Read berom Yohana 14 Bible Online

Yohana 14 - berom bible

Yohana 14

¹Yɛsu a yâng bemât masâ fwom mɛ, “Yin tik pyɛ cak ye bɔrɔk hin wɛt. Tɛ̀ in gap min e ra Dagwi, ko tɛ̀ in gap min e ra me arɔng.

²E lɔ Da hom nekwɔn sangal na sé pyak, ko ma sé kyè wɔ̀ yong a yin kwɔn e hwomo. Ka a sé ano wɛt, ka ma yâng ha a yin.

³Ano kwong, me kyè wɔ na me yong a yin kwɔn; e bama mo, mê toyo, na me jut in na yin a sè tanga me. Kwɔn de ma sé ɛ̀, a sé e hɛ de yin ê sè ɛ̀ arɔng.

⁴Ko yin a tɔk gwong de yin ê raa vɔk e dem de ma sé kyè vɔk ɛ̀.”

⁵Tomas a yang ɛ, “À Darwey, wot a tɔk dem de hwà sé kyè vɔk ɛ̀ wɛt. Yi e rɛ̌ de wot ê tɔk gwong de mwat ê wul e hwomo arɛt?”

⁶Yɛsu a toyo a yɛ, a yang ɛ, “E me de ma sé gwong wɔ e hwomo; a sé yi na me de mwat ê sɛ̀ tsak há e ra Dagwi, na a sey neken ne mwin arɔng. Vit a gwong hwak wɔ na Da hom sɛ̌ yi na me.

⁷Ka sede yin a tɔk mwat de ma sé, ko yin a yâng tɔk mwat de Da hom a sé arɔng. Ko e ngamo nuyel, yin a tɔk ɛ, ko yin a ga di ɛ arɔng.”

⁸Filip a yang ɛ, “À Darwey, dura a wot Da mō mo, ko a ga vey a wot ano.”

⁹Yɛsu a yang ɛ, “Ma ga ros na yin yimo, à Filip, ko vey e remo hwà tɔk me wɛt arɛt? Kawɛ mwat de a ga di me a ga di Da hom arɔng. Yaga sɛ́ kwong de hwà ye, me dura a yin Da hom o arɛt?

¹⁰Hwà sey tsak o wɛt, me ma sé gwining na Da hom, ko Da hom arɔng a sé gwining na me arɛt? Neha de me ha a yin na yi na reto hom pyɛ hom wɛt. Ko a sé e Da hom de a sé nàra e ji nesa na me de a sé ra fwom mɛ.

¹¹Séy in tsak o na há hom wɔgɔ, ma sé gwining na Da hom, ko Da hom arɔng a sé gwining na me. Ka sede yin e sey tsak o na há hom wɛt, ko séy in tsak o, yaga yerê pyɛ́ de ma ra, yēmo de yin a di na bayis min.

¹²Tsak o mwin me ha a yin: Kawɛ mwat de a tɛ̀ gap mɛ e ra me a rɔda ra yerê pyɛ́ de ma ra. Ê ra pyɛ́ de ya dal yemo de ma ra, yaga ma sé kyè vɔk na Da hom.

¹³Kayɛ pyɛ de yin e ra wôn yɛ e ji reza hom, ma rɔda ra a yin yɛ. Yi ano, Hwey hê tɛ̀ bemat be bin di gbɔng nerêy Dagwi.

¹⁴Ka sede yin e ra wôn kayɛ pyɛ e ji reza hom, ko ma rɔda ra yɛ.”

¹⁵“Ka sede yin a tɛ̀ yey na me, yin ê gyeng badu hom.

¹⁶Mê ra won na Da hom, ko yɛ ê tomo a yin na Mwat Sɛlɛ hwak de ê sè na yin gbak-gbak.

