Read berom Yohana 13 Bible Online

Yohana 13 - berom bible

Yohana 13

¹Nusu hwol na be ra Nzem Gyilsit Nelɔ BeIsrayɛl, Yɛsu a tɔk, jeng ya ga vey de a rɔda tik jey yemo, na a kyè vɔk na Da mɛ. A ga dopse tɛ̀ yey na bemat de ba sé bemɛ e jey yemo, ko a to tɛ̀ yey na yɛn vɔk e yɛnɛ mo.

²Nawiri, Yɛsu tanga bemât masâ fwom mɛ bá sè re pyɛ́. Gwɔ̀m cēng a ga kana tɛ̀ bare e yêy Yuda Iskaryot, hwêy Simɔn, na a row Yɛsu.

³Yɛsu a tɔk, Da mɛ a ga tik kayɛ pyɛ e vɔ mɛ. A to tɔk, a vey yi na Dagwi, ko a sé kyè wɔ̀ toyo vɔk na yɛ.

⁴A sogo, a pat gwogbɔng gworugu mɛ, a tik gwɛ, ko a jut kerugu, a rɔgɔs e rawit mɛ.

⁵E bama mo, a vɛ́ nshi, a shusha e shǐ, ko a hwo kus mɛ̀ bol bemât masâ fwom mɛ, ko a yishing vɛ na kerugu de a rɔgɔs e rawit mɛ.

⁶A wul na Simɔn Bitrus. Yɛ Bitrus o a yang ɛ, “À Darwey, hwo, hwó simo na hwo kus bol hom arɛt?”

⁷Yɛsu a toyo a yɛ, a ye, “Pyɛ de ma sé ra, hwà tɔk cap-hâ yɛ a remo wɛt, ko wɔ e nuyel, hwà rɔda tɔk yɛ wɛshɛrɛk.”

⁸Bitrus a yang ɛ, “Kɛ̀ɛ̄ wey! Hwô sang kus bol hom wɛt neshey gbak-gbak!” Yɛsu a toyo a yɛ, a yang ɛ, “Ka sede mê kus bol mō wɛt, a dura, vit a pyɛ de yê man me na hwo.”

⁹Simɔn Bitrus a yang ɛ, “Ano kwong, à Darwey, a sé e bol hom zɔng wɛt de me simo na hwo kus vɛ, ko tik na a sè mwa na vɔ hom tanga rato hom!”

¹⁰Yɛsu a yang ɛ, “Mwat de a ga kus ɛ mwa, a to simo a kus ɛ wɛt sɛ̌ bol mɛ zɔng; a sé haalal mwa. Yin mwa yin a sé haalal — sɛ̌ mwat gwining zɔng.”

¹¹Yaga Yɛsu á kana tɔk mwat de a sé kyè wɔ̀ row ɛ. Pyɛ ma yane de ya tɛ̀, a ye, “Yin mwa yin a sé haalal sɛ̌ mwat gwining zɔng.”

¹²E bama de Yɛsu a yɛnɛ kûs bol mɛn, a to jut gwogbɔng gworugu mɛ, a tɛ̀, ko a wɔ̀ sangal. A rangal hɛn, a ye, “Yin a tɔk cap-hâ pyɛ de ma ra a yin arɛt?

¹³Yin e yishi me, à Mwat Basa na, à Darwey, ko yin a ha yɛt, yaga ma sé ano.

¹⁴Me ma sé Darwey min na Mwat Basa min, ko mwa ano, ma kus a yin bol. Sede remo de me ma ra a yin ano, ê sè naka na yin a kus a bemin ano arɔng.

¹⁵Ma ga dura a yin pyɛ de yin a rɔda masa, yaga na yin arɔng yin a ra a bemin, sede remo de ma ga ra a yin.

¹⁶Tsak o mwin me ha a yin: Vit a sam de a dal darwey mɛ na nerey, ko vit a tom de a dal mwat de a tomo hɛ.

¹⁷A remo de yin a tɔk pyɛ́ yemo, yin a rɔda vɔk yey pyɛng, ka sede yin ê ra yɛ̄.

¹⁸“Ma sé ha há hemo e ra yin mwa wɛt. Ma tɔk yerê bemat de ma ga kasa hɛn. Ko pyɛ de bà jɛk e Bwok-basa Dagwi yê té mwin wɔgɔ, ‘Yɛ mwat de wot a re pyɛ́ e shǐ hining na yɛ a ga tɛ́ ɛ mwât repugu hom!’

¹⁹Ma sé ha a yin pyɛ yemo gyam na ye té. Yi ano, jeng de yê té, yin ê sey tsak o, ma sé womo de me tē ma sé yɛ.

