Read berom Yohana 5 Bible Online

Yohana 5 - berom bible

Yohana 5

¹E bamâ pyɛ́ yane, jeng ya vey de BeYuda be ra nzem mɛn nehak. Yaga ano, Yɛsu a kyè vɔk e Yɛrusalɛm yaga nɛ.

²E Yɛrusalɛm o, ba vɔk dideng hwak de wa sé bagat na Ruhûp Tyīmit. E ji lêm BeYuda be tâng dideng wane mo, à Bet-Esta. Kwɔn o ha vɔk tam tungun,

³vemo de bemât serɔ pyak ba dyɛngɛs ɛ̀; yɛn á sè bebók, na bemat nà bol, tanga bemât gyɔ̂t nedem. [Bá sè gyeng na be sukta nshi mo.

⁴E jeng e jeng, tom-lagwî Darwey hwak e gyirik na a vey sukta nshi mo: E bama de a ga sukta nɛ ano, mwat de a tānga yel e ji nɛ a sɛ̀ netyang yi e mwa yerê serɔ de a vɔk.]

⁵Mwat hwak á sè e hwomo de a ga ros na serɔ neshey kuru batat na nɛ rwit (38).

⁶Jeng de Yɛsu a wul kwɔn o, a di ɛ e dyɛngɛ, ko a pere tɔk, a ga ros na serɔ mo, a yang ɛ, “Hwó simo na hwo sɛ̀ netyang arɛt?”

⁷Mwât serɔ mo a yang ɛ, “À Da, ma vɔk mwat de ê sɛlɛ me na a tɛ̀ me e ji nshi mo e jeng de ba ga sukta nɛ wɛt; sede ma sé ye ngyɛ́k na me yel ɛ̀, ko mwat hwak e tānga wɔ̀ yel ɛ̀ e ra me.”

⁸Yɛsu a yang ɛ, “Sogo, jut gwoput mō na hwo kyè!”

⁹Remo-remo, mwat o a tɛ̀ tyang, a gunung gwoput mɛ, a hwo kyè. Tuk hane mo há sè Tuk Shábat.

¹⁰Yaga ano, bemât nuyêl BeYuda ba yâng mwat de ba ga tɛ̀ ɛ tyang, “Hàa! E Tuk Shábat yunung! Hwà tɔk, ka sede hwà jut gwoput mō e Tuk Shábat, ko hwà gyili Badu wɛt a?”

¹¹Mwat o a yang ɛn, “Mwat de a ga tɛ̀ me tyang o a yang me, me jut gwoput hom na me kyè.”

¹²Ba rangal hɛ, ba ye, “E wɛ̌ mwat de a yang o hwo ra ano arɛt?”

¹³Ko mwat de ba tɛ̀ ɛ tyang o a tɔk mwat de a tɛ̀ ɛ tyang wɛt, yaga Yɛsu a ga kana nusu hɛ yaang, yaga bemat bá sè pyak e hwomo.

¹⁴E bama mo, Yɛsu a di ɛ e Gbɔng Duk Re Fongol, ko a yang ɛ, “Di, hwà ga tɛ̀ tyang a remo. Hwo re nuyel na ragâs banɛn wɛt, yaga na pyɛ cak vyes de ya dal serɔ mo ye kwon sɛ̀ o wɛt.”

¹⁵Mwat o a wɔ̀ ha a bemât nuyêl BeYuda, a sé e Yɛsu de a tɛ̀ ɛ tyang.

¹⁶E ngamo nuyel, yɛn a tak a Yɛsu reyɔm, yaga a tɛ̀ mwat o tyang Tuk Shábat.

¹⁷Yɛsu a yang ɛn, “Da hom e ragas fwom kayɛ jeng, ko me arɔng ma sé ra fwom ano.”

¹⁸Há hemo ha tɛ̀ bemât nuyêl BeYuda mo be gwɛ̌ jāma na be mɔrɔ hɛ. Yaga a lashe redu mɛn rê Tuk Shábat zɔng wɛt, ko a to yâng Dagwi, à Da mɛ arɔng. Yi ano, a dura, a jut tó mɛ tyɛng na Dagwi.

¹⁹Yɛsu a toyo a bemât nuyêl BeYuda mo na há hemo, a yang ɛn, “Tsak o mwin me ha a yin: Hwey Dagwi he tɔk ra pyɛ cak nju hɛ wɛt; he ragas pyɛ́ de he bɛrɛng Dâ hɛ e ragas. Kayɛ pyɛ de Da mo e ragas, Hwey mɛ he ragas ano arɔng.

²⁰Yaga Da mo a tɛ̀ yey na Hwey mɛ, ko e dura a hɛ mwa pyɛ́ de yɛ e ragas. Ê to dura a hɛ pyɛ́ de ya dal yane de yin a ga kana di; yaga ano, yin a rɔda langat hin.

²¹Sede remo de Dagwi Da e tɛ̀sɛ bemat de ba ga kana kushu be sene na neken, e gwong gwomo, Hwey mɛ he nɔngɔ̂s vemo de he simo neken o arɔng.

²²E rà rehâ râ shɔt arɔng — Da pyɛ mɛ e ra a mwat hwak shɔt wɛt, ko a ga tik retô râ shɔt o e vɔ Hwey mɛ.

²³A ra ano, yaga na bemât mwa be nɔ̂ng Hwey mɛ nerey e gwong de be nɔ̂ng Dâ hɛ nerey arɔng. Ka sede mwat hwak e nɔ̂ng Hwey Dagwi nerey wɛt, ko hane he dura, e nɔ̂ng Da de a tomo Hwey o vey e jey nerey arɔng wɛt.

