneng na behak e ji mɛn kɛ yin tik nèy min ne ra weneng na yɛn wɛt arɔng.

⁴Ka yin a ra ano, ko yɛn a rɔda hwɔlɔ nèy min yi na Dagwi Darwey, na yɛn a hwo re a cī fongol. Ka sede yin a ra ano, ko Dagwi Darwey a rɔda vo shom na yin, ko ê wey na yin dey-dey.

⁵“Yaga ano, gangas hin begagbang nása nɔrɔ̂ yas vɔk na cī mɛn, mɔbɔs hin beta sekwit de ba tɛ̀ vɛ cik, tow in sesêk Ashera, ci hwā mo, ko yin rangas pyɛ̂ sekwit mɛn arɔng.

⁶Ra in ano, yaga yin a sé vê Dagwi Darwey, Dagwi min. A ga kana kasa hin yi e yére jey mwa, yaga na yin se vê yey mɛ.

⁷“Dagwi Darwey a tɛ̀ yey na yin, ko a kasa hin, yaga yin a dal bwang yére bemât jey na nepyak wɛt. Mwin, yin a dal na nesɛl e ji mwa yére jey.

⁸Ko a tɛ̀ yey mɛ na yin, a simo na a gyeng sira de a ga kana wuna na bedabeda min. Pyɛ ma yemo de ya tɛ̀, a sey in na gbɔng reto mɛ, ko a nusu na yin yi e ji sesam hê gbɔng gwɔ̀m Misra.

⁹“Bare hin, Dagwi Darwey, Dagwi min a sé Dagwi gwining zɔng wo tsak o. E gyeng wuna-na-sira mɛ na tsak o na bezamang gu rining vê bemat de ba tɛ̀ yey mɛn na yɛ, ko yɛn e gyeng badu mɛ arɔng.

¹⁰Ko vemo de be kyɛ́ ɛn hɛ, a rɔda tabak hɛn dey-dey, ê wey na yɛn.

¹¹Yaga ano, gyeng in badu na basa mɛ mwa de ma ga nɔng in vɛ yunung.”

¹²Mose a re nuyel, a ye: “Ka sede yin a wet betong na badu vemo, na yin gyeng vɛ na tsak o, ko Dagwi Darwey, Dagwi min a rɔda re nuyel na gyêng wuna-na-sira mɛ na tsak o arɔng tanga yin, hemo de á kana ra a bedabeda min.

¹³A rɔda tɛ̀ yey na yin, ê tɛ̀ nerat e ra yin, yaga na nepyak min ne gwɛ̌ hɛ, na yin a vɔk nèy pyak arɔng. A rɔda tɛ̀ nerat e ra hiri min, yaga na yin a vɔk pyɛ̂ yéneng, na nshî anap, tanga něy pwat. Ano arɔng, a rɔda gwɛ̌ a yin berɔndɔng na vyēl pyak. A rɔda nɔng in pyɛ́ ryat yemo e vwel de a ga kana sira a bedabeda min, a rɔda nɔng in hɛ.

¹⁴Dagwi ê tɛ̀ a yin nerat de na dal ne kayɛ yerê bemât jey. Vit a hwak e ji min kɛ e ji yas min de ê sè sang-gwon.

¹⁵Dagwi Darwey a rɔda gyép in yi e nerɔ detidetu, ê tɛ̀ yerê nerɔ neves de ná tak a yin e Misra ne to hwo e ra yin wɛt, ko ê vey na nɛ e ra bemât repugu min mwa e negya.”

¹⁶“Wey in na kayɛ yerê bemât jey de Dagwi Darwey, Dagwi min ê tɛ̀ ɛn e vwɔ min. Yin wok nemwishish mɛn wɛt! Ko yin re a cī mɛn fongol wɛt, yaga ra ano hê sè a yin rwik e fwɔ.

¹⁷“Gyeng, yin ê bare, bemât Kanaan vemo ba dal in na nepyak, ko yin ê tɔk ro ɛn yi e sevwel o wɛt.

¹⁸Yin wok bengyip mɛn wɛt! Bare hin na pyɛ de Dagwi Darwey, Dagwi min a ra a gbɔng gwɔ̀m Misra mwa na bemat mɛ.

¹⁹Bare hin na betumbang beves de yin á di na bayis min, mwa na pyɛ̂ bes na pyɛ̂ langat, na gbɔng reto tanga gap de á ra mɛ fwom, na a nusu mɛ na yin. Ko a rɔda ra a bemat vemo de yin a sé wok bengyip mɛn tyɛng ano arɔng.

²⁰Ê tomo benagagbɛk, na be hwo e ra yɛn, ko bê wey na vemo de ba hywit ɛn, ko ba wɔ̀ lɛsɛ hɛn.

²¹Ano kwong, yin wok bengyip bemat o wɛt. Dagwi Darwey, Dagwi min a sé tanga yin. Yɛ a vɔk gbɔng reto, ko be wok bengyip mɛ.

²²Jeng de yin ê hwo yére yemo mo, ko Dagwi ê ro ɛn hywɛ-hywɛ. Yin ê tɔk wey na yɛn e jeng jining wɛt. Ka sede yin a ra ano, ngyāma vyes yê gwɛ̌ hɛ e kwɔn o, ko yê hwosom e ra yin.

²³Dagwi Darwey a rɔda tɛ̀ yére sevwel o e vwɔ min, ko ê tɛ̀ ɛn, yɛn a kyě lingsit kpɛɛ sɛ̌ yin a wey na yɛn mwa vit.

²⁴Ano arɔng, ê nɔng in reto e ra begbɔng begwɔ̀m mɛn. Vit à hwak de ê ra retek na yin. Yin ê wey na yɛn mwa hywiri, ko ba rɔda ye bam a hɛn e jey. Yin ê wey na kawɛ e ji mɛn.

²⁵Rangas hin pyɛ̂ sekwit mɛn. Yin wok cwey dyam pyɛng na dyam shinang de ba dak mɛ yɛ̄, na yin vɛ a bato min yɛ wɛt. Ka sede yin a ra ano, ko ya rɔda vey a yin na gawey, yaga pyɛ́ mo ya sé a Dagwi byɛm-byɛm.

²⁶Yin vey na pyɛ̂ sekwit mɛn o cak e ji nelɔ min wɛt, yaga na gawey mɛn he kwon to ɛ e ra yin wɛt. A sé gbing-gbing yin kyɛ́ in pyɛ̂ sekwit mɛn o zakzak, na yin byɛs yɛ arɔng, yaga ya sé a Dagwi byɛm-byɛm.”