Read berom Yohana 11 Bible Online

Yohana 11 - berom bible

Yohana 11

¹Mwat hwak á sè de ba tang ɛ, à Lazarus, a ro ɛ. Á sangal e Bet-Anya, kerepomo de Marya na gwa mɛ Marta bá sè ɛ̀.

²(E Marya gwining wane de a shushu Darwey na něy nesang hyɔɔlɔl, ko a yishing bol mɛ na setôt rato mɛ. Lazarus de a ro ɛ a sé gwa mɛ.)

³Ano kwong, begwa mɛ behwong o ba tomo na há vɔk na Yɛsu, ba ye, “À Darwey, sâ yey mō e ro ɛ.”

⁴Sede Yɛsu a wok ano, a ye, “Serɔ semo sa rɔda yɛnɛ hɛ na reku wɛt. Sa rɔda tɛ̀ bemat be di gbɔng nerêy Dagwi, na be to di gbɔng nerêy Hwey Dagwi arɔng.”

⁵Yɛsu a tɛ̀ yey na Marta, na gwa mɛ hwong o, na Lazarus arɔng.

⁶Ko mwa ano, jeng de a wok, Lazarus e ro ɛ, a gwɛ̌ sangal e kwɔn de á sè ɛ̀ nepɔlɔ neba.

⁷E bama mo, a yâng bemât masâ fwom mɛ, “Tik na wot a to ot vɔk e sevwêl Yudiya.”

⁸Ko yɛn a yang ɛ, “À Mwat Basa, nepɔlɔ net de na kwey bemat e hwomo ba jāma be tó o na beta, na be mɔrɔ hwo. Ko a remo, hwó simo na hwo to kyè wɔ e hwomo arɛt?”

⁹Yɛsu a toyo a yɛn, a ye, “A sé dyâm-gwi kuru na yɛ bya de jey ye sè gbey wɛt arɛt? Mwat de e kyě kyè nagwi e tiri bwol wɛt, yaga e bɛrɛng jey yi na negbêy jey yemo.

¹⁰Ko a sé e mwat de e kyě kyè naturuk de e tiri bwol, yaga a vɔk negbey wɛt.”

¹¹E bama de a ha a yɛn ano, a gwɛ̌ ha, a ye, “Sá mot Lazarus a ga vo nevwa. Ko ma sé kyè wɔ e hwomo na me wɔ̀ sene hɛ.”

¹²Bemât masâ fwom mɛ mo ba yang ɛ, “À Darwey, ka sede a sê nevwa, ko a rɔda tɛ̀ tyang.”

¹³Ko Yɛsu á sè ha a yɛn e ra rekû Lazarus, ko yɛn a bare, a sé ha e ra nevwa de mwat e wɔ̂ nɛ.

¹⁴Yaga ano, a ha a yɛn dɛdɛɛt, “Lazarus a ga ku.

¹⁵Ko yaga yin, ma vɔk yey pyɛng de ma sè e kwɔn o wɛt. Yi ano, yin a rɔda hwo tɛ̀ gap min e ra me. Ko tik na wot a kyè wɔ na yɛ.”

¹⁶Tomas, de ba tang ɛ, à Shambya a yâng bwang bemât masâ fwom o, “Tik na wot a wɔ́ arɔng, na wot a bin wɔ̀ ku tanga yɛ.”

¹⁷Jeng de Yɛsu a wul hwomo, a wok, ba ga kana lɛrɛ Lazarus o pɔlɔ naas.

¹⁸Kerepomô Bet-Anya mo ka wul lyōsho tyat yi e Yɛrusalɛm wɛt,

¹⁹ko bemat pyak yi e sevwêl Yudiya ba ga kana vey na Marta tanga Marya, na yɛn a wɔrɔk hɛn yaga rekû gwa mɛn o.

²⁰Sede Marta a wok, Yɛsu a sé kyè vey, a nusu na a bin wɔ̀ man na yɛ, ko Marya a sangal e ji lɔ.

²¹Marta a yâng Yɛsu, “À Darwey, ka hwá kana sè e ngamo, ka gwa hom a yâng ku wɛt.