²⁴“Tsak o mwin me ha a yin: Kawɛ mwat de a wok há hom, ko a tɛ̀ gap mɛ e ra Dagwi de a tomo me, a ga sɛ̀ neken gbak-gbak. Dagwi a rɔda gang ɛ na shɔt wɛt, ko mwat o a ga kana hàla gwông reku, ko a yel e gwông neken.

²⁵Tsak o mwin me ha a yin: Jeng ya sé kyè vey — mwin ya ga vey a remo — de bemat de ba ga kana kushu bê ba wok fwɔ̂ Hwey Dagwi; ko vane de bê ba wok fwɔ mɛ mo ba rɔda ba sene na neken.

²⁶Sede remo de Dagwi Da a vɔk reto na a nɔngɔ̂s bemat neken, ano arɔng a ga nɔ̂ng Hwey mɛ reto na he nɔngɔ̂s bemat neken.

²⁷A ga to nɔ̂ng Hwey mɛ reto na he ra a bemat shɔt, yaga ha sé Yɛ de a tɛ́ ɛ mwat.

²⁸Yin kwon langat hin pyɛ́ yemo wɛt! Jeng ya sé kyè vey de mwa bemat de ba ga kana kushu bê ba wok fwɔ mɛ,

²⁹ko bê ba sogso yi e besak mɛn. Bemat de bá kana ragas pyɛ́ ryat ba rɔda ba sene na be sangal na neken. Ko vane de bá kana ragas pyɛ́ vyes ba rɔda ba sene na be wɔ̀ tumal e nuyêl Dagwi de ê ba gang ɛn na shɔt.”

³⁰“Me tɔk ra pyɛ cak na reto hom nju hom zɔng wɛt sɛ̌ na retô Da hom. Me ra a bemat shɔt e gwong de a ha a me na me ra. Yaga ano, me gas shɔt e tē, yaga me jāma na me ra pyɛ de ya jam a me zɔng wɛt, ko me ra pyɛ de ya jam a Dagwi de a tomo me.

³¹“Ka sede ma nɔng nuha e ra tó hom, ko yi e rɛ̌ de bemat bê tɔk, há hom ha sé tsak o arɛt?

³²Ko mwat hwak a sɛ́ de e nɔng nuha e ra me, ko ma tɔk, há mɛ e ra me ha sé tsak o.

³³Yin á kana tomo betom min wɔ na Yohana, na yin a rangal hɛ, na a ha a yin tsak há, ko yɛ a ha a yin tsak há mo.

³⁴Me pyɛ hom me simo nuha mwat hwak wɛt, ko ma sé bare a yin na neha Yohana mo zɔng, yaga na Dagwi a sey neken min.

³⁵Yohana mo á kana sè sede kywa-kya de wo lolo, wo nɔngɔs negbey wɛshɛrɛk. Yaga jeng tyɔng yin á simo na yin a wok há mɛ de há sè sede negbey, na he tɛ̀ in na yin a vɔk yey pyɛng.

³⁶Ko pyɛ cak ya sé de ya dal nuha de Yohana a nɔng e ra me: Yɛ à tomong de Da hom a nɔng me reto na me ra. Tomong o be dura yerê mwat de ma sé, be to dura, a sé e Da hom de a tomo me.

³⁷Yɛ Da hom de a tomo me, yɛ pyɛ mɛ a ga nɔng nuha e ra me arɔng. Yin a sang wok fwɔ mɛ wɛt, ko yin a sang di ɛ na bayis min arɔng wɛt,

³⁸yin a to vɔk reha mɛ e ji neyey min wɛt, yaga yin a tɛ̀ gap min e ra womo de a tomo hɛ wɛt.

³⁹Kayɛ jeng yin a sê bûm basâ Bwok-basa Dagwi, yaga a sé a yin, yin a rɔda sɛ̀ neken gbak-gbak yi na gwɛ. Ko a sé e Bwok-basa mo de gwa sé nɔng nuha e ra me!

⁴⁰Ko mwa ano, yin a kyɛ́ in nà vey na me, yaga na yin a bin sey neken nemo mo.

⁴¹“Me, me jāma wɛt na bemat be somo me.

⁴²Ko ma tɔk yerê bemat de yin a sé. Ma tɔk, yin a tɛ̀ yey na Dagwi wɛt.

⁴³Ma vey na retô Da hom, ko yin a sey me wɛt. Ko ka sede mwat hwak a vey na retô tó mɛ zɔng, yin ê sey ɛ.

⁴⁴Yin e simo na bemin be somo hin, ko yin e jāma wɛt na yɛ de a sé Dagwi nju mɛ zɔng a somo hin. Sede remo de a sé ano, yi e rɛ̌ de yin ê sey tsak o na há hom arɛt?

⁴⁵“Yin bare wɛt wɔgɔ, e me de mê tɛ̀sɛ sekun min e nuyêl Da hom. A sé e Mose de e tɛ̀sɛ sekun min. E yɛ wɛ de yin a sɛt yey min e ra yɛ na a sɛlɛ hin.

⁴⁶Ka yin a yâng sey tsak o na hâ Mose, ka yin a yâng sey tsak o na há hom arɔng, yaga à kana jɛk há e ra me.

⁴⁷Ko sede remo de yin a sey tsak o na há de à kana jɛk wɛt, yi e gwɛ̌ gwong de yin ê sey tsak o na neha hom arɛt?”