Read berom Yohana 12 Bible Online

Yohana 12 - berom bible

Yohana 12

¹Bwang nepɔlɔ netyiimin na be ra Nzem Gyilsit Nelɔ BeIsrayɛl, Yɛsu a wul Bet-Anya; kwɔn a hane de Lazarus á sè na sangal, yɛ de Yɛsu á kana sene hɛ yi e reku.

²Ba kyé a yɛ pyɛ̂ pɔlɔ e hwomo. Marta a sɛlɛ e de nɔngɔs pyɛ́ mo, ko Lazarus a sé e de rê yɛ̄ tanga Yɛsu.

³Marya a jut kefus de ka sila na něy nât nerat o. Něy o na sé ne nesang hyɔɔlɔl, ko na vɔk dyām pyak. A shushu Yɛsu na nɛ e bol, ko a to yishing vɛ na setôt rato mɛ. Nesang něy o na pere gwɔrɔ lɔ mo mwa.

⁴Ko Yuda Iskaryot, gwining e ji bemât masâ fwôm Yɛsu, yɛ de a sé kyè wɔ̀ row ɛ e yɛnɛ mo a ye,

⁵“Yaga sɛ́ de ba row něy nemo, na be nɔ̂ng bepɛng dyām o wɛt arɛt? Dyām nɛ ya sé e nû dyâm fwôm mwat yê shey hining.”

⁶Ko mwin, vit a pyɛ de ya man Yuda mo na bepɛng; a ha ano, yaga yɛ á sè gbik. Á sè e yɛ de a tikis a yɛn dyām e ji dap, ko a ga tɔ́k ɛ e de ragas vwɔ e dyām o.

⁷Ko Yɛsu a ye, “Tik ɛ! A ga tik něy o, yaga na be bin yong mɛ̀ rebek hom e jeng de be ba lɛrɛ me.

⁸Bepɛng bê sè na yin kayɛ jeng, ko me, mê sè na yin kayɛ jeng wɛt.”

⁹Gbɔng regyɛng bemat ba wok, Yɛsu a sé e Bet-Anya, ko ba wɔ́ e hwomo. A sé yaga Yɛsu nju mɛ zɔng de ba wɔ́ wɛt, ko a to sé na be di Lazarus de Yɛsu á kana sene hɛ yi e reku.

¹⁰Yaga ano, begbɔng bepiris ba jāma gwong na be mɔrɔ Lazarus arɔng,

¹¹yaga BeYuda pyak ba hàla hɛn, ko ba tɛ̀ gap mɛn e ra Yɛsu. Bemat o ba ra ano yaga pyɛ de ya té na Lazarus o.

¹²Tuk het, gbɔng regyɛng bemat de bá kana wɔ́ e Yɛrusalɛm yaga Nzem Gyilsit Nelɔ BeIsrayɛl ba wok, Yɛsu a sé kyè vey e Yɛrusalɛm o.

¹³Yaga ano, yɛn a hwo kwɔrɔs nelang tyet, yɛn a nusu, yaga na be wɔ̀ man na yɛ, yɛn a gbɔ, ba tē, “Hosana! Bē somo Dagwi! Tik na Dagwi a tɛ̀ nerat e ra womo de e kyè vey e ji rezâ Darwey! Tik na Dagwi a tɛ̀ nerat e ra Gbɔng Gwɔ̀m BeIsrayɛl!”

¹⁴Yɛsu a laga hwêy madung hane de a sɛ̀ hɛ, sede remo de bà jɛk e Bwok-basa Dagwi wɔgɔ,

¹⁵“À repomô Siyɔn, hwo wok bengyip wɛt! Di, gbɔng gwɔ̀m mō a sé kyè vey, a sé laga hwêy madung.”

¹⁶E jeng de pyɛ́ yemo ya té, bemât masâ fwom mɛ yɛn a tɔk cap-hâ yɛ̄ wɛt. Ko e bama de ba nɔng ɛ gbɔng nerey mɛ na Dagwi, yɛn a pere bare na pyɛ́ de bà jɛk e Bwok-basa Dagwi wɔgɔ, pyɛ́ yemo yê té ano, ko mwin, ba ga ra a yɛ ano mo.

