Read berom Yohana 18 Bible Online

Yohana 18 - berom bible

Yohana 18

¹E bama de Yɛsu a yɛnɛ won o, yɛ tanga bemât masâ fwom mɛ ba hàla kwɔn o, ko ba ye dɔ a Kerɔt Kidrɔn. E gura gworo mo, bwi hwak gwa sɛ̀, ko BeYɛsu mo ba wɔ̀ yel e ji gwɛ.

²Yuda, de a sé kyè wɔ̀ row Yɛsu, á kana tɔk kwɔn o, yaga Yɛsu tanga bemât masâ fwom mɛ ba dop manas e hwomo.

³Ano kwong, Yuda a jut regyɛng bemât como, tanga bemât gyeng Gbɔng Duk Re Fongol behak de begbɔng bepiris tanga BeFarisi ba tomo hɛn; ko mwa hɛn ba kyè vɔk e bwi mo. Ba vɔk ɛ̀ bekywa-kya, na nekya semwol, tanga pyɛ̂ como.

⁴Yɛsu á kana tɔk kayɛ pyɛ de ya sé kyè wɔ té na yɛ. Yaga ano, a vey e nuyel, a sɛ̀ ɛn, ko a yang ɛn, “Yin e jāma wà arɛt?”

⁵Ba toyo a yɛ, ba ye, “Yɛsu wo Nazarɛt.” A yang ɛn, “A sé e me wɛ.” Yuda de a row ɛ a sé tumal e hwomo tanga yɛn.

⁶Jeng de Yɛsu a yang ɛn, “A sé e me wɛ”, yɛn a gwɛ̌ sek na bama, yɛn a gaba e vwel.

⁷A to gwɛ̌ rangal hɛn gbak, a ye, “Yin e jāma wà arɛt?” Yɛn a yang ɛ, “Yɛsu wo Nazarɛt.”

⁸Yɛsu a yang ɛn, “Ma ga ha a yin, a sé e me wɛ. Ka sede a sé e me de yin e jāma, ko tík in bemat vemo be kyè.”

⁹A ha ano, yaga na há de á kana ha he sila wɔgɔ, “À Da, e ji bemat de hwà nɔng me, vit a mwat gwining de ma ga vuru hɛ.”

¹⁰Ko Simɔn Bitrus de a vɔk wal a hwɔltɔ wɛ, ko a tara sam darwêy bepiris, a tùt a yɛ fwông vwɔ yege. Ba tâng sam o, à Malkus.

¹¹Yɛsu a yâng Bitrus, “Gyira wal mō e ji fwal wɛ! A sé a hwo, mê sɔ shî reyɔm de Da hom a nɔng me na me sɔ wɛt arɛt?”

¹²Gwɔ̀m bemât como tanga bemat mɛ, mwa na bemât gyeng Gbɔng Duk Re Fongol ba vo Yɛsu, ko ba rɔgɔs hɛ.

¹³Ba tānga wɔ na yɛ na Hanas e ngyen. Hanas o á sè tya Kayafas, de á sè darwêy bepiris e shey o.

¹⁴Á sè e Kayafas o de á kana nɔ̂ng bemât nuyêl BeYuda redu wɔgɔ, a dal naka na mwat gwining a ku e tô mwa bemat.

¹⁵Simɔn Bitrus tanga mwât masâ fwôm Yɛsu mo hwak ba raa Yɛsu. Mwat wane mo á sè mwat de darwêy bepiris á kana tɔk ɛ. Yaga ano, ba tik ɛ na a raa Yɛsu wɔ e lalâ lɔ darwêy bepiris.

¹⁶Ko Bitrus a tumal e ruhûp lɔ mo e majey. Mwat de darwêy bepiris á kana tɔk ɛ a to ɛ, a wɔ̀ hanat na hwong de a gyenges ruhup o, ko a yel na Bitrus.

¹⁷Hwong o a yâng Bitrus, “Hwo arɔng hwà sé gwining e ji bemât masâ fwôm mwat o wɛt arɛt?” Bitrus a yang ɛ, “Wey, ma sé wɛt.”

¹⁸Gul gwa sɛ́; yaga ano, bemât fwôm lɔ mo tanga bemât gyeng Gbɔng Duk Re Fongol ba pɛl kya na hwalang, ba sé tumal e hwomo, ba sé wok kya. Ko Bitrus a wɔ̀ tumal e de wôk kya mo arɔng.

¹⁹Darwey bepiris a rangsâl Yɛsu neha e ra bemât masâ fwom mɛ tanga e ra basa mɛ.

²⁰Yɛsu a yang ɛ, “Ma ga ha a jey neha wɛshɛrɛk. Kayɛ jeng ma ga basa e beduk re fongol tanga e Gbɔng Duk Re Fongol, e nekwɔn de BeYuda mwa be tula hɛn ɛ̀, ko vit a há de ma ha e lɛrɛ.

