Read berom Yohana 2 Bible Online

Yohana 2 - berom bible

Yohana 2

¹E bama nepɔlɔ neba, ba dop weneng e Kana wo Galili. Nêng Yɛsu a wɔ́ e hwomo,

²ko ba to rini Yɛsu na bemât masâ fwom mɛ arɔng.

³Jeng de ba sé e hwomo, nshî anap de ba sé sɔ na tala hɛn. Ko nêng Yɛsu a hwo yâng Yɛsu, “Nshî anap na ga tala hɛn.”

⁴A toyo a yɛ, a yang ɛ, “À neng-gwɔ, e fwom hom a gwane arɛt? Jeng de ma rɔda dura tó hom ya rɔngɔl e ngyen.”

⁵Neng mɛ a yâng bemat de ba sé ra fwom e lɔ mo, “Rá in kayɛ pyɛ de a yang in yin a ra.”

⁶Ko di, e kwɔn hane mo, ba vɔk bègbɔng kɛngɛ betyiimin ve beta de ba tik vɛ e hwomo, yaga na be raa mɛ̀ negwɔn kûs pyɛ́ nemo de badu BeYuda ba simo. Kwɛngɛ gwining gwo tɔk re nshi sede betsung betyiimin.

⁷Yɛsu a hwo yâng bemât fwom o, “Sila hin kɛngɛ mo na nshi.” Ko ba sila vɛ byɛf.

⁸Jeng de ba sila kɛngɛ mo, a yang ɛn, “Vɛ́ in nshi mo, na yin wɔ̀ nɔ̂ng dâ nzem o.” Ba ra sede remo de a ha a yɛn.

⁹Bemât fwom o ba tɔk kwɔn de ba vo nshi mo, ko yɛ dâ nzem o a tɔk wɛt. Jeng de a wɔt nshi mo de na ga tɛ́ ɛn nshî anap, a hwo yila rwâs gwel,

¹⁰a yang ɛ, “Mwa bemat be tānga nɔng nshî anap de na ta, ko jeng de bemat ba ga sɔ, nà ga vey a yɛn, be de vey na nane de na mâk ta wɛt. Ko hwo hwà ra ano wɛt; hwà tik nshi de na ta vey e remo.”

¹¹Pyɛ bes yemo de Yɛsu a ra e Kana wo Galili ya sé ye mɛsɛng de a ra. Yi na yɛ, a dura a bemat gbɔng nerey mɛ, ko bemât masâ fwom mɛ ba tɛ̀ gap mɛn e ra yɛ.

¹²E bama mo, Yɛsu, na neng mɛ, na begwa mɛ, tanga bemât masâ fwom mɛ ba sogo, ba kyè vɔk e Kafarnahum, ko ba sangal nepɔlɔ tyɔng e hwomo.

¹³Jeng ya vey lɛs de BeYuda ba wɔ̀ ra Nzem Gyilsit Nelɔ BeIsrayɛl. Yaga ano, Yɛsu a kyè vɔk e Yɛrusalɛm yaga nɛ.

¹⁴Jeng de a yel e lalâ Gbɔng Duk Re Fongol, a hwo di bemat de be rɛsɛl berɔndɔng, na tyīmit, tanga bebɔp; a di bemât segsâ dyām arɔng de ba sé sangal e betebut fwom mɛn.

¹⁵A jut rik, a vɛ́ mɛ̀ zining, ko a ro mɛ̀ bemat o mwa yi e yɛnɛ̂ duk re fongol o, mwa na tyīmit tanga berɔndɔng; a gangas betebut bemât segsâ dyām arɔng, ko a waram a yɛn dyām mɛn e vwel gwɛshɛk.

¹⁶A nɔ̂ng bemat de ba rɛsɛl bebɔp nu, a ye, “Nusu hin na pyɛ́ yemo! Yin jut lɔ Da hom sede bajang wɛt!”

¹⁷Jeng de bemât masâ fwom mɛ ba di ano, ba hwo bare na há de bà jɛk e Bwok-basa Dagwi wɔgɔ, “À Dagwi, ma tɛ̀ yey na lɔ mō ding-ding; tɛ̂ yey o ha sé sede kya de ha rɔda re me.”

¹⁸Ko bemât nuyêl BeYuda ba hwo yang ɛ, “E yɛ̌ pyɛ bes de hwô ra na hwo dura a wot, hwà vɔk reto na hwo ra ano arɛt?”

¹⁹Ko Yɛsu a yang ɛn, “Gangas hin Gbɔng Duk Re Fongol womo, ko mê to lɔk wɛ e ji nepɔlɔ netat.”

²⁰Bemât nuyel o ba yang ɛ, “Káa! Ba jut neshey kuru banaas na nɛ netyiimin (46) e de lɔ̂k duk womo. Ko hwo, hwô to lɔk wɛ e ji nepɔlɔ netat arɛt?”

²¹Ko di, jeng de Yɛsu a ha e ra Gbɔng Duk o, á sè ha e ra rebek mɛ.

²²Ano kwong, e jeng de Dagwi a ga sene hɛ yi e reku, bemât masâ fwom mɛ ba pere bare na neha de á kana ha. Hemo ha tɛ̀, yɛn a sey tsak o na pyɛ́ de bà jɛk e Bwok-basa Dagwi tanga neha de Yɛsu a ha.

²³Jeng de Yɛsu á sè e Yɛrusalɛm e jeng Nzem Gyilsit Nelɔ BeIsrayɛl, a ra pyɛ̂ bes detidetu. Yaga ano, bemat pyak de ba di pyɛ̂ bes o ba tɛ̀ gap mɛn e ra yɛ.

²⁴Ko Yɛsu a tɛ̀ gap mɛ e ra yɛn wɛt, yaga yɛ a tɔk neyey bemât mwa.

²⁵Yɛ a jāma na mwat a ha a yɛ pyɛ cak e ra bemat wɛt, yaga yɛ pyɛ mɛ á kana tɔk pyɛ́ de ya sé e ji neyey mɛn.