¹⁷Mwat Sɛlɛ mo, yɛ à Gabik de he dura tsak há e ra Dagwi wɛshɛrɛk. Bemât jey bê tɔk sey Mwat Sɛlɛ mo e neyey mɛn wɛt, yaga be di ɛ wɛt, ko be to tɔk ɛ wɛt. Ko yin, yin a tɔk ɛ, yaga yɛ ê nàra na yin, ko ê sè e neyey min arɔng.

¹⁸“Ma rɔda tik in na yin a sè sede nehyɛn wɛt. Mê toyo vey na yin.

¹⁹Bwang jeng tyɔng zɔng, bemât jey ba rɔda to be di me wɛt, ko yin, yin a rɔda to di me. Me ma vɔk neken; yaga ano, yin a rɔda vɔk neken arɔng.

²⁰E tuk hane mo, yin a rɔda tɔk, ma sé sangal e ji nesa na Da hom. Yin ê to tɔk, yin a sé sangal e ji nesa na me, ko me arɔng ma sé sangal e ji nesa na yin.

²¹“Kawɛ mwat de a tɔk badu hom, na a gyenges vɛ, e yɛ de a tɛ̀ yey na me. Ko kawɛ mwat de a tɛ̀ yey na me, Da hom arɔng ê tɛ̀ yey na yɛ; me arɔng ma rɔda tɛ̀ yey na yɛ, ko mê dura a yɛ tó hom wɛshɛrɛk.”

²²Yuda hwak — á sè Yuda Iskaryot wɛt — a yâng Yɛsu, “À Darwey, yaga sɛ́ de hwó simo hwo dura tó mo na wot zɔng ko na bemât jey wɛt arɛt?”

²³Yɛsu a toyo a yɛ, a ye, “Ka sede mwat hwak a tɛ̀ yey na me, ko a rɔda gyeng há hom. Da hom a rɔda tɛ̀ yey na yɛ, ko me tanga Da hom wot a rɔda vey na yɛ, ko wot ê sangal tanga yɛ.

²⁴Ko kawɛ mwat de a tɛ̀ yey na me wɛt e gyeng há hom wɛt. Há de yin a wok yi na me ha yi na báre hom wɛt, ko ha yi na Da hom de a tomo me.

²⁵“Ma ga ha a yin pyɛ́ yemo e jeng de ma rɔngɔl na yin.

²⁶Ko Mwat Sɛlɛ, yɛ Gabik Jɛrɛ, de Da hom a sé kyè wɔ tomo na yɛ e ji reza hom, a rɔda basa a yin kayɛ pyɛ, ko ê tɛ̀ in na yin a bare na pyɛ̂ mwa de ma ga kana ha a yin.

²⁷“Me tɛ̀ neyey min ne dyɛng; yêy dyɛngɛ de me nɔng in ha sé yerê hemo de me pyɛ hom ma vɔk. A sé e yerê gwông jey wɛt de me tɛ̀ neyey min ne dyɛng. Yin tik pyɛ cak ye bɔrɔk hin, kɛ yin vɔk bengyip arɔng wɛt.

²⁸Yin a wok ma ye, ma sé kyè wɔ̀ kyè, ko mê toyo vey na yin. Ka sede yin a tɛ̀ yey na me, ka yin a yâng vɔk yey pyɛng, yaga ma sé kyè wɔ na Da hom; yaga Da hom a dal me na nerey.

²⁹Ma ga ha a yin pyɛ́ yemo a remo gyam na ye té, yaga na jeng de yê té, yin a rɔda sey tsak o na há hom.

³⁰Ma rɔda gwɛ̌ ha na yin pyak wɛt; yaga yɛ de a sé re negwɔm e ra jey yemo a vey bagât vey. Yɛ a vɔk reto rehak e ra me wɛt.

³¹Ko ma sé ra pyɛ́, tyɛng sede remo de Da hom a ha a me. Ma sé ra ano, yaga na bemât jey be tɔk, ma tɛ̀ yey na Da hom. “Sogo hin, na wot a hàla kwɔn hemo!”