Read berom Yohana 4 Bible Online

Yohana 4 - berom bible

Yohana 4

¹BeFarisi ba wok wɔgɔ, bemat de ba hwo raa Yɛsu, vemo de a to sé ra a yɛn batisma, ba dal vane de ba sé raa Yohana.

²(E ji hâ mwin, Yɛsu pyɛ mɛ a ra a mwat hwak batisma wɛt, a sé e bemât masâ fwom mɛ zɔng de ba ragas a bemat batisma.)

³Jeng de Darwey Yɛsu a wok pyɛ́ de bemat ba ha e ra yɛ, a sogo, a tik sevwêl Yudiya na a toyo vɔk e sevwêl Galili.

⁴Gwong vɔk e Galili gwa kwey e ji sevwêl Samariya.

⁵E ji kwɛngɛl mɛ mo, a hwo pom e repomo rehak rê Samariya de ba tâng rɛ, à Sikar. Repomo mo ra sé bagat na cap de Yakɔp à kana nɔ̂ng hwey mɛ Yɔsɛf yimo raane.

⁶Hwes de gwà kana sè gwô Yakɔp gwa sé e hwomo arɔng. Jeng de Yɛsu a wul kwɔn o, a sangal e vwâ hwes o, yaga a ga ruru na kwɛngɛl. Jeng o ya sé tê-gwi.

⁷E jeng o, bemât masâ fwôm Yɛsu bá kana kyè vɔk e ji repomo na be wɔ̀ sey pyɛ̂ re. Ko hwâ Samariya hwak a hwo wɔ e hwomo, na a vo nshi. Yɛsu a yang ɛ, “Nɔt me nshi, na me sɔ.”

⁸

⁹Hwā mo a yang ɛ, “Hàa! Hwo hwà sé WoYuda wɛt arɛt? Me ma sé hwâ Samariya wɛt a? Ko hwó ra won na me nɔt o nshi a?” A langat hɛ, yaga vit a pyɛ de ya man BeYuda na bemât Samariya.

¹⁰Yɛsu a toyo a yɛ, a ye, “Hwà tɔk yerê mwat de ma sé wɛt. Ka hwà tɔk me, ka a yâng sé e hwo de hwô rangal me na me nɔt o nshi. Dagwi e nɔngɔ̂s bemat nshi e nɔrɔ, nemo de ne vey a yɛn na neken. Ka sede hwà tɔk yerê mwat de ma sé, ka hwô yâng simo na me nɔng o nshi mo, ko ma yâng nɔng o nɛ.”

¹¹Hwā mo a yang ɛ, “À Da, hwes o gwa sé ciwil, ko hwà vɔk pyɛ vôs nshi mo wɛt. Hwô sɛ̀ nshi nane de ne vey a bemat na neken e gwa arɛt?

¹²À kana sè dâ beda mot Yakɔp de à nɔng ot hwes gwomo. Yɛ pyɛ mɛ, na nèy mɛ, tanga berɔndɔng mɛ mwa bà sɔ nshî gwɛ. A sé a hwo hwà dal Yakɔp mo a?”

¹³Yɛsu a yang ɛ, “Kawɛ mwat de e sɔ nshi nemo a rɔda to wok yêy hwɔshɔ.

¹⁴Ko kawɛ mwat de e sɔ nshi nane de ma rɔda nɔng ɛ ê sang to wok yêy hwɔshɔ wɛt. Nshi nane de mê nɔng ɛ nɛ nê sè sede jɔt nshi de nê nunus e ji mɛ, de ne nɔngɔs hɛ neken gbak-gbak.”

¹⁵Hwā mo a yang ɛ, “À Da, gabɔk wɛt, nɔt me yerê nshi nane mo, yaga na me kwon to wok yêy hwɔshɔ wɛt, na me to tik vɛsɛ vos nshi e ngamo.”

¹⁶Yɛsu a yang ɛ, “Ci wɔ̀ yila rwas mō, na hwo vey na yɛ.”

¹⁷Hwā mo a yang ɛ, “Ma vɔk rwas wɛt.” Yɛsu a yang ɛ, “Hwà ha yɛt de hwà ye, hwà vɔk rwas wɛt.

¹⁸Hwà ga kana ra weneng zang tungun, ko mwat de hwà sé sangal na yɛ a remo a sé rwâs weneng mō wɛt. Hwà ha tsak o.”

