Read berom Bare Badu 8 Bible Online

Bare Badu 8 - berom bible

Bare Badu 8

¹Mose a yâng BeIsrayɛl: “Gyéng in badu vemo mwa de ma ga nɔng in yunung. Ano de yin ê ros e jey, yin gwɛ̌ nepyak min, na yin a sey ɛ vwel de Dagwi Darwey á kana sira a bedabeda min, na a nɔng ɛn hɛ.

²“Bare hin begwong de Dagwi Darwey, Dagwi min á tɛ̀ yin a kyě kyè e ji kwɛngɛl lwis, á kwey na yin e hey neshey kuru banaas. Á tɛ̀ negbang detidetu ne hwo e ra yin yaga na a mara hin mɛ. Á simo a tɔk kɛ yin ê tɛ̀ gap min e ra yɛ, na yin a gyeng badu mɛ, kɛ wey arɛt.

³Á tɛ̀, yin a wok vyong, ko á nɔng in mana na yin a re, wa sé yerê pyɛ́ de yin kɛ bedabeda min ba ga sang re yɛ wɛt. Á ra ano, na a basa a yin mɛ wɔgɔ, pyɛ̂ re zɔng ya vey na mwat a nàra kwen wɛt, ko e simo kahɛ ha de Dagwi Darwey a ha arɔng.

⁴“E ji nepɔlɔ kuru banaas nane, berugu min ba ga kwopos wɛt, ko bol min ba ga pus na kwɛngɛl o arɔng wɛt.

⁵Ano, tik na yin a tɔk, Dagwi Darwey, Dagwi min e simo a basa a yin pyɛ́ de yin ê ra, tyɛng sede remo de da e basa a nèy mɛ pyɛ́ de nê ra.

⁶Yaga ano, ra in tyɛng pyɛ de Dagwi a nɔng in nu e ra yɛ, raa hin gwong de ê dura a yin yi na badu mɛ, na yin a sap ɛ arɔng.

⁷Dagwi Darwey, Dagwi min a sé wɔ na yin e ji vwel rat de ha vɔk nerɔt na lel nshi. Nshi de na nunus yi e nɛ̂n vwel na tele e benɛk tanga berahwol.

⁸Bê sɛsɛm ɛ alkama na baale, na nèy anap, na nèy regwi, na nèy pomigiranet, tanga nèy pwat mwa na shok arɔng.

⁹Yin a rɔda sang wok vyong, kɛ yin bidɛ pyɛ cak e hwomo wɛt. Beta vwel o ba vɔk dyam e ji vɛ, ko yin a rɔda cing dyam zwey e ji beraku hɛ.

¹⁰Yin a rɔda re kayiyɛ yerê pyɛ́ de yin e simo yin re e hwomo, ko yin a rɔda feng a Dagwi Darwey, Dagwi min yaga vwel rat de a ga nɔng in hɛ.”

¹¹Mose a re nuyel, a ye: “Tē in naka yin kwon ye bam à Dagwi Darwey, Dagwi min wɛt. Yin kwon tik nà gyeng bahak e ji badu mɛ de ma sé nɔng in vɛ yunung.

¹²Jeng de yin a vɔk kayɛ pyɛ de yin e simo yin a re, ko yin a ga lɔk nelɔ nerat,

¹³ko berɔndɔng min, na vyēl min, na dyam pyɛng min, na dyam shinang min tanga bwang pyɛ̂ nedanerey min ya ga gwɛ̌ hɛ pyak,

¹⁴ko tē in naka, yin hwo dak kaa wɛt. Yin ye bam a Dagwi Darwey, Dagwi min wɛt yɛ de á nusu na yin yi e sevwêl Misra, yi e kwɔn de yin á sè ɛ e de sesam.

¹⁵Yɛ Dagwi o á kyè na yin e gbɔng vwêl gbingiring hane de ha sé pyɛ bengyip, de ha vɔk begwɔ̄m de ba vɔk nedɔm neves, mwa na lyāng arɔng. E hwomo, e ji vwel hane de ha hworok hwɔ́k-hwɔk, vit a nshi. Ko yɛ a tɛ̀ nshi ne tele yi e ji gwofwa sulup yaga yin.

¹⁶Ano arɔng, e ji hey o, a nɔng in mana, na yin a re, wa sé pyɛ́ de bedabeda min ba ga sang re yɛ wɛt. A tɛ̀ negbang detidetu ne hwo e ra yin, yaga na yin a tɛ̀ gap min e ra yɛ. A masa hin ano yaga, e yɛnɛ mo, a simo na a tɛ̀ a yin nerat arɔng.

¹⁷“Jeng de pyɛ́ ya sé a yin naka yin kwon ye, e yin de yin a tɛ̀ a bato min nedanerey yi na reto min kɛ gap min wɛt.

¹⁸“Ko bare hin, a sé e Dagwi Darwey, Dagwi min de e nɔngɔs hin gap na yin a sɛ̀ pyɛ́ yemo. E ra ano, yaga e rɔngɔl gyeng wuna-na-sira de á kana ra na bedabeda min, sede remo de yin e bɛrɛng e jeng yemo.

¹⁹“Ko ka sede yin a ye bam a Dagwi Darwey, Dagwi min, na yin a nɔng ɛ ma, na yin a re a cī fongol, na yin a sap yɛ, ma sé tusa hin yunung, ba rɔda wey na yin hywiri.

²⁰Ka sede yin a gyeng hâ Dagwi Darwey wɛt, ko yin ê wey tyɛng sede bemât yére yane de yɛ a rɔda wey na yɛ̄ jeng de yin ê yel e ji sevwel o.”