¹⁷Jeng de Yɛsu á kana yila Lazarus na a nusu yi e sak, ko á sene hɛ yi e reku, regyɛng bemat de bá kana sè na yɛ e hwomo bá hwo ha a bemat pyɛ de yɛn a di.

¹⁸Yaga ano, bemat pyak de ba wok há e ra pyɛ bes yane de Yɛsu a ra ba nusu, na be wɔ̀ man na yɛ.

¹⁹Jeng de BeFarisi ba di ano, ba yâng bemɛn, “Yin a di ā! Kayɛ pyɛ de wot a ra ya sé yapyi zɔng! Mwa jey ya sé raa hɛ!”

²⁰BeGirik behak bá sè e ji vemo de ba wɔ́ e Yɛrusalɛm na be re a Dagwi fongol e jeng nzem.

²¹Ba vey na Filip, yɛ de a sé yi e Bet-Saida e sevwêl Galili, ko ba yang ɛ, “À Da, wot e simo wot di Yɛsu.”

²²Filip a sogo, a wɔ̀ ha a Andarawus, ko yɛn beba ba wɔ̀ ha a Yɛsu.

²³Yɛsu a yang ɛn, “Jeng ya ga vey de ba rɔda nɔng Me de ma tɛ́ me mwat gbɔng nerey.

²⁴Tsak o mwin me ha a yin: Sɛ̌ ba tus yenêng alkama na ye ku, ko yê nàra nju yɛ zɔng. Ko ka sede ya ku, yê ta, ko yê tɛ̀ yéneng pyak.

²⁵Mwat de e tɛ̀ yey na tó mɛ zɔng a rɔda bidɛ pyɛ̂ mwa; ko mwat de e tɛ̀ yey na tó mɛ zɔng wɛt e jey yemo a rɔda gyeng tó mɛ neshey gbak-gbak.

²⁶Kawɛ mwat de e simo a ra a me fwom, tik na a raa me. Kahɛ kwɔn de ma sé ɛ̀, mwât fwom hom ê sè na me e kwɔn o arɔng. Da hom a rɔda nɔ̂ng kawɛ mwat de a sé ra a me fwom nerey.”

²⁷“Yey hom ye lashe hɛ, ko mê ye ala arɛt? Mê ye, ‘À Da hom, pat me yi e jeng reyɔm yemo’, arɛt? Wey, a sé yaga na me bin sɔ reyɔm de ma vey e jey.

²⁸À Da, tɛ̀ be nɔ̂ng reza mō nerey!” Ko ba wok fwɔ hwak yi e lagwi, gwa ye, “Ma ga kana ra ano, ko mê to gwɛ̌ ra ano gbak.”

²⁹Regyɛng bemat de bá kana sè e tumal e hwomo ba wok fwɔ gwane mo. Behak e ji mɛn ba ye, “A sé e gbara de wa lulum.” Ko behak ba ye, “A sé e tom-lagwi de a hanat na yɛ.”

³⁰Ko Yɛsu a ye, “A sé yaga sɛlɛ min de fwɔ mo gwa vey, ko a sé yaga sɛlɛ hom wɛt.

³¹A sé a remo de bê ra a jey yemo shɔt, a to sé a remo de ba rɔda pat yɛ de a sé re negwɔm e ra jey o.

³²Ko me, jeng de ba rɔda nára me e rak o, mê tɛ̀ bemât mwa be vey na me.”

³³Yɛsu a ha ano, yaga na a bin dura mɛ̀ yerê reku de a rɔda ku.

³⁴Regyɛng bemat o ba yang ɛ, “E Bwok-basa Badu mot bà jɛk wɔgɔ, Mwat de Dagwi a kasa na a sey bemat a rɔda nàra gbak-gbak. Yaga sɛ́ kwong de hwà sé ye, gbing-gbing na be nára Yɛ de a tɛ́ ɛ mwat e rak o arɛt? E wà de a sé Yɛ de a tɛ́ ɛ mwat o arɛt?”