¹⁹Hwā mo a yang ɛ, “À Da, ma di, hwà sé zarap Dagwi.

²⁰Bedabeda mot ba dopse re a Dagwi fongol e ra tɛ̂t raku womo, ko yin BeYuda, yin a ye, a sé gbing-gbing na bemat be wɔ̀ re a Dagwi fongol e Yɛrusalɛm.”

²¹Yɛsu a yang ɛ, “À neng-gwɔ, sey tsak o na há hom: Jeng ya sé kyè vey de bemat bê to re a Dagwi Da fongol e ra tɛ̂t raku womo kɛ e Yɛrusalɛm wɛt.

²²Yin bemât Samariya yin a tɔk yɛ womo de yin e re a yɛ fongol wɛt; ko wot BeYuda wot a tɔk Dagwi de wot e re a yɛ fongol, yaga a sé yi na BeYuda de Dagwi a rɔda sey bemat.

²³Ko jeng ya sé kyè vey — mwin ya ga vey a remo — de Gabik Dagwi hê tɛ̀ bemat be kyɛm be re a Dagwi Da fongol e gwong de gwa sé tsak o. Yerê bemat de be re a yɛ fongol na yey rining — e yɛn vɛ de Dagwi e jāma na be re a yɛ fongol.

²⁴Dagwi a sé Gabik; bemat be tɔk re a yɛ fongol e gwong de gwa sé tsak o zɔng, ka sede Gabik mɛ ha tɛ̀ ɛn na be kyɛm be ra ano.”

²⁵Hwā mo a yang ɛ, “Ma tɔk, Mwat de Dagwi a kasa na a sey bemat a rɔda vey. Ko jeng de ê vey o, a rɔda ha a wot kayɛ pyɛ wɛshɛrɛk.”

²⁶Yɛsu a yang ɛ, “A sé e me de me ha na hwo à mwat wane mo.”

²⁷E jeng yane mo, bemât masâ fwom mɛ ba toyo; sede ba di ɛ a sé ha na hwā mo, ba langat hɛn. Ko vit a hwak e ji mɛn de a rangâl hwā mo, “E sɛ́ de hwó simo arɛt?” Kɛ a yâng Yɛsu, “Yaga sɛ́ de hwà sé ha na hwā mo arɛt?”

²⁸Ko hwā mo a tik tsung mɛ e hwomo, a nára hɛ vɔk e ji repomo, ko a hwo ha a bemat, a yang ɛn,

²⁹“Vey di in mwat de a ha a me pyɛ̂ mwa de ma ga sang ra! Kɛ ê sè e yɛ wɛ à Mwat de Dagwi a kasa na a sey bemat ayi?”

³⁰Ko bemat ba hwo nunus yi e ji repomo mo, na be wɔ́ e kwɔn de Yɛsu a sé ɛ̀.

³¹E jeng de hwā mo a kyè vɔk e ji repomo mo, bemât masâ fwôm Yɛsu ba shonong e ra yɛ, ba ye, “À Mwat Basa, vey re pyɛ́!”

³²Ko Yɛsu a yang ɛn, “Ma vɔk pyɛ̂ re yemo de yin a tɔk hâ yɛ̄ wɛt.”

³³Yaga ano, bemat mɛ mo ba hwo tâng bemɛn. “Hàa! Mwat hwak a ga vey nɔng ɛ pyɛ̂ re arɛt?”

³⁴Ko Yɛsu a yang ɛn, “Me ra pyɛ́ de yɛ̀ de a tomo me e simo na me ra, ko me yɛnɛ fwom de a ga nɔng me na me ra mo. Jeng de me ra ano, a sé sede ma ga re pyɛ́ à wane.

³⁵Bemat be tē, ‘Bwang pɛl naas na hywɛp he vey.’ Ko me ma sé ha a yin, bɛrɛng hin hiri! Di in pyɛ́ e ji vɛ ya ga vel, bwang yɛ̂t bwal o.

³⁶Mwât yɛ̂t bwal a sé sɛsɛm pyɔlɔ mɛ e ji fwom o, a sé vɛ̀sɛ na bemat na be sɛ̀ neken gbak-gbak. Ano kwong, mwat de á kana bere yére mo tanga womo de a yɛt bwal o bê vɔk yey pyɛng mwa hɛn.