²²Ko ma tɔk, mwa ano de Lazarus a ga ku, Dagwi a rɔda ra kayɛ pyɛ de hwà rangal hɛ.”

²³Yɛsu a yang ɛ, “Gwa mō a rɔda to sene yi e reku.”

²⁴Marta a toyo a yɛ, a ye, “Ey, ma tɔk, a rɔda to ba sene e jeng sensa bemat e tuk hê yɛnɛ mo.”

²⁵Yɛsu a yang ɛ, “E me de me tɛ̀ bemat be sene yi e reku, ko e me de me nɔng ɛn neken. Mwa ano de mwat ê ku, ê re nuyel na sé na neken, ka sede a tɛ̀ gap mɛ e ra me.

²⁶Ka sede mwat a vɔk neken ne mwin, na a tɛ̀ gap mɛ e ra me, ko ê sang ku wɛt. Hwà sey tsak o na há hemo arɛt?”

²⁷A yang ɛ, “Ey, à Darwey, ma sey tsak o, hwà sé Mwat de Dagwi a kasa na a sey bemat, hwà sé Hwey Dagwi hemo de Dagwi a ye, hê vey e jey.”

²⁸E bama de Marta a ha há hane, a toyo, a wɔ̀ yila gwa mɛ Marya e hagat, a yang ɛ, “Mwat Basa a ga vey, a sé yila hwo.”

²⁹Sede Marya a wok ano, a sogo ziri, a kyè wɔ̀ sɛ̀ ɛ.

³⁰Yɛsu á kana wɔ̀ wul kerepomo mo e ngyen wɛt, á rɔngɔl e dem de Marta á kana man na yɛ.

³¹Bemat de bá sè sangal tanga Marya e ji duk na be wɔrɔk hɛ ba di ɛ a sogo ziri, a nusu. Ba tē kɛ gyeng a sé kyè wɔ e sak gwa mɛ, na a wɔ̀ tosho e hwomo, ko ba raa hɛ.

³²Marya a wul e dem de Yɛsu a sé ɛ̀. Jeng de a di ɛ, a gaba e cât bol mɛ, ko a yang ɛ, “À Darwey, ka hwá kana sè e ngamo, ka gwa hom a yâng ku wɛt.”

³³Sede Yɛsu a di ɛ, a sé tosho, ko bemat de ba raa hɛ arɔng ba sé tosho, pyɛ mo ya pere ra a yɛ yey ding-ding, ko ya bɔrɔk hɛ.

³⁴A rangal hɛn, “Yin a lɛrɛ hɛ e gwa arɛt?” Ba yang ɛ, “À Darwey, vey na hwo di.”

³⁵Yɛsu a tosho.

³⁶Bemat o ba yâng bemɛn, “Di, a tɛ̀ yey na yɛ sizɔng!”

³⁷Ko behak e ji mɛn ba ye, “Mwat womo a vɔk reto na a wunta bayîs bwók; vit a yɛ na reto de ê tɔk dul Lazarus nà ku wɛt arɛt?”

³⁸Pyɛ mo ya to ra a Yɛsu yey ding-ding. A wɔ́ e sak de wa sé fwara, ko ba bang nû wɛ na gwofwa gwohwak.

³⁹Yɛsu a ye, “Gáng in gwofwa mo e hagat!” Marta, de a sé gwa mwat de a ga ku mo a yâng Yɛsu, “À Darwey, a ga tɛ̀ nesang, yaga a ga ra pɔlɔ naas e sak.”

⁴⁰Ko Yɛsu a yang ɛ, “Ma kana ha a hwo, ka sede hwà tɛ̀ gap mō e ra me, ko hwà rɔda di gbɔng nerêy Dagwi.”

⁴¹Ba gang gwofwa mo, ko Yɛsu a bɛrɛng vɔk e lagwi, a ye, “À Da, ma feng a hwo, yaga hwà wok won hom.

