Read berom Yohana 10 Bible Online

Yohana 10 - berom bible

Yohana 10

¹Yɛsu a ye, “Tsak o mwin me ha a yin: Mwat de e yel e kwarâ vyēl yi e rwi mo wɛt, ko e tut e jwa-duk na a yel e ji mo yi e gwong hwak a sé gbik, a to sé womo de e seres pyɛ̂ bemat na retek.

²Mwat de e yel e rwi kwarâ vyēl, e yɛ̀ de a sé lwek vyēl o.

³Mwât bɛrɛng rwi mo e wuma a yɛ, ko vyēl o ye wet betong na fwɔ mɛ. E yila vyēl mɛ yê tó mɛ na bazâ yɛ̄, ko e kyè e nuyêl yɛ̄ vɔk e jey.

⁴Jeng de a ga pat mwa vyēl mɛ mo e jey, yɛ̀ e kyè e nuyêl yɛ̄, ko vyēl o ye raa hɛ, yaga ya tɔk fwɔ mɛ.

⁵Ko yê raa kwɛnɛt wɛt; ya rɔda tele e jey yi na yɛ yaga ya tɔk fwɔ̂ kwɛnɛt wɛt.”

⁶Yɛsu a ha gwɔrɔ-há hemo, ko bemat de ba wokos hɛ ba tɔk pyɛ de a sé ha a yɛn wɛt.

⁷Yaga ano, Yɛsu a to yang ɛn, “Tsak o mwin me ha a yin: E me de ma sé rwi de vyēl ye kweres ɛ̀.

⁸Mwa vemo de bá tānga vey e ra me bá sè begbik, bá to sè vemo de be seres pyɛ̂ bemat na retek, ko vyēl o yá wet betong na fwɔ mɛn wɛt.

⁹E me de ma sé rwi mo. Kawɛ mwat de e yel yi na me, ba rɔda sey neken mɛ. A rɔda yel, ko a to nusu, ko a rɔda sɛ̀ pyɛ̂ mwa de e simo yaga neken mɛ.

¹⁰Gbik e vey na a ba shigi zɔng, na a mɔbɔs, na a ba wey na pyɛ́ arɔng. Me ma vey, yaga na vyēl hom ye sɛ̀ neken ne mwin, ko yaga na ye sɛ̀ nɛ shɛrɛk.

¹¹“E me de ma sé lwêk vyēl rwat. Lwêk vyēl rwat e yong ɛ na a nɔng neken mɛ, na a sɛlɛ mɛ̀ vyēl o.

¹²Mwat de be talsa hɛ byɛ̂ fwom mɛ, yɛ a sé lwêk vyēl wɛt, ko vyēl o ya sé myɛ arɔng wɛt. Yaga ano, jeng de yerê mwat o a di bwá wo kyè vey, e hàla vyēl o, ko e tele. E bama mo, bwá mo wo hwo e ra vyel cak, ko wo shara bwang o.

¹³Mwat o e tele nedemɛ, yaga yɛ a sé mwât byɛ zɔng, ko pyɛ mɛ ya sé na bɛrɛng vyēl o naka wɛt.

¹⁴E me de ma sé lwêk vyēl rwat. Ma tɔk vyēl hom, ko vyēl hom arɔng ya tɔk me,

¹⁵tyɛng sede remo de Da hom a tɔk me, ko me ma tɔk Da hom arɔng. Ko me yong me na me nɔng neken hom, yaga na me sɛlɛ mɛ̀ vyēl o.

¹⁶Ma vɔk vyēl o cak de ya sé yê kwara vyēl gwomo wɛt. A sé gbing-gbing na me vey na yɛ̄ arɔng. Ya rɔda wet betong na fwɔ hom, ko kwara mo gwa rɔda sè gwining na mwât gyeng o gwining arɔng.

¹⁷“Da hom a tɛ̀ yey na me, yaga ma yong me na me nɔng neken hom, yaga na me to sey nɛ arɔng.

¹⁸Vit a mwat de e tɔk sey ɛ̀ neken hom yi na me. Ko me pyɛ hom me tik nɛ, yaga me simo me ra ano. Ma vɔk reto na me tik nɛ, ko ma vɔk reto na me to jut nɛ. E pyɛ ma yemo de Da hom a nɔng me redu na me ra.”

¹⁹Yaga neha nemo, bemat ba to gas ɛn zang ba.

²⁰Pyak e ji mɛn ba ye, “Yɛ a vɔk ceng! E lolong! Yaga sɛ́ de yin e wet betong na yɛ arɛt?”

