Read berom Yohana 16 Bible Online

Yohana 16 - berom bible

Yohana 16

¹“Ma ga ha a yin pyɛ́ yemo, yaga na yin kwon ye bugurɛk wɛt.

²Ba rɔda pat in yi e ji nesâ bemât duk rê fongol. Mwin, jeng ye kyè vey de kawɛ mwat de ê mɔrɔ hin ê bare, a sé ra pyɛ de ya jam a Dagwi.

³Bê ra a yin ano, yaga yɛn á kana tɔk Da hom kɛ me wɛt.

⁴Ko ma ga ha a yin pyɛ́ yemo, yaga na jeng de yê té, yin ê bare, ma kana ha a yin e ra yɛ̄ gyam.” “Ma ga ha a yin pyɛ́ yemo yimo yi e jeng de yin a hwo raa me wɛt, yaga ma kana sè tanga yin.

⁵Ko a remo, ma ga vey bagât toyo vɔk na mwat de a tomo me. Ko vit a mwat hwak e ji min de a sé rangal me kwɔn de ma sé kyè vɔk ɛ̀.

⁶A remo, yey min ye lashe hɛ, yaga pyɛ́ de ma ga ha a yin.

⁷Ko ma sé ha a yin tsak o: A dal a yin na me kyè. Yaga, ka sede ma kyè wɛt, ko Mwat Sɛlɛ a rɔda vey na yin wɛt. Ko ka sede ma kyè, mê tomo hɛ vey na yin.

⁸Jeng de ê vey, a rɔda dura a bemât jey wɛshɛrɛk wɔgɔ, báre mɛn ha sé tyɛng wɛt e ra pyɛ de banɛn ba sé, na e ra mwat de a sé cik e bayîs Dagwi, na e ra gwong de Dagwi a rɔda ra shɔt.

⁹Báre mɛn o ha sé tyɛng wɛt e ra pyɛ de banɛn ba sé, yaga yɛn a tɛ̀ gap mɛn e ra me wɛt.

¹⁰Báre mɛn o ha sé tyɛng wɛt e ra womo de a sé cik e bayîs Dagwi, yaga mê toyo vɔk na Da hom, ko yin ê to di me wɛt.

¹¹Ko báre mɛn o ha sé tyɛng arɔng wɛt e ra gwong de Dagwi a rɔda ra shɔt, yaga ba ga kana gang womo de a sé re negwɔm e ra jey yemo na shɔt.

¹²“Ma vɔk bwang pyɛ́ pyak de ma rɔda ha a yin e ngyen, ko yê dal gap min a remo.

¹³Ko jeng de Gabik de he dura tsak há e ra Dagwi hê vey, hê tɛ̀ in na yin a tɔk tsak hâ mwa de he yi na Dagwi. Hê ha há yi na retô hɛ pyɛ hɛ wɛt, ko hê ha há de he wokos yi na Da hom; hê to dura a yin pyɛ́ de ya sé kyè wɔ̀ té.

¹⁴Hê tɛ̀ bemat be di gbɔng nerey hom, yaga hê jut há hom na he ha a yin hɛ.

¹⁵Kayɛ pyɛ de Da hom a vɔk ya sé nyang. Pyɛ ma yemo de ya tɛ̀, ma ye, Gabik o hê jut há hom, ko hê ha a yin hɛ.”

¹⁶“Bwang jeng tyɔng zɔng, yin ê to di me wɛt, ko e bamâ jeng tyɔng, yin ê to di me.”

¹⁷Bemât masâ fwom mɛ behak ba yâng bemɛn, “E sɛ́ de a sé ha arɛt? A ye, bwang jeng tyɔng zɔng, wot ê to di ɛ wɛt, ko e bamâ jeng tyɔng, wot ê to di ɛ. Ko a to ye, pyɛ́ yemo mo yê té, yaga a sé kyè wɔ na Da mɛ.

¹⁸E sɛ́ de a ha jeng de a ha neha nemo wɔgɔ, ‘jeng tyɔng’ arɛt? Wot a tɔk há de a sé ha wɛt.”

