Read berom Yohana 3 Bible Online

Yohana 3 - berom bible

Yohana 3

¹Mwât nuyêl BeYuda hwak á sɛ̀ de ba tang ɛ, à Nikodemus, ko á sè hwak e ji BeFarisi.

²Tuhak, a hwo wɔ na Yɛsu nabwalak, a yang ɛ, “À Mwat Basa, wot a tɔk, hwà sé mwât basa de Dagwi a tomo hɛ. Yaga vit a mwat de ê tɔk ra pyɛ̂ bes de hwà sé ra, sɛ̌ Dagwi a sé na yɛ.”

³Yɛsu a yang ɛ, “Tsak o mwin me ha a hwo: Vit a mwat de ê tɔk di Segwɔm Dagwi, sɛ̌ ba tɔ ɛ tɔ hê neba.”[1]

⁴Nikodemus a rangal hɛ, a ye, “Bê to tɔk tɔ mwat de a ga vey mwat e rɛ̌ arɛt? Ê to tɔk yel e ji jîm neng mɛ, na be to tɔ ɛ tɔ hê neba arɛt?”

⁵Yɛsu a yang ɛ, “Tsak o mwin me ha a hwo: Vit a mwat de ê tɔk yel e Segwɔm Dagwi, sɛ̌ ba to tɔ ɛ yi na nshi tanga yi na Gabik Dagwi.

⁶Pyɛ de ye yi e rebêk mwasi ya sé pyɛ rebek; ko pyɛ de ye yi na Gabik Dagwi ya sé pyɛ Gabik.

⁷Hwo langat hwo wɛt, yaga ma ha a hwo: Gbing-gbing na be to tɔ in tɔ hê neba.

⁸Gul gwo pɛsɛl e gwong de gwo simo. Hwó wok wûs gwɛ, ko hwó tɔk kwɔn de gwo yi ɛ̀ kɛ kwɔn de gwo kyè vɔk ɛ̀ wɛt. A sé tyɛng ano na kawɛ mwat de ba to tɔ ɛ yi na retô Gabik Dagwi.”

⁹Nikodemus a yang ɛ, “Pyɛ yemo yê tɔk té e rɛ̌ arɛt?”

¹⁰Yɛsu a toyo a yɛ, a ye, “Hwo de hwà sé mwât basâ BeIsrayɛl, hwà tɔk pyɛ de há hemo ha dura wɛt arɛt?

¹¹Tsak o mwin me ha a hwo: Wot a sé ha a yin e ra pyɛ́ de wot a tɔk, ko wot a sé nɔng nuha e ra pyɛ́ de wot a to di arɔng, ko yin a simo na yin a sey tsak o na há mot wɛt.

¹²Ma kana ha e ra pyɛ́ de ye té e ji jey yemo, ko yin a sey tsak o na há hom wɛt. Yi e rɛ̌ de yin ê sey tsak o, ka sede ma sé ha a yin e ra pyɛ́ de ye té e lagwi arɛt?

¹³Vit a mwat de a sang tut vɔk e lagwi, sɛ̌ womo de a gyirik yi e hwomo wɔgɔ, Me de ma tɛ́ me mwat.

¹⁴Yimo raane, jeng de Mose tanga bemat mɛ bà kana sè e hey, Mose à tɛ̀ gwɔ̄m de ba yông na dyam shi e ra gwocɔgɔt, ko à nára wɛ e rak o. E gwong gwomo, a sé gbing-gbing na be nára Me de ma tɛ́ me mwat e rak o arɔng,

¹⁵yaga na kawɛ mwat de a tɛ̀ gap mɛ e ra me a bin sɛ̀ neken gbak-gbak.

¹⁶“Dagwi a tɛ̀ yey na bemât jey sizɔng; yaga ano, a nɔng Hwey mɛ de ha sé nju hɛ zɔng, yaga na kawɛ mwat de a tɛ̀ gap mɛ e ra hɛ a bin wey wɛt, ko na a sɛ̀ neken gbak-gbak.

¹⁷Yaga Dagwi a tomo Hwey mɛ, na he gang bemât jey na shɔt wɛt, ko a tomo hɛ, yaga na a sey neken mɛn yi na hɛ.

¹⁸Kawɛ mwat de a tɛ̀ gap mɛ e ra hɛ, bê gang ɛ na shɔt wɛt; ko kawɛ mwat de a tɛ̀ gap mɛ e ra hɛ wɛt, Dagwi a ga gang ɛ na shɔt, yaga a tɛ̀ gap mɛ e ra hemo wɛt de ha sé Hwey Dagwi nju hɛ zɔng.