²¹Ko behak ba ye, “Mwat de a vɔk ceng ê tɔk ha neha yerê nemo wɛt. Yi e rɛ̌ de ceng yê tɔk wunta bayîs bebók arɛt?”

²²Jeng yane yá sè jeng gûl zɛng, ko ba ra Nzem Yong Gbɔng Duk Re Fongol e Yɛrusalɛm.

²³Yɛsu a sé e nelalâ Gbɔng Duk o, a kyě kyè e kwɔn de ba tâng hɛ, à Fwàm Sɔlɔmɔn.

²⁴Bemat ba tula hɛn, ba gwɔrɔ hɛ, ko ba yang ɛ, “Vɔk e yɛ̌ jeng de hwô tik ot na wot a sè dasap mwat de hwà sé arɛt? Ka sede hwà sé Mwat de Dagwi a kasa na a sey bemat, ko hā a wot wɛshɛrɛk.”

²⁵Yɛsu a toyo a yɛn, a yang ɛn, “Ma kana ha a yin, ko yin a sey tsak o na há hom wɛt. Tom vemo de me ra e ji rezâ Da hom, e vɛ de be dura a yin yerê mwat de ma sé.

²⁶Ko yin a sey tsak o na há hom wɛt, yaga yin a sé bemat hom wɛt.

²⁷Bemat hom ba sé sede vyēl de ye wet betong na fwɔ hom. Ma tɔk vɛ, ko be raa me.

²⁸Me nɔ̂ng vɛ neken gbak-gbak, ko bê sang wey wɛt. Vit a mwat de ê tɔk tara vɛ yi e vwɔ hom.

²⁹Da hom de a nɔng me vɛ a dal pyɛ̂ mwa. Vit a mwat de ê tɔk tara vɛ yi e vwɔ̂ Da hom.

³⁰Me tanga Da hom wot a sé vining o.”

³¹Bemat o ba to tɔng beta na be tó ɛ mɛ̀, na be mɔrɔ hɛ.

³²Ko Yɛsu a yang ɛn, “Yin a ga di tom rat pyak de ma ga ra yi na retô Da hom. E gwɛ̌ fwom rwat de gwa tɛ̀, yin a simo yin a tó me na beta yaga gwɛ arɛt?”

³³Yɛn a toyo a yɛ, ba ye, “Wot ê tó o na beta yaga hwak e ji tom rat vemo wɛt, ko yaga gwong de hwó byɛs Dagwi. Yaga hwo de hwà sé mwasi zɔng hwó tē, hwà sé Dagwi.”

³⁴Yɛsu a toyo a yɛn, a ye, “Bà ga jɛk e ji Badu min neha Dagwi nemo ngan: ‘Ma ga ye, yin a sé bedagwi.’

³⁵Wot a tɔk, pyɛ́ de bà jɛk e Bwok-basa Dagwi ya sé tsak o gbak-gbak. Ko di, Dagwi a yila bemat vane mo, à bedagwi, ko a sé e yɛn vɛ de à ha a yɛn há mɛ.

³⁶Ko me a, Dagwi a tik me jaram na me sè mwɛ, ko a tomo me vey e jey. Yaga sɛ́ kwong de yin e tē ma sé byɛs Dagwi jeng de ma ye, ma sé Hwey Dagwi arɛt?

³⁷Ka sede pyɛ́ de me ra ya sé tom Da hom wɛt, yin sey tsak o na há hom wɛt.

³⁸Ko ka sede ma ra tom o, tɛ̀ in gap min e ra há hom yaga tom o, mwa ano de yin a ka sey tsak o na há hom wɛt. Yi ano, yin a rɔda tɔk tsɛng-tsɛng, Da hom a sé gwining na me, ko me arɔng ma sé gwining na Da hom.”

³⁹Yɛn a to jāma be vo Yɛsu, ko a hywit ɛ e vɔ mɛn.

⁴⁰Ano kwong, a ye dɔ a Rɔt Yɔrdan vɔk e kwɔn de Yohana á kana sè tɛ̀sɛ a bemat batisma e negasi ne susu mo, ko a sangal e hwomo.

⁴¹Bemat pyak ba vey na yɛ, ba ye, “Yohana a ra pyɛ bes cak wɛt, ko kayɛ pyɛ de a ha e ra mwat womo ya sé tsak o.”

⁴²Ko e kwɔn hane mo, bemat pyak ba tɛ̀ gap mɛn e ra Yɛsu.