Read berom Yohana 19 Bible Online

Yohana 19 - berom bible

Yohana 19

¹E bama mo, Pilatus a jut Yɛsu, a tɛ̀ be dak ɛ na zining.

²Bemât como ba tsipta kpîn negwɔm na serɔgɔ, ko yɛn a tɛ̀ a yɛ wɛ e rato. Yɛn a to tɛ̀ a yɛ gwogbɔng gworugu yerê gwo begbɔng begwɔ̀m de gwa sé zwey.

³Yɛn a sǎ e de kyese na yɛ, ba tang ɛ, “Nekên Gbɔng Gwɔ̀m BeYuda ne ros!” Ko yɛn a dak ɛ na vɔ mɛn.

⁴Pilatus a to nusu e majey wɔ na BeYuda, a yang ɛn, “Di, ma sé kyè wɔ̀ nusu na mwat womo mo, yaga na yin a tɔk, ma sɛ̀ ɛ na pyɛ cak de mê gang ɛ mɛ̀ wɛt.”

⁵Jeng de Yɛsu a nusu, a rɔngɔl na kpîn negwɔm serɔgɔ e rato mɛ, ko a rɔɔ tɛ̀ gwogbɔng gworugu de gwa sé zwey o arɔng. Ko Pilatus a yang ɛn, “Di in, mwat a womo!”

⁶Sede begbɔng bepiris tanga bemât gyeng Gbɔng Duk Re Fongol ba di ɛ, ba shusha gwolwɛlɛ, ba tē, “Bē kak ɛ e ra cɔ́gɔt! Bē kak ɛ e ra cɔ́gɔt!” Ko Pilatus a yang ɛn, “Kyè in na yɛ, yin pyɛ min, na yin a wɔ̀ kak ɛ e ra cɔ́gɔt. Me ma sɛ̀ ɛ na pyɛ cak de mê gang ɛ mɛ̀ wɛt.”

⁷BeYuda mo ba yang ɛ, “Wot a vɔk redu, ko e ra redu mo, a sé gbing-gbing na a ku, yaga yɛ a jut tó mɛ, a sé Hwey Dagwi.”

⁸Jeng de Pilatus a wok há hemo, bengyip ba gwɛ̌ vo ɛ.

⁹Ko a to yel e ji lɔ, a yâng Yɛsu, “Hwà sé yi e gwa arɛt?” Ko Yɛsu a toyo a yɛ na pyɛ cak wɛt.

¹⁰Yaga ano, Pilatus a yang ɛ, “Hwó simo na hwo ha na me wɛt arɛt? Hwà tɔk, ma vɔk reto na me viri hwo, kɛ na me tɛ̀ be kak o e ra cɔ́gɔt wɛt arɛt?”

¹¹Yɛsu a toyo a yɛ, a yang ɛ, “A sé e Dagwi de a nɔng o reto rane mo. Ka a yâng sé ano wɛt, ka hwô yâng vɔk reto rehak e ra me wɛt. Yaga ano, renɛ̂n mwat de a nára me e vɔ mō ra dal remo.”

¹²Jeng de Pilatus a wok ano, a jāma gwong na a viri Yɛsu; ko BeYuda ba re nuyel na shushâ gwolwɛlɛ, ba tē, “Ka sede hwô viri mwat womo à, ko hwà dura, hwà sé sâ Da vwel BeRoma wɛt. Yaga kawɛ mwat de a jut tó mɛ sede gbɔng gwɔ̀m a sé ra retek na Da vwel BeRoma.”

¹³Jeng de Pilatus a wok há hane, a nusu na Yɛsu e majey, a sangal e gwofwa mwât shɔt e kwɔn de ba tâng hɛ, à Kwɔn De Ba Lolom Hɛ. E ji relêm BeYuda ba tâng hɛ, à Gabata.

¹⁴Tuk hane mo há sè tûk yong pyɛ́ e jeng Nzem Gyilsit Nelɔ BeIsrayɛl. Jeng o yá sè sede tê-gwi. Ko Pilatus a yâng BeYuda mo, “Di in, Gbɔng Gwɔ̀m min a womo!”