³⁵Yɛsu a yang ɛn, “Negbey nê sè na yin yaga jeng tyɔng. Kyè in kwɛngɛl min e jeng de negbey o na rɔngɔl na yin, yaga na lwīl gwo kwon sɛ̀ in e gwong wɛt. Mwat de e kyě kyè e ji lwīl e tɔk kwɔn de e kyè vɔk ɛ̀ wɛt.

³⁶Tɛ̀ in gap min e ra womo de a sé negbey o e jeng de a rɔngɔl na yin, yaga na yin a bin tɛ́ in bemât negbey o.” E bama de Yɛsu a ha há hane, a tik kwɔn o, ko a wɔ̀ lɛrɛ hɛ.

³⁷Mwa ano de Yɛsu a ga ragas pyɛ̂ bes yemo mwa e bayis mɛn, ba tɛ̀ gap mɛn e ra yɛ wɛt.

³⁸Pyɛ mo ya té ano, yaga na há de Yɛshaya, zarap Dagwi, à kana ha he sila hɛ. Há ma het ngan: “À Darwey, e wà de a sey tsak o na yɛgɛt mot arɛt? E wà de a ga di retô Darwey arɛt?”

³⁹Pyɛ ma yemo de ya tɛ̀, bemat vemo be tɔk sey tsak o wɛt; yaga Yɛshaya a to ha wɔgɔ,

⁴⁰“Dagwi a ga bang a yɛn bayis, ko a tɛ̀ neyey mɛn ne sè kashalang arɔng, yaga na be kwon bɛrɛng na bayis mɛn wɛt, kɛ na be tɔk tsak o e neyey mɛn wɛt, kɛ na be doyo arɔng wɛt — yaga na me Dagwi, me tɛ̀ ɛn tyang.”

⁴¹Yɛshaya à ha ano, yaga à kana di gbɔng nerey de Yɛsu a rɔda ba vɔk, ko à ha há mo e ra yɛ.

⁴²Mwin, pyak e ji bemakûk BeYuda ba tɛ̀ gap mɛn e ra Yɛsu. Ko ba ha ano wɛshɛrɛk wɛt, yaga ba wokos bengyip, BeFarisi bê paa ɛn e nesâ bemât duk rê fongol.

⁴³Bemakuk o ba simo bemat be nɔng ɛn nerey, ko nerey o na dal a yɛn nemo de ne yi na Dagwi.

⁴⁴Yɛsu a gbɔ, a ye, “Kawɛ mwat de a tɛ̀ gap mɛ e ra me, a sé e ra me nju hom zɔng wɛt, ko a sé e ra mwat de a tomo me arɔng.

⁴⁵Kawɛ mwat de e di me e di yɛ de a tomo me.

⁴⁶Ma vey e jey, na me tɛ̀ bemat be sè e ji negbey, yaga na kawɛ mwat de a tɛ̀ gap mɛ e ra me a kwon to nàra e ji lwīl wɛt.

⁴⁷Ka sede mwat hwak a wokos neha hom, ko a gyenges nɛ wɛt, a sé e me wɛ de mê gang ɛ na shɔt wɛt. Yaga ma vey e jey na me gang bemât jey o na shɔt wɛt, ko ma vey na me sey neken mɛn.

⁴⁸Mwat de a kyɛ́ ɛ me, ko a to sey neha hom wɛt, pyɛ cak ya sé de yê gang ɛ na shɔt. Pyɛ mo, yɛ à neha de ma ha; nà rɔda gang ɛ na shɔt e tuk talâ jey.

⁴⁹Yaga ma ha neha hom o na reto hom pyɛ hom wɛt, ko a sé e Da hom de a tomo me de a nɔng me redu e ra pyɛ de ma rɔda ha, na e ra gwong de ma rɔda ha yɛ arɔng.

⁵⁰Ma tɔk, pyɛ de a nɔng redu e ra yɛ ye tɛ̀ bemat be vɔk neken gbak-gbak. Ano kwong, neha de me ha na sé nemo de Da hom a ha a me na me ha.”