³⁷A sé sede remo de bemat be tē, ‘Mwat hwak e bere yére mo, ko mwat hwak e yɛt bwal o.’

³⁸Ma tomo hin, na yin a wɔ̀ yɛt bwal e kwɔn de yin á kana how ɛ̀ cap wɛt. A sé e bemat behak de ba pɛngɛ hɛn na fwom o, ko yin a sé sɛ̀ pyɔlɔ̂ fwom mɛn o.”

³⁹Bemât Samariya pyak de ba yi e repomo mo ba hwo tɛ̀ gap mɛn e ra Yɛsu, yaga hwā mo a ye, “A ha a me pyɛ̂ mwa de ma ga sang ra.”

⁴⁰Yaga ano, e jeng de ba wul na Yɛsu, ba ra won na yɛ na a sangal na yɛn. A simo, ko a sangal e hwomo nepɔlɔ neba.

⁴¹Bemat pyak de ba dal vane ba tɛ̀ gap mɛn e ra yɛ e jeng de ba wok há mɛ.

⁴²Ko ba yâng hwā mo, “A sé yaga há mō de wot a tɛ̀ gap mot e ra yɛ wɛt; ko a sé yaga wot bato mot wot a ga wok há mɛ mo. A remo, wot a tɔk, e ji hâ mwin, yɛ a sé Mwât Sêy jey.”

⁴³E bamâ nepɔlɔ neba nane mo, Yɛsu a sogo, a to ɛ vɔk e sevwêl Galili.

⁴⁴Yɛ pyɛ mɛ á kana ye, “Bemat be nɔngɔ̂s zarap Dagwi nerey e ji sevwel mɛ wɛt.”

⁴⁵Ko jeng de a wul e hwomo, bemat ba sey ɛ na yey pyɛng. Yɛn arɔng bá kana wɔ́ e Yɛrusalɛm e jeng Nzem Gyilsit Nelɔ BeIsrayɛl, ko ba di pyɛ̂ mwa de Yɛsu a ra e jeng nzem o.

⁴⁶E bama mo, a to toyo vɔk e Kana wo Galili, kwɔn a hane de á kana sege nshi na ne tɛ́ ɛn nshî anap. Gbɔng mwât lɔ gwɔ̀m hwak á sè de hwey mɛ há sè ro hɛ e Kafarnahum.

⁴⁷Jeng de a wok, Yɛsu a sogo yi e sevwêl Yudiya wɔ e sevwêl Galili, a wɔ̀ sɛ̀ ɛ e hwomo, a ra won na yɛ, a yang ɛ, “Vey e Kafarnahum, na hwo tɛ̀ hwey hom tyang; ha vey bagât ku.”

⁴⁸Ko Yɛsu a yang ɛ, “Vit a mwat e ji min de ê tɛ̀ gap mɛ e ra me, sɛ̌ a tānga di pyɛ̂ bes detidetu e ngyen.”

⁴⁹Ko gbɔng mwat o a yang ɛ, “À Da, vey na wot a kyè, yaga hwey hom ha sé kyè wɔ̀ ku.”

⁵⁰Yɛsu a yang ɛ, “Kyè vɔk e lɔ; hwey mō ha sé kyè wɔ̀ dal!” Mwat o a sey tsak o na há de Yɛsu a ha a yɛ, ko a kyè vɔk e lɔ.

⁵¹Jeng de a sé e gwong wɔ e lɔ, bemât fwôm lɔ mɛ ba man na yɛ e gwong, ko ba yang ɛ, “Hwey mō ha ga dal.”

⁵²A hwo rangal hɛn jeng de hwey o ha hwo wok naka. Ko ba yang ɛ, “Á sè nayos dyam jining nagwi de rebek fes o ra hàla hɛ.”

⁵³Dâ hwey o a pere tɔk, á sè e jeng a yane de Yɛsu a yang ɛ, “Hwey mō ha sé kyè wɔ̀ dal.” Yaga ano, yɛ tanga bemât lɔ mɛ mwa ba tɛ̀ gap mɛn e ra Yɛsu.

⁵⁴Pyɛ bes ye neba a yemo de Yɛsu a to ra e jeng de a toyo yi e Yudiya vɔk e Galili.