Read berom Yohana 21 Bible Online

Yohana 21 - berom bible

Yohana 21

¹E bamâ pyɛ́ yemo, Yɛsu a to dura a bemât masâ fwom mɛ tó mɛ e jeng de yɛn á sè e Gworep Tiberiyas. Pyɛ mo ya té ngan:

²Simɔn Bitrus, na Tomas de ba to tang ɛ, à Shambya, na Natanayel de á sè yi e Kana wo Galili, na nèy neba ne Zɛbɛdayus, tanga bemât masâ fwôm Yɛsu beba behak bá sè e dem hining mwa hɛn.

³Simɔn Bitrus a yâng bemɛn, “Ma sé kyè wɔ̀ vos betɔk.” Ko yɛn a yang ɛ, “Wot ê wɔ tanga hwo arɔng.” Yɛn a nusu, ba yel e ji dwa-nshi, ko mwa naturuk nane yɛn a vo pyɛ cak wɛt.

⁴Sede gasi ha vey bagât ye gbey, Yɛsu a vey, a tumal e rekwogom. Ko bemât masâ fwom mɛ yɛn á kana tɔk, a sé e yɛ, wɛt.

⁵Yɛsu a rangal hɛn, “À bewen, yin a ga vo pyɛ cak wɛt arɛt?” Yɛn a yang ɛ, “Ey.”

⁶A yang ɛn, “Barak hin segun min e vwɔ yegê dwa-nshi mo, ko yin ê sɛ̀ vɛ.” Ano, yɛn a barak segun o, ko yɛn a vos betɔk o pyak, yɛn a tɔk hwɔshɔ segun o wɛt, yaga betɔk o ba kat.

⁷Mwât masâ fwôm Yɛsu de Yɛsu a tɛ̀ yey na yɛ a yâng Bitrus, “A sé e Darwey!” Jeng de Simɔn Bitrus a wok, a sé e Darwey, a rɔgɔs rugu mɛ gwo ji mo, yaga á kana pat gwɛ, ko a gyili e ji gworep o.

⁸Bwang bemât masâ fwôm Yɛsu ba raa hɛ e ji dwa-nshi, ko yɛn a hwɔshɔ segun de betɔk ba kana sila sɛ. Yi e kwɔn de yɛn á kana sè ɛ̀ vɔk e rekwogom a sé yikyik wɛt, a sé sede mita naga (100) zɔng.

⁹Jeng de yɛn a nu ɛn e rekwogom o, yɛn a di kyâ hwalang. Yɛn a di betɔk e ra kya mo na kpam-tuk arɔng.

¹⁰Yɛsu a yang ɛn, “Vey in na behak e ji betɔk de yin a sé mɛsɛ̂ng vo mo.”

¹¹Simɔn Bitrus a yel e ji dwa-nshi, ko a hwɔshɔ segun o vey e rekwogom. Begbɔng betɔk ba sila sɛ, nepyak vɛ na sé naga na kuru batungun na vɛ betat (153). Mwa ano de betɔk o ba sé pyak, ko segun o sa hama hɛ wɛt.

¹²Yɛsu a yang ɛn, “Vey, ré in pyɛ́.” E ji bemât masâ fwom mɛ mo, vit a hwak de a vɔk yey ting na a rangal hɛ, “Hwà sé wà arɛt?” Yɛn a tɔk, a sé e Darwey.

¹³Yɛsu a vey, a jut kpam-tuk o, a nɔng ɛn, ko a ra ano na betɔk o arɔng.

¹⁴Hemo ha sé hê netat de Yɛsu a dura a bemât masâ fwom mɛ tó mɛ yi e jeng de bá kana sene hɛ yi e reku.

¹⁵E bama de ba yɛnɛ rê pyɛ́, Yɛsu a yâng Simɔn Bitrus, “À Simɔn, hwêy Yohana, hwà tɛ̀ yey na me hwo dal mɛ̀ vemo arɛt?” Bitrus a yang ɛ, “Ey, à Darwey, hwà tɔk, me simi hwo.” Yɛsu a yang ɛ, “Bɛrɛng nèy tyīmit hom naka.”

¹⁶A to yang ɛ hê neba, “À Simɔn, hwêy Yohana, hwà tɛ̀ yey na me arɛt?” A toyo a yɛ, a ye, “Ey, à Darwey, hwà tɔk, me simi hwo.” Yɛsu a yang ɛ, “Gyenges tyīmit hom.”

¹⁷A to yang ɛ hê netat, “À Simɔn, hwêy Yohana, hwó simi me arɛt?” Bitrus a lashe yey, yaga Yɛsu a rangal hɛ hê netat, “Hwó simi me arɛt?” A yang ɛ, “À Darwey, hwà tɔk kayɛ pyɛ, hwà tɔk, me simi hwo.” Yɛsu a yang ɛ, “Bɛrɛng tyīmit hom naka.

¹⁸Tsak o mwin me ha a hwo: Jeng de hwá rɔngɔl wen, hwá kana tɛ̀sɛ yɔ̀m mō pyɛ mō, ko hwá kyě kyè vɔk e kahɛ kwɔn de hwá simo. Ko jeng de hwô kwop, hwà rɔda nára vɔ mō, ko mwat hwak a rɔda tɛ̀ a hwo yɔ̀m mō na a kyè na hwo vɔk e kwɔn de hwó simo wɛt.”

¹⁹Yɛsu a ha ano, yaga na a bin dura mɛ̀ yerê gwong de Bitrus ê ku, ko yi e gwong gwane ê nɔ̂ng Dagwi nerey. E bama de a ha ano, a yang ɛ, “Raa me!”

²⁰Bitrus a doyo, a di mwât masâ fwom de Yɛsu a tɛ̀ yey na yɛ, a sé raa hɛn. A sé e yɛ de á kana ye yɛndɛng vɔk na Yɛsu e dem rê pyɛ́, na a rangal hɛ, “À Darwey, e wà de ê row o arɛt?”

²¹Jeng de Bitrus a di ɛ, a rangâl Yɛsu, “À Darwey, mwat womo ɛ?”

²²Yɛsu a yang ɛ, “Ka sede me simo na yɛ a nàra sɛ̌ jeng de mê ba toyo, sɛ́ mo ya sɛ́ arɛt? Raa me zɔng à hwo.”

²³Yaga ano, há ha shara hɛ e ji bemât raà Yɛsu wɔgɔ, mwât masâ fwom o ê ku wɛt. Ko Yɛsu a ha wɛt wɔgɔ, ê ku wɛt; a ye, “Ka sede me simo na yɛ a nàra sɛ̌ jeng de mê ba toyo, sɛ́ mo ya sɛ́ arɛt?”

²⁴E yɛ mwât masâ fwôm Yɛsu de a ha há e ra pyɛ́ yemo, ko a jɛk yɛ̄ arɔng. Wot a tɔk, nuha mɛ ha sé tsak o.

²⁵Pyɛ́ cak ya sé pyak de Yɛsu a ra. Ka sede ba yâng jɛk pyɛ́ yane mo mwa jijining e bebwok-basa, a sé a me sede jey pyɛ yɛ ya yâng tɔk jut bebok-basa de ba yâng jɛk o wɛt.