⁴²Ma tɔk, hwó wokos won hom kayɛ jeng. Ko ma ha ano wɛshɛrɛk, yaga nerât bemat vemo de ba sé tumal e ngamo, na yɛn a sey tsak o, a sé e hwo de hwá tomo me.”

⁴³E bama de a ha ano, a yila na gbɔng fwɔ, “À Lazarus, nusu!”

⁴⁴Yɛ de a ga kana ku a nusu. Bá kana hanas vɔ tanga bol mɛ na berugu, bá to hanas bwang bayis mɛ na kerugu. Ko Yɛsu a yang ɛn, “Viri hin hɛ, na yin a hàla hɛ na a kyè.”

⁴⁵Pyak e ji bemat de ba vey di Marya, ko ba to di pyɛ de Yɛsu a ra, ba tɛ̀ gap mɛn e ra yɛ.

⁴⁶Ko behak e ji mɛn ba wɔ́ na BeFarisi, ba ha a yɛn pyɛ de Yɛsu a ra.

⁴⁷Yaga ano, begbɔng bepiris tanga BeFarisi ba yishi bemakûk badu na be ra tula. Jeng de ba man, ba yâng bemɛn, “E sɛ́ de wot ê ra arɛt? Mwat womo a sé ragas pyɛ̂ bes pyak.

⁴⁸Ka sede wot a tik ɛ na a re nuyel na ragâs yerê pyɛ́ yemo, ko mwa bemat ba rɔda tɛ̀ gap mɛn e ra yɛ. Hane hê tɛ̀ BeRoma be vey na be lashe Gbɔng Duk Re Fongol, na be hashe yere mot mwa arɔng!”

⁴⁹Gwining e ji mɛn de ba tang ɛ, à Kayafas, de á sè darwêy bepiris e shey hane mo, a yâng bemɛn, “Yin a sé ha pyɛ de yin a tɔk wɛt!

⁵⁰Yin a tɔk di wɛt wɔgɔ, ka sede mwat gwining ê ku e tô bemat pyak, ko hane hê sè a yin naka he dal de bê lashe yere mot mwa.”

⁵¹Há hane ha vey yi na báre mɛ pyɛ mɛ wɛt. Á sè e Dagwi de a tɛ̀ ɛ a ha ano, yaga á sè darwêy bepiris e shey o. Á sè ha wɔgɔ, Yɛsu ê ku, yaga na a sɛlɛ mɛ̀ yerê BeYuda mwa.

⁵²Ko ê ku yaga yere mɛn zɔng wɛt, ko yaga mwa nèy Dagwi de na sé e kahɛ kwɔn e jey arɔng, na a vey na yɛn na be tɛ́ ɛn vining o.

⁵³Ano kwong, yi e tuk de a ha ano, bemât nuyêl BeYuda ba hwo wuna nu na be jāma gwong na be mɔrɔ Yɛsu.

⁵⁴Yaga ano, Yɛsu a to kyě kyè wɛshɛrɛk e sevwêl Yudiya wɛt. Ko a nu ɛ yi e hwomo, a kyè vɔk e repomô Ɛfrayim e bak yɛnɛ̂ vwel de ha sé hey. A sangal e hwomo, yɛ tanga bemât masâ fwom mɛ.

⁵⁵Jeng ya vey bagat de BeYuda ba ra Nzem Gyilsit Nelɔ BeIsrayɛl. Yaga ano, bemat pyak yi e nebapomo ba tānga wɔ e Yɛrusalɛm gyam na be ra nzem o, yaga na yɛn a bin tɛ̀ bato mɛn jɛrɛ e bayîs Dagwi.

⁵⁶Yɛn a kyě jāma Yɛsu, ko jeng de yɛn a sé tumal e nelalâ Gbɔng Duk Re Fongol, ba sé rangsal bemɛn, “Yin e bare sɛ́ arɛt? A sé a yin, ê vey nzem o arɛt?”

⁵⁷Begbɔng bepiris tanga BeFarisi bá kana nɔng nu wɔgɔ, kawɛ mwat de a tɔk dem de Yɛsu a sé ɛ̀ a wɔ̀ ha a yɛn, yaga na be bin vo ɛ.