¹⁵Ko yɛn a shusha gwolwɛlɛ, ba tē, “Kyè na yɛ! Wey na yɛ! Kak ɛ e ra cɔ́gɔt!” Pilatus a rangal hɛn, “Yin e simo na me kak gbɔng gwɔ̀m min e ra cɔ́gɔt arɛt?” Ko begbɔng bepiris ba toyo a yɛ, ba ye, “Wot a vɔk gbɔng gwɔ̀m gwining zɔng, yɛ à Da vwel BeRoma.”

¹⁶Ano kwong, Pilatus a nára Yɛsu e vɔ mɛn, yaga na be kak ɛ. Bemât como ba jut Yɛsu, ba kyè.

¹⁷Yɛ pyɛ mɛ a wut cɔ́gɔt-kak mɛ, a nusu yi e repomo vɔk e kwɔn de ba tâng hɛ, à Kwɔ̂n Gwokup Ratô Mwat. E ji relêm BeYuda ba tâng hɛ, à Gɔlgɔta.

¹⁸Kwɔn a hane de ba kak ɛ e ra cɔ́gɔt. Yɛn a to kak bemat behak beba, gwining e kahɛ hagat mɛ. Yɛsu a sé e tē mɛn.

¹⁹Pilatus a jɛk pyɛ de ya tɛ̀ ba kak ɛ, ko ba tɛ̀ e ra cɔ́gɔt o. Pyɛ de a jɛk a yet ngan: YƐSU WO NAZARƐT, GBƆNG GWƆM BEYUDA.

²⁰Ba jɛk pyɛ mo e ji balem batat, vɛ à relêm BeYuda, na rê BeRoma, na rê BeGirik. Bemat pyak ba basa jɛk o, yaga kwɔn de ba kak ɛ̀ Yɛsu ha sé bagat na repomo.

²¹Ko begbɔng bepiris vê BeYuda ba yâng Pilatus, “Hwo jɛk ‘Gbɔng Gwɔ̀m BeYuda’ wɛt; jɛk ngan: ‘Mwat womo a ye, a sé Gbɔng Gwɔ̀m BeYuda.’ ”

²²Ko Pilatus a ye, “Pyɛ de ma ga jɛk, e yɛ à yane.”

²³E bama de bemât como ba kak Yɛsu e ra cɔ́gɔt, yɛn a jut berugu mɛ, ba gas vɛ nelɔ nenaas, kawɛ mwat na lɔ mo mɛ. Yɛn a to jut rugu mɛ gwo ji mo de ba tolo gwɛ wɛt, ba lɔk gwɛ sana man gwɛ e dem hak.

²⁴Yɛn a ye, “Wot hama gwɛ wɛt. Tik na wot a ra cáca e ra gwɛ, na wot a tɔk mwat de ê re gwɛ.” Hemo ha té, yaga na pyɛ de bà jɛk e Bwok-basa Dagwi ye sila wɔgɔ, “Yɛn a gas berugu hom e bato mɛn. Yɛn a ra cáca e ra rugu hom gwo ji mo, na be tɔk mwat de ê re gwɛ.” Ko pyɛ ma yane de bemât como mo ba ra.

²⁵Bemat de ba tumal bagat na cɔ́gɔt de ba kak ɛ̀ Yɛsu, yɛn vɛ à neng mɛ, na gwa neng mɛ hwā mo, na Marya hwâ Kilopas, tanga Marya wo Magdala.

²⁶Jeng de Yɛsu a di neng mɛ tanga mwât masâ fwom mɛ de a tɛ̀ yey na yɛ ba sé tumal bagat, a yâng neng mɛ, “À neng-gwɔ, hwey mō a hemo.”

²⁷Ko a yâng mwât masâ fwom mɛ mo, “Neng-gwɔ mō a womo.” Yi e jeng o, mwât masâ fwom mɛ mo a pere jut ɛ na a sangal na yɛ.