¹⁹Yɛsu a tɔk, yɛn e simo be rangal hɛ. Yaga ano, a yang ɛn, “Há hom hemo de ma ye, ‘bwang jeng tyɔng zɔng, yin ê to di me wɛt, ko e bamâ jeng tyɔng, yin ê to di me’, a sé e há ma hemo de yin a sé rangsâl bemin arɛt?

²⁰Tsak o mwin me ha a yin: Yin a rɔda tosho, yin ê ra sesin arɔng, ko e jeng yane bemât jey bê vɔk yey pyɛng. Neyey min na rɔda lashe hɛn, ko lashê yey min o ha rɔda tɛ́ ɛ yey pyɛng.

²¹Bàre hin na jeng de hwā a sé rus e jeng tɔ: E sɔ reyɔm, yaga jeng tɔ mɛ ya ga vey. Ko e bama de a ga tɔ hwey o, e ye bam na reyɔm de a ga kana sɔ; e vɔk yey pyɛng, yaga a ga sɛ̀ mwat pwas.

²²A sé ano arɔng na yin: Neyey min ne lashe hɛn a remo, ko ma rɔda to ba di in. E jeng yane, neyey min na rɔda pɛngɛ, ko vit a mwat de ê tɔk sey ɛ̀ yey pyɛng min o yi na yin.

²³“E tuk o, yin ê ba rangal me pyɛ cak wɛt. Tsak o mwin me ha a yin: Kayɛ pyɛ de yin ê ra won na Da hom e ji reza hom, a rɔda nɔng in yɛ.

²⁴Vey e remo, yin a rɔngɔl nà ra wôn pyɛ cak e ji reza hom. Rá in wôn pyɛ́, ko bê nɔng in, yaga na yey pyɛng min ye sila hɛ.”

²⁵“Vey e remo, ma ga ha a yin e ra pyɛ́ yemo na gwɔrɔ-há, ko jeng ye kyè vey de mê to ha a yin na gwɔrɔ-há wɛt. Ma rɔda ha na yin wɛshɛrɛk e ra Da hom.

²⁶E jeng o, e yin vɛ de yin a rɔda ra wôn pyɛ́ e ji reza hom. Me ye, e me wɛ de mê ra won o e to min wɛt,

²⁷yaga Da hom pyɛ mɛ a tɛ̀ yey na yin. A tɛ̀ yey na yin, yaga yin a tɛ̀ yey na me, ko yin a sey tsak o arɔng, ma vey yi na yɛ.

²⁸Ma vey yi na Da hom vey e jey yemo; ko a remo, ma ga vey bagât tik jey o, na me toyo vɔk na yɛ.”

²⁹Bemât masâ fwom mɛ ba yang ɛ, “Di, pyɛ de hwà sé ha a remo ya sé a wot tɛɛrɛ, hwà to sé ha na gwɔrɔ-há wɛt.

³⁰A remo, wot a tɔk, hwà tɔk kayɛ pyɛ. A sé a hwo gbing-gbing wɛt na hwo rangâl bemat pyɛ de ba sé bare, ka sede hwó simo na hwo tɔk nerangsal de yɛn a vɔk. Pyɛ ma yemo de ya tɛ̀, wot a sey tsak o, hwà vey yi na Dagwi.”

³¹Yɛsu a yang ɛn, “A sé a remo wɛ de yin a sé sey tsak o arɛt?

³²Ko jeng ye kyè vey, mwin ya ga vey, de ba rɔda shara hin. Kawɛ e ji min ê kyè vɔk e lɔ mɛ, ko yin ê tik me nju hom. Ko mwa ano, ma sé nju hom wɛt, Da hom a sé tanga me.

³³Ma ga ha a yin pyɛ́ yemo, yaga na yey min ye dyɛng, yaga yin a sé sangal e ji nesa na me. E jey yemo yin a rɔda di reyɔm. Ko vɔk in yey ting, ma ga re como e ra jey!”