Read berom Yohana 17 Bible Online

Yohana 17 - berom bible

Yohana 17

¹E bama de Yɛsu a yɛnɛ neha nemo, a tɛ̀ bayis mɛ vɔk e lagwi, a ye, “À Da, jeng ya ga vey. Dura a bemat gbɔng nerêy Hwey mō, yaga na Hwey mō mo he bin dura a yɛn gbɔng nerey mō.

²Yaga hwà ga nɔ̂ng hɛ reto e ra bemât mwa, yaga na he bin nɔ̂ng mwa bemat de hwà tɛ̀ vɛ e vɔ hɛ neken gbak-gbak.

³Ko neken gbak-gbak o na sé ngan: Bemat o bē tɔk o, hwo nju mō zɔng de hwà sé tsak Dagwi, na be to tɔk Yɛsu Kristi de hwà tomo hɛ vey e jey.

⁴Ma ga dura a bemat gbɔng nerey mō e jey yemo; ma ga yɛnɛ fwom de hwà nɔng me na me ra.

⁵A remo, à Da, nɔng me gbɔng nerey e nuyel mō, yerê gbɔng nerey de ma kana vɔk tanga hwo gyam na be yong jey.”

⁶“Ma ga dura hwo wɛshɛrɛk na bemat de hwà kasa e jey yemo na hwo nɔng me hɛn. Bá sè bemo, ko hwà nɔng me vɛ. Bá gyenges reha mō,

⁷ko a remo, ba tɔk, kayɛ pyɛ de hwà nɔng me ya yi na hwo.

⁸Ma ga ha a yɛn reha de hwà ha a me, ko ba ga sey rɛ. Ba tɔk, a sé mwin, ma vey yi na hwo, ko ba to sey tsak o, a sé e hwo de hwà tomo me.

⁹“Ma sé ra won yaga yɛn. A sé yaga bemât jey de ma sé ra won wɛt, ko a sé yaga vemo de hwà nɔng me vɛ, yaga yɛn a sé bemo.

¹⁰Mwa vemo de ba sé benang ba to sé bemo, ko mwa vemo de ba sé bemo ba to sé benang arɔng. A sé yi na yɛn de be di gbɔng nerey hom.

¹¹Ma ga vey bagât toyo vey na hwo. Mê sè e ji jey yemo wɛt, ko yɛn ê rɔngɔl e ji jey o. À Da, hwo de hwà sé jɛrɛ, gyepes hɛn na retô reza mō, reza de hwà kana nɔng me. Gyebes hɛn, yaga na yɛn a tɛ́ ɛn vining, sede remo de wot a sé vining arɔng.

¹²E jeng de ma rɔngɔl na yɛn, ma gyepes hɛn, ko ma gyenges hɛn na retô reza mō de hwà kana nɔng me. Vit a hwak e ji mɛn de a ga wey, sɛ̌ yɛ de a sé gbing-gbing na a wey, yaga na pyɛ de bà jɛk e Bwok-basa Dagwi ye sila.

¹³A remo, ma ga vey bagât toyo vey na hwo. Ko ma sé ha pyɛ́ yemo jeng de ma rɔngɔl e ngamo e jey, yaga na yɛn a bin vɔk yey pyɛng ding-ding e gwong de me ma vɔk yey pyɛng ding-ding.

¹⁴Ma ga ha a yɛn há mō. Yaga ano, bemât jey ba kyɛ́ ɛn hɛn, yaga yɛn a sé vê jey o wɛt, tyɛng sede remo de me arɔng ma sé wo jey o wɛt.

¹⁵Ma sé ra won wɛt na hwo pat ɛn yi e jey yemo; ko ma sé ra won na hwo bin gyepes hɛn, yaga na Shetan, wo neves, a kwon ra ɛn wɛt.

¹⁶Yɛn a sé vê jey yemo wɛt, tyɛng sede remo de me arɔng ma sé wo jey yemo wɛt.

¹⁷Tik ɛn jaram, na yɛn a sè bemo na tsak o. Há mō ha sé tsak o.

¹⁸Tyɛng sede remo de hwà tomo me e jey, ano arɔng ma tomo hɛn e jey o.

¹⁹A sé yaga na me sɛlɛ hɛn de ma sé tik tó hom jaram. Ma sé ra ano, yaga na yɛn arɔng yɛn a tik bato mɛn jaram mwin, na be sè bemo.”

²⁰“A sé yaga yɛn zɔng de ma sé ra won wɛt, ko a sé yaga vemo de ba rɔda wok reha hom yi na yɛn arɔng, ko yi ano, yɛn ê tɛ̀ gap mɛn e ra me.

²¹Ma sé ra won, yaga na yɛn mwa yɛn a bin sè vining. Tyɛng sede remo de hwo, à Da, hwà sé gwining na me, ko me ma sé gwining na hwo, ano arɔng, tik na yɛn a sangal e ji nesa na wot. Yi ano, bemât jey ba rɔda sey tsak o, a sé e hwo de hwà tomo me.

²²Gbɔng nerey de hwà kana nɔng me, e nɛ de ma nɔng ɛn arɔng, yaga na yɛn a bin sè vining, tyɛng sede remo de hwo tanga me wot a sé vining.

²³Cap-hâ vining a yet ngan: Me ma sé sangal e ji nesa na yɛn, ko hwo hwà sé sangal e ji nesa na me. Tik na be tɛ́ ɛn vining mwa, yaga na bemât jey be tɔk, a sé e hwo de hwà tomo me, ko hwà tɛ̀ yey na bemât raa hom, tyɛng sede remo de hwà tɛ̀ yey na me.

²⁴“À Da, me simo na yɛn vemo de hwà nɔng me be bin sè tanga me e kwɔn de ma sé ɛ̀, na yɛn a di gbɔng nerey hom. Hwà kana nɔng me gbɔng nerey, yaga hwà tɛ̀ yey na me yimo gyam na be yong jey.

²⁵À Da, hwo de hwó gas badu e tē, mwa ano de bemât jey ba tɔk o wɛt, ko me ma tɔk o. Ko bemât raa hom vemo ba tɔk, a sé e hwo de hwà tomo me.

²⁶Ma ga dura a yɛn wɛshɛrɛk mwat de hwà sé, ko mê re nuyel na ra ano. Yi ano, yɛn ê kyɛm na yɛn a tɛ̀ yey na behak e gwong de hwo hwà tɛ̀ yey na me, ko me, mê sangal e ji nesa na yɛn.”