²⁰Tsak o mwin me ha a yin: Kawɛ mwat de a sey mwat de ma tomo, a sé e me de a sey arɔng; ko kawɛ mwat de a sey me a sey Da hom de a tomo me.”

²¹E bama de Yɛsu a yɛnɛ há hemo, yey mɛ ya beseng ding-ding, ko a ha wɛshɛrɛk, a ye, “Tsak o mwin me ha a yin: Gwining e ji min e kyè wɔ̀ row me.”

²²Bemât masâ fwom mɛ ba hwo bɛrɛng bemɛn, a sé a yɛn kpɛɛ, yaga yɛn a tɔk mwat de e ha e ra yɛ wɛt.

²³Gwining e ji mɛn, yɛ de Yɛsu a dal na tɛ̂ yey na yɛ, a sé sangal bagat na Yɛsu.

²⁴Simɔn Bitrus a ye gumat na rato, ko a yang ɛ, “Rangal hɛ mwat de a sé ha e ra yɛ.”

²⁵Yaga ano, mwat o a ye yɛndɛng vɔk na Yɛsu, a rangal hɛ, a ye, “À Darwey, e wà arɛt?”

²⁶Yɛsu a toyo a yɛ, a ye, “E mwat de ma rɔda gyira cɛ̌k kpam-tuk e ji shǐ na me nɔng ɛ, e yɛ à mwat o.” Ko a gyira cɛ̌k kpam-tuk o, a nɔ̂ng Yuda Iskaryot, hwêy Simɔn.

²⁷E ji jeng de Yuda a sey cɛ̌k kpam-tuk o, remo-remo Shetan a yel e yey mɛ. Ko Yɛsu a yâng Yuda mo, “Pyɛ de hwó simo hwo ra, rá yɛ dey-dey!”

²⁸E ji bemat de ba sé sangal e de rê pyɛ́ mo, vit a hwak de a tɔk pyɛ de ya tɛ̀ Yɛsu a ha a yɛ ano.

²⁹Sede remo de Yuda á sè mwât tikîs dyām, behak e ji bemât masâ fwom o ba bare, ê wɔ̀ seres pyɛ́ de yɛn e simo yaga nzem o, kɛ ê wɔ̀ gas a bepɛng pyɛ́ cak ayi.

³⁰Sede Yuda a sey cɛ̌k kpam-tuk o, remo-remo a nusu vɔk e jey. Jeng yane yá sè naturuk.

³¹E bama de Yuda a nusu, Yɛsu a ye, “Jeng ya ga vey de bemat bê di gbɔng nerêy Yɛ de a tɛ́ ɛ mwat, ko yi na yɛ bê di gbɔng nerêy Dagwi arɔng.

³²Ko jeng de bemat ba ga di nerêy Dagwi yi na yɛ, Dagwi pyɛ mɛ a rɔda dura a bemat gbɔng nerêy Yɛ womo de a tɛ́ ɛ mwat, ko ê ra ano remo-remo.

³³À nèy hom, bwang jeng tyɔng zɔng na me tik in. Yin a rɔda jāma me; ko sede remo de ma kana ha a bemât nuyêl BeYuda, ano arɔng ma sé ha a yin: Kwɔn de ma sé kyè vɔk ɛ̀, yin ê tɔk wɔ ɛ̀ wɛt.

³⁴Ma sé nɔng in redu repas, rɛ à ret ngan: Tɛ̀ in yey na bemin. Sede remo de ma ga tɛ̀ yey na yin, e gwong gwomo arɔng, tɛ̀ in yey na bemin.

³⁵Ka sede yin a tɛ̀ yey na bemin, ko bemât mwa bê tɔk, yin a sé bemât masâ fwom hom.”

³⁶Simɔn Bitrus a rangal hɛ, a ye, “À Darwey, hwà sé kyè wɔ e gwa arɛt?” Yɛsu a toyo a yɛ, a yang ɛ, “Kwɔn de ma sé kyè vɔk ɛ̀, hwô tɔk raa me a remo wɛt, ko hwà rɔda ba raa me tuhak.”

³⁷Bitrus a yang ɛ, “À Darwey, yaga sɛ́ de mê tɔk raa hwo a remo wɛt arɛt? Ma rɔda nɔng neken hom yaga nerat mō!”

³⁸Ko Yɛsu a yang ɛ, “Ano ā! Hwô nɔng neken mō yaga me a? Tsak o mwin me ha a hwo: Gyam na rungat wa ba dak segwɔm, hwà ga kana tono na me zang tat!”