¹⁹Gwong a gwomo de Dagwi e ra a bemat shɔt: Negbey na vey e jey, ko bemat ba dal na simô lwīl e ra negbey o, yaga be ragas pyɛ́ vyes.

²⁰Kawɛ mwat de e ragas pyɛ́ vyes e kyɛ́ ɛ negbey, e tele yi e negbey, yaga na bemat be kwon di pyɛ́ vyes de e ragas wɛt.

²¹Ko kawɛ mwat de e ragas pyɛ́ de ya sé tsak o e vey e ji negbey, yaga na negbey o ne dura dɛdɛɛt, pyɛ́ de a ra, a ra yɛ̄ yaga a gyenges hâ Dagwi.”

²²E bamâ pyɛ́ yane, Yɛsu tanga bemât masâ fwom mɛ ba sogo, be kyè vɔk e yɛnɛ̂ sevwêl Yudiya. A sangal e hwomo tanga yɛn jeng tyɔng, ko a sé tɛ̀sɛ a bemat batisma.

²³Yohana á sè sangal e Ainon bagat na Salim, ko a to sé ra a bemat batisma arɔng, yaga kwɔn o ha vɔk nshi bɛɛrɛ. Bemat ba kyese e hwomo, ko a sé ra a yɛn batisma.

²⁴E jeng o, ba ga kana vo Yohana be tɛ̀ ɛ e lɔ̂ ngyang e ngyen wɛt.

²⁵Tuhak, bemât masâ fwôm Yohana behak ba hwo ra nenan na WoYuda hwak e ra negwɔn BeYuda ne kûs pyɛ́ haalal.

²⁶Yaga ano, yɛn a wɔ̀ sɛ̀ Yohana, ko ba yang ɛ, “À Mwat Basa, hwó bare na mwat wane de á kana sè e hworo e gurâ Rɔt Yɔrdan, wane de hwà ha e ra yɛ arɛt? Ko di, yɛ a sé ra a bemat batisma. Mwa bemat ba sé tele vɔk na yɛ!”

²⁷Yohana a yang ɛn, “Vit a mwat de e tɔk vɔk reto rehak, sɛ̌ Dagwi a nɔng ɛ rɛ.

²⁸Yin pyɛ min yin á kana wok jeng de ma ye, ma sé womo wɛt de Dagwi a kasa na a sey bemat, ko Dagwi a tānga tomo me e nuyel mɛ.

²⁹A sé e rwâs gwel de a vɔk gwel o. Ko sa mɛ de a sé gyeng ɛ a sé wet betong na a wok há mɛ, ko jeng de a wok fwɔ mɛ, a vɔk yey pyɛng. A sé ano na me arɔng, ma vɔk yey pyɛng sizɔng.

³⁰A sé gbing-gbing na yɛ a gwɛ̌ hɛ na nerey, ko me, me tɛt me na nerey.”

³¹“Mwat de a yi e lagwi a dal bemât mwa. Yɛ de a sé wo jey yemo a sé yerê wo jey o, ko a sé ha e ra pyɛ̂ jey o arɔng. Ko mwat de a yi e lagwi a dal bemât mwa.

³²A sé nɔng nuha e ra pyɛ́ de yɛ̀ pyɛ mɛ a di, de a to wok arɔng. Ko mwa ano, vit a mwat de a sey tsak o na há mɛ.

³³Ko kawɛ mwat de a sey tsak o na há mɛ mo a sé dura tsɛng-tsɛng pyɛ́ de Dagwi a ha ya sé tsak o.

³⁴Mwat de Dagwi a tomo hɛ a sé ha neha Dagwi, yaga Dagwi e nɔng ɛ Gabik mɛ vit a yɛnɛ mo.

³⁵Dagwi a tɛ̀ yey na Hwey mɛ, ko a to nɔ̂ng hɛ reto e ra kayɛ pyɛ.

³⁶Kawɛ mwat de a tɛ̀ gap mɛ e ra Hwey Dagwi a sɛ̀ neken gbak-gbak; ko kawɛ mwat de a gyenges hâ Hwey Dagwi o wɛt a rɔda sɛ̀ neken o wɛt, ko Dagwi ê re nuyel na tɛ̂ shom e ra yɛ.”