²¹Yaga sɛ́ de hwà sé rangsal me arɛt? Rangâl bemat de ba wok neha hom, na be ha a hwo. Yɛn a tɔk pyɛ de ma ga ha a yɛn.”

²²Jeng de Yɛsu a ha há hane, gwining e ji bemât gyeng Gbɔng Duk Re Fongol de a sé tumal e hwomo a fala hɛ, a yang ɛ, “Gwong a gwane de hwô ha na darwêy bepiris arɛt?”

²³Yɛsu a yang ɛ, “Ka sede ma ha há ves, dura a bemat nevês hɛ.”

²⁴Ko Hanas a tomo na yɛ e rɔgɔs vɔk na Kayafas, yɛ darwêy bepiris.

²⁵Simɔn Bitrus a rɔngɔl e tumal e de wôk kya. Bemat o behak ba yang ɛ, “Hwà sé gwining e ji bemât masâ fwôm mwat o wɛt arɛt?” Bitrus a tono, a ye, “Wey, ma sé wɛt.”

²⁶Gwining e ji besam darwêy bepiris de a sé câng mwat de Bitrus á kana tùt a yɛ fwong a yang ɛ, “A sé e hwo de ma kana di o e ji bwi tanga yɛ wɛt arɛt?”

²⁷Bitrus a to tono, ko e ji jeng o, rungat wa dak segwɔm.

²⁸Bop nagasi, ba sogo yi e lɔ Kayafas, ba kyè na Yɛsu vɔk e gbɔng lɔ gwɔmna de á sè WoRoma. BeYuda pyɛ mɛn yɛn a yel e lɔ mo wɛt, yaga yɛn a simo be tik bato mɛn jɛrɛ, yaga na yɛn a bin re pyɛ̂ Nzem Gyilsit Nelɔ BeIsrayɛl.

²⁹Yaga ano, Pilatus a nusu wɔ na yɛn, a rangal hɛn, “Yin a tɛ̀ kûn mwat womo e ra sɛ́ arɛt?”

³⁰Yɛn a toyo a yɛ, yɛn a ye, “Ka mwat womo a sé mwat vwes wɛt, ka wot a yâng nára hɛ e vɔ mō wɛt.”

³¹Pilatus a yang ɛn, “Kyè in na yɛ pyɛ min, na yin a ra a yɛ shɔt e gwông badu min.” Ko BeYuda mo yɛn a yang ɛ, “Wot a vɔk reto na wot a yɛrɛ a mwat shɔt reku wɛt.”

³²Ko di, pyɛ yemo ya té ano, yaga na Yɛsu a bin ku e gwong de á kana ha, ê ku.

³³Pilatus a to yel e ji lɔ mo, a yila Yɛsu, a rangal hɛ, “Hwo wɛ hwà sé Gbɔng Gwɔ̀m BeYuda arɛt?”

³⁴Yɛsu a toyo a yɛ, a ye, “Rángal hemo ha vey yi na báre mō, kɛ ha sé há de ba ha a hwo e ra me arɛt?”

³⁵Pilatus a yang ɛ, “A sé a hwo, ma sé WoYuda arɛt? A sé e bemat mō vɛ tanga begbɔng bepiris de ba nára hwo e vɔ hom. Hā a me, e sɛ́ de hwà ra arɛt?”

³⁶Yɛsu a ye, “Segwɔm hom sa sé sê jey yemo wɛt. Ka segwɔm hom sa sé sê jey yemo, ka bemât raa hom ba yâng ra yol, yaga na be dul BeYuda nà vo me. Wey, segwɔm hom sa sé sê jey yemo wɛt.”

³⁷Pilatus a yang ɛ, “Ano ā! Hwà sé ha wɔgɔ, hwà sé gbɔng gwɔ̀m a?” Yɛsu a toyo a yɛ, a ye, “Hwà ha yɛt wɔgɔ, ma sé gbɔng gwɔ̀m. Pyɛ de ya tɛ̀, ma vey e jey à yemo, ya sé yaga na me ha a bemat e ra tsak há. Pyɛ ma yemo de ya tɛ̀, ba tɔ me e ji jey yemo. Kawɛ mwat de e simo tsak há e wet betong na neha hom.”

³⁸Pilatus a rangal hɛ, a ye, “E sɛ́ de be tâng yɛ, à tsak há arɛt?” E bamâ há hane, Pilatus a to nusu wɔ e majey vɔk na BeYuda, a yang ɛn, “Me ma sɛ̀ mwat womo na pyɛ cak de mê gang ɛ mɛ̀ wɛt.

³⁹Ko e ra negwɔn min me dopse viri a yin mwât ngyang gwining e jeng kanɛ Nzem Gyilsit Nelɔ BeIsrayɛl. Yin e simo me viri a yin Gbɔng Gwɔ̀m BeYuda arɛt?”

⁴⁰Yɛn a shusha gwolwɛlɛ, ba tē, “Wey, wot e simo hɛ wɛt! Wot e simo Barabas!” Yɛ Barabas o á kana sè gbik.