²⁸E bamâ pyɛ́ yane, Yɛsu a tɔk, fwom mɛ mwa gwa ga yɛnɛ hɛ. Ko a ye, “Yey hom ye hwɔshɔ.” A ha ano, yaga na pyɛ de bà jɛk e Bwok-basa Dagwi ye sila.

²⁹Nshî jwaatat na sé e rwey e hwomo. Ko yɛn a jut sòso, ba sing wɛ e ji nshi mo, ko yɛn a tɛ̀ wɛ e ra mapâk hísɔ̀p, ba nára wɛ e nu mɛ.

³⁰Yɛsu a suyu nshi mo, a ye, “Gwa ga yɛnɛ hɛ.” Ko a ye det a rato mɛ, a hàla neken mɛ.

³¹Tuk hane há sè tûk yông pyɛ́ gyam yaga Tuk Shábat. E rà negwɔn BeYuda, a jam na bavîn bemat be sè e ra tɛ̂t cɔ́gɔt-kak e Tuk Shábat wɛt. Tuk Shábat o há sè gbɔng tuk. Yaga ano, bemât nuyêl BeYuda ba ra won na Pilatus na a simo be kwɔrɔs bol bemat o, yaga na be gyirik vɛ̄ yi e ra cɔ́gɔt-kak o.

³²Ano kwong, bemât como ba vey kwɔrɔs bol mwat o wo mɛsɛng tanga ve vane arɔng de ba kak ɛn tanga Yɛsu.

³³Ko jeng de yɛn a wul na Yɛsu, yɛn a di, a ga kana ku. Yaga ano, yɛn a kwɔrɔ bol mɛ wɛt.

³⁴Gwining e ji bemât como mo a jut bāra mɛ, ko a luga mɛ̀ Yɛsu e kuhagat. Ko e ji jeng o, nemi tanga nshi na nusu yi e rebek mɛ.

³⁵Mwat wane de a di pyɛ́ yane mo a nɔng nuha e ra yɛ̄, ko nuha mɛ mo ha sé tsak o. Yɛ a tɔk, a sé ha tsak o, ko a sé ha a yin pyɛ́ yemo, yaga na yin arɔng yin a sey tsak o.

³⁶Pyɛ́ yemo ya té ano, yaga na há de bà jɛk e Bwok-basa Dagwi wɔgɔ, “Bê kwɔrɔ kup mɛ hwak wɛt”, he sila.

³⁷E kwɔn o hak e Bwok-basa mo, bà to jɛk: “Bemat ba rɔda bɛrɛng mwat de ba luga hɛ.”

³⁸E bama mo, Yɔsɛf wo Arimatiya de á sè mwât raà Yɛsu e lɛrɛ, yaga a wokos bengyip bemât nuyêl BeYuda, a wɔ̀ ra won na Pilatus, na a simo a yɛ a jut revîn Yɛsu, na a wɔ̀ lɛrɛ. Pilatus a simo a yɛ, ko a wɔ̀ jut rɛ, a kyè na rɛ.

³⁹Nikodemus arɔng, yɛ de á kana wɔ́ na Yɛsu nabwalak, a raa Yɔsɛf. A vey na behal mir tanga alowe de ba wuna vɛ. Nedirîk behal o na sé sede kilo kuru batat (30).

⁴⁰Yɛn beba ba jut berugu bepɛng berat o, ko ba hanas revîn Yɛsu na vɛ, ba tɛ̀sɛ behal nesang nerat o mo tyɛng na negwɔn lɛsɛ̂ bemat ne BeYuda.

⁴¹E kwɔn de ba kak ɛ̀ Yɛsu mo, bwi hwak gwa sɛ̀. Ko e ji bwi mo, sak pas bá sɛ̀ de ba ga sang lɛrɛ ɛ̀ mwat wɛt.

⁴²Sede remo de tuk o há sè tûk yông pyɛ́ gyam yaga Tuk Shábat, ko yaga sak o bá sè bagat na kwɔn o, yɛn a lɛrɛ Yɛsu e ji mo.